ກອງປະຊຸມສຳມະນາສາກົນ ແລກປ່ຽນບົດຮຽນການຄຸ້ມຄອງ ແລະ ຫຼຸດຜ່ອນຜົນກະທົບ ໂຄງການຂຸດຄົ້ນແຮ່ເກືອໂປຕາສ ຢູ່ ສປປ ລາວ
ໃນວັນທີ 12 ພຶດສະພາ 2026 ກົມທໍລະນີສາດ ແລະ ບໍ່ແຮ່ ກະຊວງອຸດສາຫະກຳ ແລະ ການຄ້າ ສປປ ລາວ ຮ່ວມກັບ ສະມາຄົມອຸດສາຫະກຳເກືອອະນົງຄະທາດ ສປ ຈີນ ໄດ້ຈັດກອງປະຊຸມສໍາມະນາສາກົນ ແລກປ່ຽນບົດຮຽນກ່ຽວກັບ ການຄຸ້ມຄອງ ແລະ ມາດຕະການຫຼຸດຜ່ອນຜົນກະທົບຕໍ່ສິ່ງແວດລ້ອມ ໂຄງການຂຸດຄົ້ນແຮ່ເກືອໂປຕາສ ຢູ່ ສປປ ລາວ.
ກອງປະຊຸມໃຫ້ກຽດເຂົ້າຮ່ວມເປັນປະທານໂດຍ ທ່ານ ບຸນຍົງ ສີດາວົງ ຫົວໜ້າກົມທໍລະນີສາດ ແລະ ບໍ່ແຮ່. ຝ່າຍຈີນ ມີ ທ່ານ ຫວາງ ສຽວ ເຟິງ (Wang Xiaofeng) ປະທານສະມາຄົມອຸດສາຫະກຳເກືອອະນົງຄະທາດ ແຫ່ງ ສປ ຈີນ ແລະ ທ່ານ ຫານ ເຢ້ (Han Ye) ເລຂານຸການເອກ ປະຈຳຫ້ອງການເສດຖະກິດ ແລະ ການຄ້າ ສະຖານທູດ ສປ ຈີນ ປະຈຳ ສປປ ລາວ. ນອກຈາກນີ້ ຍັງມີຜູ້ຕາງໜ້າຈາກກົມກອງ ກະຊວງ ອຄ, ຂະແໜງການທີ່ກ່ຽວຂ້ອງ, ທ້ອງຖິ່ນ ແລະ ບັນດາບໍລິສັດ ລົງທຶນດ້ານແຮ່ທາດ ທັງລາວ ແລະ ຈີນ ລວມ 180 ທ່ານ.
ຄຳກ່າວເປີດກອງປະຊຸມ
ທ່ານ ບຸນຍົງ ສີດາວົງ ໄດ້ກ່າວວ່າ: ກອງປະຊຸມໃນມື້ນີ້ ບໍ່ພຽງແຕ່ເປັນການປຶກສາຫາລືທາງດ້ານເຕັກນິກ ແຕ່ຍັງເປັນການຢືນຢັນຄວາມໝາຍໝັ້ນໃນການເປັນ ຄູ່ຮ່ວມຊະຕາກຳ ລາວ-ຈີນ ໂດຍສະເພາະການຜັນຂະຫຍາຍການຮ່ວມມືດ້ານເສດຖະກິດ, ການຄ້າ ແລະ ການລົງທຶນ ໃນຂະແໜງອຸດສາຫະກຳບໍ່ແຮ່. ສປປ ລາວ ມີຊັບພະຍາກອນແຮ່ເກືອໂປຕາສ ທີ່ອຸດົມສົມບູນ ເປັນໜຶ່ງໃນແຫຼ່ງສຳຄັນຂອງພາກພື້ນ ໃນຂະນະທີ່ ສປ ຈີນ ມີຄວາມກ້າວໜ້າດ້ານເຕັກໂນໂລຊີ ແລະ ປະສົບການສູງໃນການຄຸ້ມຄອງບໍ່ແຮ່.
3 ເສົາຄໍ້າຫຼັກຂອງການຮ່ວມມື
ການສຳຫຼວດ ແລະ ພັດທະນາດ້ວຍເຕັກໂນໂລຊີທັນສະໄໝ — ນໍາໃຊ້ວິທະຍາສາດທີ່ກ້າວໜ້າ ເພື່ອລົງເລິກການສຳຫຼວດຂໍ້ມູນທໍລະນີສາດ ແລະ ຮັບປະກັນການນໍາໃຊ້ຊັບພະຍາກອນໃຫ້ໄດ້ປະໂຫຍດສູງສຸດ
ການສ້າງ ຮູບແບບນິເວດວິທະຍາໃໝ່ — ພັດທະນາລະບົບຄົບວົງຈອນ ຕັ້ງແຕ່ການຂຸດຄົ້ນທີ່ເປັນມິດກັບສິ່ງແວດລ້ອມ, ການປຸງແຕ່ງທີ່ມີມາດຕະຖານ ຈົນເຖິງການສ້າງຕ່ອງໂສ້ຜະລິດຝຸ່ນໂປຕາສຽມ ເພື່ອຮັບໃຊ້ກະສິກຳ ແລະ ສົ່ງອອກສູ່ຕະຫຼາດສາກົນ
ການພັດທະນາແບບຍືນຍົງ ແລະ ມີສ່ວນຮ່ວມ — ຜູກໂຍງກັບການຮັກສາສິ່ງແວດລ້ອມ ແລະ ການພັດທະນາຊີວິດຊຸມຊົນອ້ອມຂ້າງ ໃຫ້ໂຄງການບໍ່ແຮ່ ກາຍເປັນຕົວແບບຂອງການພັດທະນາຢ່າງຍືນຍົງ
ກອງປະຊຸມຄັ້ງນີ້ ຜູ້ເຂົ້າຮ່ວມໄດ້ຮັບຟັງການຖ່າຍທອດບົດຮຽນຈາກຜູ້ຊ່ຽວຊານລະດັບແຖວໜ້າ ຂອງວິສາຫະກິດຂະໜາດໃຫຍ່ ສປ ຈີນ ແລະ ນັກວິທະຍາສາດຈາກສະຖາບັນຄົ້ນຄວ້າ ເພື່ອຮ່ວມກັນຫັນປ່ຽນການຄຸ້ມຄອງ ແລະ ພັດທະນາແຮ່ເກືອໂປຕາສ ໃນ ສປປ ລາວ ໃຫ້ກາຍເປັນຕົວແບບ ຂອງການຂຸດຄົ້ນທີ່ທັນສະໄໝ ແລະ ສ້າງມູນຄ່າເພີ່ມຢ່າງຍືນຍົງ.
