ກະຊວງ ອຄ ລົງນາມຮ່ວມມືພັດທະນາລະບົບດິຈິຕອນ DTOP ແລະ MOU Digital Transformation ກັບ AIDC Tech

ໃນວັນທີ 7 ພຶດສະພາ 2026, ກະຊວງ ອຄ ໄດ້ຈັດພິທີລົງນາມ ສັນຍາຮ່ວມມື (MOA) ສຳລັບໂຄງການ Digital Trade Operating Platform (DTOP) ແລະ ບົດບັນທຶກຄວາມເຂົ້າໃຈ (MOU) ດ້ານ Digital Transformation ຮ່ວມກັບ ບໍລິສັດ ເອໄອດີຊີ ເທັກ (AIDC Tech).

ພິທີດັ່ງກ່າວໃຫ້ກຽດເຂົ້າຮ່ວມໂດຍ ທ່ານ ສັນຕິພາບ ພົມວິຫານ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ, ທ່ານ ມະໄລທອງ ກົມມະສິດ ລັດຖະມົນຕີ ກະຊວງ ອຄ, ທ່ານ ເຫຼັກໄຫຼ ສີວິໄລ ລັດຖະມົນຕີກະຊວງໂຍທາທິການ ແລະ ຂົນສົ່ງ ແລະ ທ່ານ ວຽງທະວີສອນ ເທບພະຈັນ ປະທານອົງການກວດສອບແຫ່ງລັດ.

ຜົນງານດ້ານດິຈິຕອນທີ່ຜ່ານມາ

ທ່ານ ປອ ບົວວັນ ວິລະວົງ ຫົວໜ້າຫ້ອງການ ກະຊວງ ອຄ ໄດ້ລາຍງານຜົນງານດ້ານດິຈິຕອນທີ່ຜ່ານມາ ໄດ້ແກ່:

• ການສ້າງສູນຂໍ້ມູນ (Data Center) ລວມສູນ

• ການເຊື່ອມຕໍ່ລະບົບຂຶ້ນທະບຽນວິສາຫະກິດອອນລາຍ ເຂົ້າກັບຂະແໜງພາສີ ແລະ ອາກອນ

• ການນຳໃຊ້ລະບົບ e-Office — ຢຸດຕິການສົ່ງເອກະສານດ້ວຍເຈ້ຍ 100% ໃນເດືອນມີນາ 2025

ແຜນການຫັນເປັນດິຈິຕອນ 5 ປີ

• ໃບອະນຸຍາດທຸລະກິດອອນລາຍ — ຕັ້ງເປົ້າ 80% ພາຍໃນປີ 2028

• Trade Dashboard — ລະບົບຕິດຕາມຂໍ້ມູນການຄ້າ Real-time

• Data Lake — ເຊື່ອມໂຍງ 8 ຖານຂໍ້ມູນໃຫຍ່ຂອງກະຊວງ ແບບອັດຕະໂນມັດ

• ລາຍເຊັນດິຈິຕອນ — ອອກນິຕິກຳຮອງຮັບ ການນຳໃຊ້ເຕັມຮູບແບບ

• ພັດທະນາບຸກຄະລາກອນ — ສ້າງຄວາມສາມາດດ້ານດິຈິຕອນ 100% ພາຍໃນປີ 2028

ການລົງນາມ 2 ສ່ວນ

MOA — ລະບົບ DTOP: ພັດທະນາ 6 ລະບົບຫຼັກ ໄດ້ແກ່ ລະບົບຄຸ້ມຄອງການນຳເຂົ້າຍານພາຫະນະ, ລະບົບຕິດຕາມນ້ຳມັນ ແລະ ໃບຮັບຮອງແຫຼ່ງກຳເນີດສິນຄ້າ (e-CO) ໃນຮູບແບບ PPP — ລັດຊ່ວຍຮັບໄວ້ເມື່ອສິ້ນສຸດສັນຍາ.

MOU — Digital Transformation: ສຶກສາຄວາມເປັນໄປໄດ້ ໃນການຫັນທຸກກົມກອງ ພາຍໃນກະຊວງໃຫ້ເປັນດິຈິຕອນ ກວມ E-learning, ຂໍ້ມູນແຮ່ທາດ, ການສົ່ງເສີມ SME ແລະ ຊັບສິນທາງປັນຍາ.

ການລົງທຶນດ້ານດິຈິຕອນໃນຄັ້ງນີ້ ຈະເປັນເຄື່ອງມືສຳຄັນໃນການຍົກລະດັບຄຸນນະພາບວຽກງານຂອງກະຊວງ ໃຫ້ມີຄວາມໂປ່ງໃສ, ວ່ອງໄວ ແລະ ມີປະສິດທິພາບ ສອດຄ່ອງກັບຍຸກສະໄໝ ແລະ ຜົນປະໂຫຍດສູງສຸດຂອງປະຊາຊົນ ແລະ ຜູ້ປະກອບການ. — ທ່ານ ປອ ບົວວັນ ວິລະວົງ