ໃນວັນທີ 5 ກໍລະກົດ 2023, ທີ່ໂຮງແຮມແລນໝາກ ລີເວີໄຊ, ນະຄອນຫຼວງວຽງຈັນ, ສະຖາບັນຄົ້ນຄວ້າການເງິນ ເມືອງຈົງຢາງ ສປ ຈີນ, ມະຫາວິທະຍາໄລ ເຢິນມິນ ຮ່ວມກັບ ສະຖາບັນອຸດສາຫະກໍາ ແລະ ການຄ້າ, ກະຊວງອຸດສາຫະກໍາ ແລະ ການຄ້າ ໄດ້ຈັດກອງປະຊຸມ ວິຊາການລະຫວ່າງສອງສະຖາບັນຂື້ນ ໂດຍການໃຫ້ກຽດເຂົ້າຮ່ວມເປັນປະທານຂອງ ທ່ານ ສົມສະຫວາດ ເລັ່ງສະຫວັດ ອະດິດຮອງນາຍົກລັດຖະມົນຕີ ແຫ່ງ ສປປ ລາວ ມີແຂກເຂົ້າຮ່ວມຈາກພາກລັດ, ພາກເອກະຊົນ ແລະ ນັກທຸລະກິດ ຈາກ ສປປ ລາວ ແລະ ສປ ຈີນ ຈໍານວນ 160 ທ່ານ.

ຈຸດປະສົງຂອງກອງປະຊຸມແມ່ນເພື່ອເປັນເວທີສົນທະນາດ້ານວິຊາການຕິດພັນກັບບົດບາດຂອງ “ຂໍ້ລິເລີ່ມໜຶ່ງແລວໜຶ່ງເສັ້ນທາງ” ຕໍ່ການພັດທະນາດ້ານເສດຖະກິດ ແລະ ສັງຄົມ ລະຫວ່າງ ສປປ ລາວ ແລະ ສປ ຈີນ; ນອກຈາກນັ້ນກໍເພື່ອເປັນການປະກອບສ່ວນສະເຫຼີມສະຫຼອງຄົບຮອບ 10 ປີ ການເຂົ້າ ຮ່ວມແນວຄິດໜຶ່ງແລວໜຶ່ງເສັ້ນທາງ (BRI) ຂອງ ສປປ ລາວ.

ໃນກອງປະຊຸມຜູ້ເຂົ້າຮ່ວມໄດ້ຮັບຟັງການບັນຍາຍຈາກນັກວິຊາການທັງສອງຝ່າຍ ໂດຍຝ່າຍລາວ ມີ 5 ທ່ານ ໄດ້ແລກປ່ຽນຄໍາຄິດເຫັນໃນ ຫົວຂໍ້ ບົດບາດຂອງໜຶ່ງແລວໜຶ່ງເສັ້ນທາງຕໍ່ການພັດທະນາເສດຖະກິດ ແລະ ສັງຄົມຂອງ ສປປ ລາວ ໃນແຕ່ລະດ້ານ ເຊັ່ນ: 1.ການຄ້າ, 2. ແລວທາງເສດຖະກິດລາວ-ຈີນ, 3. ການຜະລິດກະ ສິກໍາ ແລະ 4. ການທ່ອງທ່ຽວ ແລະ 5. ການຂົນສົ່ງ ແລະ ໃນເບື້ອງນັກວິຊາການຈີນແມ່ນປະກອບມີ 5 ທ່ານ ເຊັ່ນກັນ ໃນການປະກອບຄໍາຄິດເຫັນໃນຫົວຂໍ້ ເຊັ່ນ: 1. ການພັດທະນາສີຂຽວຂອງຈີນ ແລະ ອາຊຽນ ພາຍໃຕ້ໜຶ່ງແລວໜຶ່ງເສັ້ນ ທາງກໍລະນີສຶກສາທາງລົດໄຟລາວ-ຈີນ, 2. ການເຂົ້າຮ່ວມໜຶ່ງແລວໜຶ່ງເສັ້ນທາງຂອງບັນດາປະເທດໃນໂລກ, 3. ໜຶ່ງແລວໜຶ່ງເສັ້ນທາງຕໍ່ການປະກອບສ່ວນຫຼຸດຜ່ອນຄວາມທຸກຍາກ, 4. ເສັ້ນທາງລົດໄຟລາວ-ຈີນ ຕໍ່ການຜະລິດກະສິກໍາຂອງລາວເພື່ອສົ່ງອອກໄປຈີນ, 5. ໜຶ່ງແລວໜຶ່ງເສັ້ນທາງ ແລະ ການເຊື່ອມໂຍງພາກພື້ນ.

