ພິທີເຊັນ MOU ລະຫວ່າງ ບຄຊ ລາວ ແລະ CGCC ກໍາປູເຈຍ ດ້ານການຄໍ້າປະກັນສິນເຊື່ອ ເພື່ອສົ່ງເສີມ ຈນກ
ໃນວັນທີ 11 ພຶດສະພາ 2026, ບໍລິສັດ ຄໍ້າປະກັນສິນເຊື່ອລາວ ຈຳກັດຜູ້ດຽວ (ບຄຊ) ແລະ ບໍລິສັດ ຄໍ້າປະກັນສິນເຊື່ອ ແຫ່ງ ກໍາປູເຈຍ (CGCC) ໄດ້ລົງນາມໃນບົດບັນທຶກຄວາມເຂົ້າໃຈ (MOU) ຮ່ວມກັນ ທີ່ສຳນັກງານຂອງ CGCC ເພື່ອສ້າງຕັ້ງສາຍພົວພັນ ແລະ ການຮ່ວມມືລະຫວ່າງສອງສະຖາບັນຄໍ້າປະກັນສິນເຊື່ອ ແນໃສ່ ແລກປ່ຽນຄວາມຮູ້ ແລະ ປະສົບການ ໃນການດຳເນີນງານ ແລະ ການພັດທະນາລະບົບ ແລະ ຜະລິດຕະພັນຄໍ້າປະກັນສິນເຊື່ອ ເພື່ອສົ່ງເສີມການເຕີບໂຕຂອງ ຈນກ.
ບົດບັນທຶກຄວາມເຂົ້າໃຈດັ່ງກ່າວ ໄດ້ຮັບການລົງນາມໂດຍ ທ່ານ ຈິດ ຫລົງ ຮ່ວງ (Mr. Keet Loong WONG) ຜູ້ອໍານວຍການ ບຄຊ ແລະ ທ່ານ ໂນ ລິດາ (Mr. No Lida) ຜູ້ອໍານວຍການ CGCC ໂດຍເຂົ້າຮ່ວມເປັນສັກຂີພະຍານຈາກຄະນະສະພາບໍລິຫານ ບຄຊ ຈາກ ກະຊວງ ອຄ, ກະຊວງການເງິນ, ທະນາຄານແຫ່ງ ສປປ ລາວ ແລະ ຄະນະບໍລິຫານງານຂອງ CGCC ລວມທັງໝົດປະມານ 30 ທ່ານ.
ຄຳກ່າວຂອງຜູ້ອໍານວຍການ ບຄຊ
ທ່ານ ຈິດ ຫລົງ ຮ່ວງ ກ່າວວ່າ: ພວກເຮົາຮູ້ສຶກເປັນກຽດຢ່າງຍິ່ງ ທີ່ໄດ້ເຊັນ MOU ກັບ CGCC ໃນມື້ນີ້ ເຊິ່ງຖືເປັນການສ້າງຕັ້ງການຮ່ວມມືທາງຍຸດທະສາດສຳລັບ ບຄຊ. CGCC ມີພື້ນຖານທີ່ເຂັ້ມແຂງ ແລະ ໄດ້ເຕີບໃຫຍ່ກາຍເປັນສະຖາບັນຄໍ້າປະກັນສິນເຊື່ອແບບຢ່າງໃນພາກພື້ນ ຕະຫຼອດໄລຍະ 5 ປີຜ່ານມາ. ການເປັນຄູ່ຮ່ວມມືໃນຄັ້ງນີ້ ຈະສະໜັບສະໜູນການພັດທະນາຂອງ ບຄຊ ໃນການປະຕິບັດບົດບາດຂອງຕົນ ເພື່ອປັບປຸງການເຂົ້າເຖິງແຫຼ່ງທຶນຂອງ ຈນກ ໃນ ສປປ ລາວ.
