ອາຊຽນ ແລະ ສະຫະພາບເອີຣົບ ຈັດກອງປະຊຸມໂຕະມົນ ຫົວໜ້າອົງການຄຸ້ມຄອງການແຂ່ງຂັນທຸລະກິດ ຄັ້ງທຳອິດ ທີ່ ຟິລິປິນ

ກອງປະຊຸມໂຕະມົນລະຫວ່າງ ອາຊຽນ-ເອີຣົບ ກ່ຽວກັບວຽກງານການແຂ່ງຂັນທຸລະກິດ ໄດ້ໄຂຂຶ້ນຢ່າງເປັນທາງການ ທີ່ ເມືອງມະນີລາ, ປະເທດ ຟິລິປິນ ໃນວັນທີ 5 ພຶດສະພາ 2026 ໂດຍ ທ່ານ ສັນຕິສຸກ ພູນສະຫວັດ, ຫົວໜ້າກົມການຄ້າພາຍໃນ, ກະຊວງ ອຄ ສປປ ລາວ ແລະ ທັງເປັນປະທານ AHCA ເປັນປະທານຮ່ວມກັບ ທ່ານ Guillaume Loriot ຮອງຫົວໜ້າກົມ DG COMP ຂອງ ຄະນະກຳມາທິການເອີຣົບ.

ຫົວຂໍ້ການປຶກສາຫາລື

ກອງປະຊຸມໄດ້ສຸມໃສ່ບັນຫາທ້າທາຍຮ່ວມ ໃນສະພາບເສດຖະກິດທີ່ປ່ຽນແປງໄວ ລວມທັງ:

• ການຫັນເປັນດິຈິຕອນ ແລະ ການກະຈຸກຕົວຂອງຕະຫຼາດ

• ຄວາມຈຳເປັນໃນການພັດທະນາອົງການຄຸ້ມຄອງການແຂ່ງຂັນໃຫ້ມີປະສິດທິຜົນສູງ

• ຕະຫຼາດດິຈິຕອນທີ່ເປີດກວ້າງ ສຳລັບ ຈນກ

• ການຮ່ວມມືຂ້າມພາກພື້ນ ກ່ຽວຂ້ອງກັບພຶດຕິກຳຕ້ານການແຂ່ງຂັນຂ້າມແດນ

5 ຂົງເຂດການຮ່ວມມືໃນອະນາຄົດ

ທ່ານ ປະທານ AHCA ໄດ້ນຳສະເໜີ 5 ຂົງເຂດ ໃນຖານະຄຳເຫັນສ່ວນຕົວເບື້ອງຕົ້ນ (ຍັງບໍ່ໄດ້ຮັບການຕົກລົງຮ່ວມກັນໂດຍ ASEAN):

• ລົງເລິກການຮ່ວມມືດ້ານ ຕະຫຼາດດິຈິຕອນ, ແພລດຟອມ, ຂໍ້ມູນ ແລະ AI

• ການປະສານງານບັງຄັບໃຊ້ກົດໝາຍຂ້າມແດນ ໃນຄະດີຄວບລວມທຸລະກິດ, ການລວມກຸ່ມ ແລະ ການແບ່ງປັນຂໍ້ມູນ

• ການສະໜັບສະໜູນຈາກ EU ໃນການຈັດຕັ້ງປະຕິບັດສັນຍາຂອບວຽກດ້ານການແຂ່ງຂັນທຸລະກິດຂອງ ASEAN

• ການຮ່ວມມືດ້ານ ຄວາມຍືນຍົງ ແລະ ນະໂຍບາຍການແຂ່ງຂັນ

• ສ້າງກົນໄກເພື່ອເຮັດໃຫ້ກອງປະຊຸມໂຕະມົນ ASEAN-EU ເປັນທາງການຢ່າງເປັນປົກກະຕິ

ໃນການປິດກອງປະຊຸມ, ທ່ານ ສັນຕິສຸກ ພູນສະຫວັດ ໄດ້ຢ້ຳວ່າ ອາຊຽນ ມຸ່ງໝັ້ນທີ່ຈະເສີມສ້າງການຮ່ວມມືກັບ EU ໃນຂະນະທີ່ພາບລວມການແຂ່ງຂັນທຸລະກິດ ຂອງພາກພື້ນກຳລັງພັດທະນາ. Mr. Guillaume Loriot ໄດ້ຢືນຢັນການສະໜັບສະໜູນຢ່າງເຕັມທີ່ຕໍ່ການຮ່ວມມືກັບ ASEAN.