ສປປ ລາວ ເຂົ້າຮ່ວມກອງປະຊຸມສະພາ AEC ຄັ້ງທີ 27 ແລະ ກອງປະຊຸມສຸດຍອດອາຊຽນ ຄັ້ງທີ 48 ທີ່ ເຊບູ ຟີລິບປິນ
ທີ່ ເຊບູ, ປະເທດ ຟີລິບປິນ, ວັນທີ 7 ພຶດສະພາ 2026 — ທ່ານ ປອ ມະໂນທອງ ວົງໄຊ, ຮອງລັດຖະມົນຕີກະຊວງອຸດສາຫະກຳ ແລະ ການຄ້າ ຂອງ ສປປ ລາວ ໄດ້ນຳພາຄະນະຜູ້ແທນ ເຂົ້າຮ່ວມກອງປະຊຸມສະພາປະຊາຄົມເສດຖະກິດອາຊຽນ ຄັ້ງທີ 27 (AEC Council).
ຜົນຂອງກອງປະຊຸມ AEC Council ຄັ້ງທີ 27
ກອງປະຊຸມໄດ້ທົບທວນສະພາບເສດຖະກິດຂອງພາກພື້ນ ແລະ ໂລກ ພ້ອມທັງແລກປ່ຽນທັດສະນະກ່ຽວກັບສິ່ງທ້າທາຍ ໂດຍສະເພາະ ຕໍ່ການຄ້າ, ລາຄາພະລັງງານ, ຕ່ອງໂສ້ການສະໜອງ ແລະ ສະຖຽນລະພາບທາງເສດຖະກິດ. ບັນດາລັດຖະມົນຕີ ໄດ້ເນັ້ນຢ້ຳຄວາມສຳຄັນ ໃນການຮັກສາລະບົບການຄ້າຫຼາຍຝ່າຍ (WTO) ທີ່ເປີດກວ້າງ, ໂປ່ງໃສ ແລະ ອີງໃສ່ລະບຽບການ.
ກອງປະຊຸມຍັງໄດ້ຮັບຊາບຄວາມຄືບໜ້າຂອງ:
- ການຈັດຕັ້ງຜົນສຳເລັດດ້ານເສດຖະກິດບຸລິມະສິດ ປະຈຳປີ 2026 ພາຍໃຕ້ການເປັນປະທານອາຊຽນຂອງຟີລິບປິນ
- ການຈັດຕັ້ງແຜນແມ່ບົດ AEC 2025 ແລະ ການຜັນຂະຫຍາຍແຜນຍຸດທະສາດ AEC 2026-2030
- ການສົ່ງເສີມຄວາມຍືນຍົງ, ການຫັນເປັນດິຈິຕອນ ແລະ ການເຊື່ອມໂຍງພາກພື້ນ
- ຄວາມຄືບໜ້າການເຈລະຈາຂໍ້ຕົກລົງ DEFA ແລະ ການບູລະນາການຂອງຕີມໍ-ເລສເຕ
ທ່າທີຂອງ ສປປ ລາວ
ສປປ ລາວ ໄດ້ສະໜັບສະໜູນການເພີ່ມທະວີການເຊື່ອມໂຍງດ້ານເສດຖະກິດອາຊຽນ ແລະ ເນັ້ນຄວາມສຳຄັນຂອງການຮ່ວມມືຂ້າມຜ່ານເສົາຄໍ້າເສດຖະກິດ ພ້ອມທັງຢືນຢັນຄວາມພ້ອມ ໃນການສືບຕໍ່ຮ່ວມມືກັບບັນດາປະເທດສະມາຊິກ ເພື່ອສົ່ງເສີມການເຕີບໂຕທາງເສດຖະກິດຢ່າງຍືນຍົງ ແລະ ຮອບດ້ານ.
ກອງປະຊຸມ AMM-AEM ແລະ ສຸດຍອດອາຊຽນ ຄັ້ງທີ 48
ຄະນະຜູ້ແທນ ກະຊວງ ອຄ ຍັງໄດ້ເຂົ້າຮ່ວມກອງປະຊຸມ AMM-AEM ທີ່ຫາລືລົງເລິກກ່ຽວກັບ ສະພາບທາງພູມລັດສາດ ໂດຍສະເພາະຜົນກະທົບຈາກຄວາມຕຶງຄຽດ ຢູ່ ຕາເວັນອອກກາງ ຕໍ່ລາຄາພະລັງງານ, ຕ່ອງໂສ້ການສະໜອງ ແລະ ສະຖຽນລະພາບດ້ານເສດຖະກິດ.
ນອກຈາກນັ້ນ ຄະນະໄດ້ຕິດຕາມ ທ່ານ ສອນໄຊ ສີພັນດອນ, ນາຍົກລັດຖະມົນຕີ ສປປ ລາວ ເຂົ້າຮ່ວມກອງປະຊຸມສຸດຍອດອາຊຽນ ຄັ້ງທີ 48 ແລະ ການພົບປະສອງຝ່າຍ ກັບຜູ້ນຳຂອງຟີລິບປິນ, CLV, ມາເລເຊຍ ແລະ ຫວຽດນາມ ໂດຍເນັ້ນໃສ່ການຮັດແໜ້ນການຮ່ວມມືດ້ານເສດຖະກິດ, ການຄ້າ, ການລົງທຶນ ແລະ ການເຊື່ອມໂຍງພາກພື້ນ.
ການເຂົ້າຮ່ວມດັ່ງກ່າວ ສະທ້ອນໃຫ້ເຫັນຄວາມມຸ່ງໝັ້ນຂອງ ສປປ ລາວ ໃນການປະກອບສ່ວນຢ່າງຕັ້ງໜ້າເຂົ້າໃນການພັດທະນາພາກພື້ນອາຊຽນ ແລະ ສືບຕໍ່ສົ່ງເສີມສະພາບແວດລ້ອມທີ່ເອື້ອອຳນວຍຕໍ່ການພັດທະນາຢ່າງຍືນຍົງ ແລະ ຄວາມຈະເລີນຮ່ວມກັນ.