ຄຳກ່າວຂອງຜູ້ອໍານວຍການ CGCC
ທ່ານ ໂນ ລິດາ ກ່າວວ່າ: ບົດບັນທຶກຄວາມເຂົ້າໃຈລະຫວ່າງ CGCC ແລະ ບຄຊ ຈະນຳມາຊຶ່ງຜົນປະໂຫຍດຮ່ວມກັນ ຜ່ານການຮ່ວມມືໃນການສ້າງຂີດຄວາມສາມາດ, ການແລກປ່ຽນຂໍ້ມູນ ແລະ ການປັບປຸງການດຳເນີນງານ. ນະວັດຕະກຳບໍ່ໄດ້ຖືກກຳນົດໂດຍຄວາມເກົ່າແກ່ຂອງອົງກອນ — ເຖິງແມ່ນວ່າ CGCC ຈະເລີ່ມດຳເນີນການກ່ອນ ບຄຊ, ແຕ່ກໍ່ອາດມີບາງດ້ານທີ່ ບຄຊ ເຮັດໄດ້ດີກວ່າ ແລະ ພວກເຮົາກໍ່ພ້ອມທີ່ຈະຮຽນຮູ້ ແລະ ປັບປຸງໄປພ້ອມກັນ.
ຂອບການຮ່ວມມື
ບົດບັນທຶກຄວາມເຂົ້າໃຈ ໄດ້ກຳນົດຂອບການຮ່ວມມືທາງດ້ານເຕັກນິກ ລະຫວ່າງ ບຄຊ ແລະ CGCC ໃນການພັດທະນາ ແລະ ຈັດຕັ້ງປະຕິບັດຮູບແບບການຄໍ້າປະກັນສິນເຊື່ອ ເພື່ອສະໜັບສະໜູນ ຈນກ. ການຮ່ວມມືນີ້ກວມເອົາ:
ການອອກແບບຮູບແບບການຄໍ້າປະກັນ
ການເງິນສີຂຽວ ແລະ ການຈັດປະເພດທຸລະກິດ (Green Taxonomy)
ການແລກປ່ຽນພະນັກງານ ແລະ ບົດຮຽນທີ່ດີທີ່ສຸດ
ຮູບແບບການຄໍ້າປະກັນທາງດ້ານການເງິນ ເພື່ອການປ່ຽນແປງສະພາບພູມອາກາດ
ກ່ຽວກັບ ບຄຊ
ບຄຊ ແມ່ນສະຖາບັນການເງິນຂອງລັດ ພາຍໃຕ້ການຄຸ້ມຄອງຂອງທະນາຄານແຫ່ງ ສປປ ລາວ, ດຳເນີນງານພາຍໃຕ້ການຊີ້ນຳທາງດ້ານເຕັກນິກຈາກກະຊວງ ອຄ ໂດຍມີກະຊວງການເງິນ ເປັນຜູ້ຖືຫຸ້ນ 100%. ໄດ້ຈົດທະບຽນສ້າງຕັ້ງໃນວັນທີ 5 ທັນວາ 2024 ແລະ ເປີດໂຕທຸລະກິດ ໃນວັນທີ 9 ເມສາ 2026.
ກ່ຽວກັບ CGCC
CGCC ແມ່ນລັດວິສາຫະກິດ ສ້າງຕັ້ງໂດຍດຳລັດ ເລກທີ 140 ANKR.BK ລົງວັນທີ 1 ກັນຍາ 2020 ຂອງລັດຖະບານຣາຊະອານາຈັກກໍາປູເຈຍ ພາຍໃຕ້ການຊີ້ນຳຂອງກະຊວງເສດຖະກິດ ແລະ ການເງິນ. ໃນທ້າຍເດືອນເມສາ 2026, CGCC ໄດ້ໃຫ້ການຄໍ້າປະກັນ 9,808 ບັນຊີ ຄິດເປັນມູນຄ່າທັງໝົດ 567.63 ລ້ານໂດລາສະຫະລັດ.