ກອຄ ສະເຫຼີມສະຫຼອງວັນຫັດຖະກຳແຫ່ງຊາດ ຄົບຮອບ 25 ປີ

ໃນຕອນເຊົ້າຂອງວັນທີ 1 ພະຈິກ 2026 ນີ້, ທີ່ສວນປະຕູໄຊ ໃຈກາງນະຄອນຫຼວງວຽງຈັນ, ໄດ້ຈັດພິທີເປີດຂະບວນການຍ່າງສະເຫຼີມສະຫຼອງ ວັນຫັດຖະກຳແຫ່ງຊາດ (1 ພະຈິກ) ຄົບຮອບ 25 ປີ ວຽກງານຫັດຖະກຳລາວ ຢ່າງເປັນທາງການ ໂດຍບັນຍາກາດທີ່ຟົດຟື້ນ ແລະ ເຕັມໄປດ້ວຍຄວາມໝາຍຄວາມສໍາຄັນ.

ໃຫ້ກຽດເຂົ້າຮ່ວມ ແລະ ກ່າວເປີດງານໂດຍ ທ່ານ ມະໄລທອງ ກົມມະສິດ, ລັດຖະມົນຕີກະຊວງອຸດສາຫະກຳ ແລະ ການຄ້າ; ໂດຍມີ ທ່ານ ສັນຕິພາບ ພົມວິຫານ, ຮອງນາຍົກລັດຖະມົນຕີ ເຂົ້າຮ່ວມຢ່າງເປັນທາງການ, ພ້ອມດ້ວຍ ທ່ານ ປ້າ ນາລີ ສີສຸລິດ, ພັນລະຍາ ທ່ານປະທານປະເທດ, ປະທານຄະນະທີ່ປຶກສາສະມາຄົມຫັດຖະກຳລາວ, ບັນດາການນຳພັກ-ລັດ, ບັນດາສະຖານທູດ, ຜູ້ຕາງໜ້າອົງການຈັດຕັ້ງສາກົນ, ພັນລະຍາການນຳ, ພະນັກງານລັດຖະກອນ, ສະມາຊິກສະມາຄົມຫັດຖະກຳລາວ, ຜູ້ປະກອບການ, ນັກຮຽນ-ນັກສຶກສາ, ສື່ມວນຊົນ ແລະ ແຂກຜູ້ມີກຽດທຸກທ່ານເຂົ້າຮ່ວມຢ່າງພ້ອມພຽງ.

ໃນພິທີອັນສະຫງ່າລາສີດັ່ງກ່າວ, ທ່ານ ມະໄລທອງ ກົມມະສິດ ໄດ້ເນັ້ນໜັກໃນການເປີດງານວ່າ:

"ຫັດຖະກຳ ບໍ່ແມ່ນພຽງແຕ່ວັດຖຸສິ່ງຂອງ ຫຼື ເຄື່ອງປະດັບທົ່ວໄປ; ແຕ່ມັນຄື 'ລົມຫາຍໃຈ ແລະ ຈິດວິນຍານ' ຂອງຄົນລາວ ທີ່ບົ່ງບອກເຖິງວິຖີຊີວິດ ແລະ ພູມປັນຍາອັນລ້ຳຄ່າ ເຊິ່ງເປັນເອກະລັກສະເພາະຕົວ ທີ່ພວກເຮົາສາມາດເອກອ້າງທະນົງໃຈໄດ້ໃນທຸກເວທີທັງພາຍໃນ ແລະ ຕ່າງປະເທດ. ພ້ອມດຽວກັນນັ້ນ, ຫັດຖະກຳຍັງປຽບສະເໝືອນເສັ້ນເລືອດສຳຄັນ ທີ່ຫຼໍ່ລ້ຽງເສດຖະກິດຖານຮາກ, ສ້າງວຽກເຮັດງານທຳ ແລະ ຍົກລະດັບຄຸນນະພາບຊີວິດການເປັນຢູ່ຂອງປະຊາຊົນໃຫ້ດີຂຶ້ນຢ່າງແທ້ຈິງ."

ທ່ານລັດຖະມົນຕີ ຍັງໄດ້ສະແດງຄວາມຮູ້ບຸນຄຸນຢ່າງເລິກເຊິ່ງ ມາຍັງພັກ-ລັດ, ຊ່າງຫັດຖະກຳ, ຜູ້ປະກອບການ, ສະມາຄົມຫັດຖະກຳລາວ ຕະຫຼອດຮອດປະຊາຊົນທຸກພາກສ່ວນ ທີ່ໄດ້ຮ່ວມແຮງຮ່ວມໃຈກັນປົກປັກຮັກສາ ແລະ ສົ່ງເສີມມູນມໍລະດົກວັດທະນະທຳອັນລໍ້າຄ່ານີ້ ຕະຫຼອດໄລຍະ 25 ປີທີ່ຜ່ານມາ. ພ້ອມທັງຮຽກຮ້ອງໃຫ້ທົ່ວສັງຄົມ ສືບຕໍ່ເປັນກະບອກສຽງຊຸກຍູ້ປຸກລະດົມໃຫ້ຫັນມາ "ນຸ່ງຜ້າລາວ, ຊົມໃຊ້ເຄື່ອງຫັດຖະກຳລາວ ແລະ ສະໜັບສະໜູນສີມືຄົນລາວ" ເພື່ອຊ່ວຍໃຫ້ຫັດຖະກຳລາວສາມາດຢືນຢັດຢ່າງເຂັ້ມແຂງ ແລະ ກາຍເປັນສິນຄ້າສົ່ງອອກທີ່ສ້າງລາຍຮັບໃຫ້ແກ່ປະເທດຊາດ.

ຫຼັງຈາກນັ້ນ, ທ່ານ ມະໄລທອງ ກົມມະສິດ ກໍໄດ້ໃຫ້ກຽດປະກາດເປີດຂະບວນການຍ່າງສະເຫຼີມສະຫຼອງຢ່າງເປັນທາງການ ດ້ວຍບັນຍາກາດທີ່ເຕັມໄປດ້ວຍຮອຍຍິ້ມ, ມິດຕະພາບ ແລະ ຄວາມສາມັກຄີຮັກແພງ.