ໂອກາດນີ້ ຕອນທ້າຍຂອງວາລະກອງປະຊຸມ ທ່ານ ສົມສະຫວາ ເລັ່ງສະຫວັດ ອາດິດຮອງນາຍົກລັດຖະມົນຕີ ແຫ່ງ ສປປ ລາວ ໄດ້ຕີລາຄາສູງ ຕໍ່ການສະເຫຼີມສະຫຼອງຄົບຮອບ 10 ປີ ແຫ່ງການສ້າງໜຶ່ງແລວທາງໜຶ່ງເສັ້ນທາງ ແລະ ເວທີປາໄສສາກົນການຮ່ວມມື ລາວ-ຈີນ ແລະ ທ່ານຍັງໃຫ້ຮູ້ວ່າ: ຜົນປະໂຫຍດຂອງໜຶ່ງແລວໜຶ່ງເສັ້ນທາງ ປະຈຸບັນມີ 150 ປະເທດ ທີ່ເປັນພາຄີ ໜຶ່ງແລວໜຶ່ງເສັ້ນທາງ, ສປປ ລາວ ໄດ້ຮັບໝາກຜົນຢ່າງຈະແຈ້ງເຫັນໄດ້ຊັດເຈນ ອັນເດັ່ນທີ່ສຸດແມ່ນ ເສັ້ນທາງລົດໄຟ ລາວ-ຈີນ ເຊິ່ງເຮັດໃຫ້ການພົວພັນຮ່ວມມື ລາວ-ຈີນ ຮອບດ້ານກ້າວໄປສູ່ຄຸນນະພາບມີໂສມໜ້າໃໝ່ ສາມາດເວົ້າໄດ້ວ່າ ການພົວພັນຮ່ວມມື ລາວ-ຈີນ ດີຂື້ນຢ່າງເລິກເຊິ່ງ, ມີການພົວພັນດ້ານເສດຖະກິດ-ການຄ້າ ແລະ ການລົງທຶນ ສູງບົນຫຼັກການການຮ່ວມມືຕ່າງຝ່າຍຕ່າງໄດ້ຮັບຜົນປະໂຫຍດ. ນອກນັ້ນ ເສັ້ນທາງລົດໄຟ ລາວ-ຈີນ ຈະປະກອບສ່ວນສໍາຄັນຕໍ່ການພັດທະນາເສດຖະກິດຂອງປະເທດ ໂດຍສະເພາະເຮັດໃຫ້ປະຊາຊົນທີ່ອາໃສຢູ່ເຂດທີ່ມີ ເສັ້ນທາງເຊື່ອມຕໍ່ ແລະ ຢູ່ລຽບຕາມທາງລົດໄຟລາວ-ຈີນ ມີວຽກເຮັດງານທໍາ ແລະ ລາຍຮັບເພີ້ມຂື້ນຈາກການຄ້າ ແລະ ການຜະລິດທີ່ຈະຂະຫຍາຍຕົວໃນອະນາຄົດ.

ຂ່າວ-ພາບ: ໄພວັນ ໂຄດວັນທາ ສູນສະຖິຕິ ແລະ ຂໍ້ມູນຂ່າວສານ