ກົມການຄ້າພາຍໃນ ກະຊວງ ອຸດສາຫະກຳ ແລະ ການຄ້າ ໄດ້ຈັດກອງປະຊຸມຄະນະກຳມະການຄວບຄຸມການແຂ່ງຂັນທາງທຸລະກິດ (ຄຂທ) ແລະ ຈຸດປະສານງານວຽກງານແຂ່ງຂັນທາງທຸລະກິດ ໃນວັນທີ 17 ເດືອນ ມິຖຸນາ 2022, ທີ່ ໂຮງແຮມ ລາວພລາຊາ, ນະຄອນຫຼວງວຽງຈັນ ໂດຍການສະໜັບສະໜູນຈາກ ອົງການ GIZ-COMPETE ລັດຖະບານເຢຍລະມັນ, ກອງປະຊຸມດັ່ງກ່າວໄດ້ຮັບກຽດເປັນປະທານໂດຍ ທ່ານ ບຸນເຖິງ ດວງສະຫວັນ, ຮອງລັດຖະມົນຕີ ກະຊວງ ອຸດສາຫະກໍາ ແລະ ການຄ້າ ທັງເປັນປະທານຄະນະກໍາມະການຄວບຄຸມການແຂ່ງຂັນທາງທຸລະກິດ ຊຶ່ງມີຜູ້ເຂົ້າຮ່ວມແມ່ນ ຄະນະກຳມະການຄວບຄຸມການແຂ່ງຂັນທາງທຸລະກິດ, ຈຸດປະສານງານຈາກຂະແໜງການທີ່ກ່ຽວຂ້ອງ, ທ່ານ Frank Tibitanzl (ຫົວໜ້າໂຄງການ GIZ-COMPETE), ພະນັກງານຈາກພະແນກຄຸ້ມຄອງການແຂ່ງຂັນທາງທຸລະກິດ ແລະ ພະນັກງານຈາກພະແນກທີ່ກ່ຽວຂ້ອງກົມການຄ້າພາຍໃນ.
ຈຸດປະສົງຂອງກອງປະຊຸມໃນຄັ້ງນີ້ ແມ່ນ ເພື່ອເປັນການພົບປະຂອງຄະນະກຳມະການຄວບຄຸມການແຂ່ງຂັນທາງທຸລະກິດ ແລະ ຈຸດປະສານງານ ເພື່ອຮັບຟັງການລາຍງານ, ທົບທວນ ແລະ ປະເມີນຄືນການຈັດຕັ້ງປະຕິບັດວຽກງານແຂ່ງຂັນທາງທຸລະກິດ ພ້ອມກັນປຶກສາຫາລື, ແລກປ່ຽນຄຳຄິດເຫັນ ແລະ ສ້າງຄວາມເຂົ້າໃຈກ່ຽວກັບສິດ-ໜ້າທີ່ຂອງ ຄຂທ ແລະ ວຽກງານທີ່ປິ່ນອ້ອມ ເປັນຕົ້ນ: ບົດລາຍງານການຈັດຕັ້ງປະຕິບັດວຽກງານແຂ່ງຂັນທາງທຸລະກິດໃນໄລຍະຜ່ານມາ; ເຜີຍແຜ່ເນື້ອໃນກົດໝາຍວ່າດ້ວຍການແຂ່ງຂັນທາງທຸລະກິດ; ຂໍ້ຕົກລົງວ່າດ້ວຍສິດ ແລະ ໜ້າທີ່ຂອງ ຄຂທ; ຂໍ້ຕົກລົງວ່າດ້ວຍເຈົ້າໜ້າທີ່ກວດກາການແຂ່ງຂັນທາງທຸລະກິດ; ບົດສຶກສາຕະຫລາດຊີ້ນໃນລາວ; ບົດຮຽນການສ້າງແຜນນະໂຍບາຍ ວຽກງານການແຂ່ງຂັນທາງທຸລະກິດຂອງສາກົນ; ພັນທະຂອງລາວ ແລະ ການເຄື່ອນໄຫວວຽກງານແຂ່ງຂັນໃນພາກພື້ນ ແລະ ສາກົນ.
ໃນຕອນທ້າຍຂອງກອງປະຊຸມ ປະທານຍັງໄດ້ຮຽກຮ້ອງໃຫ້ຜູ້ເຂົ້າຮ່ວມກອງປະຊຸມໃຫ້ເອົາໃຈໃສ່ຄົ້ນຄ້ວາ, ຕິດຕາມ, ປະກອບຄຳເຫັນ, ກໍາໄດ້, ສາມາດເຂົ້າໃຈເນື້ອໃນທີ່ສໍາຄັນ ແລະ ຄວາມຮູ້ດ້ານວິຊາການ ຊຶ່ງສາມາດນໍາເອົາບັນດາເນື້ອໃນທີ່ໄດ້ຈາກກອງປະຊຸມເພື່ອນໍາໃຊ້ເຂົ້າໃນວຽກງານການແຂ່ງຂັນທາງທຸລະກິດທີ່ໄດ້ຮັບມອບໝາຍ ເຮັດໃຫ້ການຈັດຕັ້ງປະຕິບັດວຽກງານໃຫ້ມີການຂະຫຍາຍຕົວ ແລະ ມີປະສິດທິຜົນຢູ່ໃນການຄຸ້ມຄອງໃນຂະແໜງການຂອງຕົນ ທັງນີ້ກໍ່ເພື່ອຜົນປະໂຫຍດລວມຂອງປະເທດຊາດ ແລະ ປະຊາຊົນລາວທຸກຄົນໃນການສົ່ງເສີມການແຂ່ງຂັນທີ່ເປັນທໍາ ພາຍໃຕ້ກົດໝາຍ ແລະ ລະບຽບການ.
ຂ່າວ: ໄພວັນ ໂຄດວັນທາ
ພາບ: ໄພວັນ ໂຄດວັນທາ
