ພິທີປະກາດການແຕ່ງຕັ້ງພະນັກງານນໍາພາ-ຄຸ້ມຄອງ ກະຊວງອຸດສາຫະກຳ ແລະ ການຄ້າ ວັນທີ 09 ຕຸລາ 2026

ໃນວັນທີ 09 ຕຸລາ 2026, ທີ່ ລັດວິສາຫະກິດໄຟຟ້າລາວ, ກະຊວງອຸດສາຫະກຳ ແລະ ການຄ້າ (ອຄ) ໄດ້ຈັດພິທີປະກາດການຈັດຕັ້ງ ພະນັກງານນໍາພາ-ຄຸ້ມຄອງ ໂດຍການເປັນປະທານຂອງ ສະຫາຍ ມະໄລທອງ ກົມມະສິດ, ກຳມະການສູນກາງພັກ, ເລຂາຄະນະບໍລິຫານງານພັກ, ລັດຖະມົນຕີ ກະຊວງອຸດສາຫະກຳ ແລະ ການຄ້າ ໂດຍມີ ຕາງໜ້າ ຈາກຄະນະຈັດຕັ້ງສູນກາງພັກ, ຄະນະພັກ-ຄະນະນໍາກະຊວງ, ຄະນະກົມ, ຄະນະອຳນວຍການວິສາຫະກິດທີ່ຂື້ນກັບ, ສະພາການຄ້າ ແລະ ອຸດສາຫະກຳ ແຫ່ງຊາດລາວ ພ້ອມດ້ວຍພະນັກງານຫຼັກແຫຼ່ງ ເຂົ້າຮ່ວມ.

ໃນພິທີດັ່ງກ່າວ ສະຫາຍ ນາງ ກັນຍາ ແສງແກ້ວວົງພະຈັນ ຮອງຫົວໜ້າກົມຄຸ້ມຄອງພະນັກງານ ຄະນະຈັດຕັ້ງສູນກາງພັກ ໄດ້ໃຫ້ກ່ຽວຂື້ນຜ່ານ ມະຕິຕົກລົງ ແລະ ດຳລັດວ່າດ້ວຍການແຕ່ງຕັ້ງ ດັ່ງນີ້:

1.    ປະກາດແຕ່ງຕັ້ງ ສະຫາຍ ຈັນທະເລດ ວໍລະບຸດ , ຜູ້ອໍານວຍການລັດວິສາຫະກິດພັດທະນາແຮ່ທາດລາວ ເປັນ ຫົວໜ້າກົມກວດກາ ທັງບົ່ງຕົວແຕ່ງຕັ້ງເປັນ ຮອງປະທານຄະນະກວດກາພັກກະຊວງ .

2.    ປະກາດບົ່ງຕົວແຕ່ງຕັ້ງ ສະຫາຍ ຕຸລາໄຊ ພັນທະວົງ , ຮອງຫົວໜ້າກົມຈັດຕັ້ງ ແລະ ເລຂາຄະນະບໍລິຫານງານຊາວໜຸ່ມກະຊວງ ເປັນ ກຳມະການຄະນະບໍລິຫານງານພັກກະຊວງ.

ໃນໂອກາດນີ້, ສະຫາຍ ປະທານ ໄດ້ມີຄຳເຫັນໂອ້ລົມ ໂດຍເນັ້ນ 5 ບັນຫາຈຸດສຸມ ເພື່ອເປັນທິດທາງໃນການຈັດຕັ້ງປະຕິບັດໜ້າທີ່ການເມືອງ ຄື:

1. ເອົາໃຈໃສ່ສຶກສາອົບຮົມແນວຄິດເປັນກົກ, ສ້າງພະນັກງານກວດກາໃຫ້ມີຫຼັກໝັ້ນການເມືອງທີ່ໜັກແໜ້ນ, ບໍລິສຸດຜຸດຜ່ອງ ແລະ ສະກັດກັ້ນ ປະກົດການຫຍໍ້ທໍ້, "4 ລັດທິ ແລະ 5 ພະຍາດ" ພາຍໃນກົງຈັກພັກ-ລັດ.

2. ປະຕິບັດຫຼັກການລວມສູນປະຊາທິປະໄຕ, ຫັນປ່ຽນວິທີເຮັດວຽກໂດຍການ "ຫັນລົງສູ່ຮາກຖານ ຕິດແທດຕົວຈິງ" ແລະ ເນັ້ນການປ້ອງກັນດີກວ່າແກ້ໄຂ.

3. ເພີ່ມທະວີການກວດກາ ແລະ ຕິດຕາມການຄຸ້ມຄອງລາຄາສິນຄ້າ, ອັດຕາເງິນເຟີ້, ການນໍາເຂົ້າ-ສົ່ງອອກ, ຕ້ານການສໍ້ລາດບັງຫຼວງ ແລະ ສະກັດກັ້ນການຮົ່ວໄຫຼຂອງລາຍຮັບ.

4. ນໍາໃຊ້ເຕັກໂນໂລຊີ ແລະ ລະບົບຖານຂໍ້ມູນ (Data) ເຂົ້າໃນວຽກງານກວດກາ ແລະ ບໍລິການອອນລາຍ ເພື່ອຫຼຸດຜ່ອນຂັ້ນຕອນ, ສ້າງຄວາມໂປ່ງໃສ ແລະ ສາມາດກວດສອບໄດ້.

5. ເພີ່ມທະວີຄວາມສາມັກຄີເປັນເອກະພາບ, ເປັນສູນລວມແຫ່ງຄວາມສາມັກຄີ ບົນພື້ນຖານກົດລະບຽບຂອງພັກ ແລະ ກົດໝາຍຂອງລັດ.