ໃນວັນທີ 14 ທັນວາ 2023 ທີ່ ໂຮງແຮມແລນມາກ, ນະຄອນຫຼວງວຽງຈັນ ໄດ້ຈັດງານສ້າງຄວາມເຂັ້ມແຂງທາງດ້ານເສດຖະກິດໃຫ້ແກ່ແມ່ຍິງ ຄັ້ງທີ 2 ໃນຫົວຂໍ້: “ບົດບາດຂອງເພດຊາຍໃນການສົ່ງເສີມຄວາມສະເໝີພາບຍິງ-ຊາຍ ແລະ ຢຸດຕິການໃຊ້ຄວາມຮຸນແຮງຕໍ່ແມ່ຍິງ” ພາຍໃຕ້ການສະໜັບສະໜູນຈາກໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າ ຂອງ ສປປ ລາວ, ສະມາຄົມນັກທຸລະກິດຍິງ ແລະ ບັນດາວິທະຍາກອນ ໂດຍໃຫ້ກຽດເປັນປະທານຂອງທ່ານ ປອ ມະໂນທອງ ວົງໄຊ ຮອງລັດຖະມົນຕີກະຊວງອຸດສາຫະກຳ ແລະ ການຄ້າ ແລະ ປະທານຮ່ວມໂດຍທ່ານ ນາງ ຈັນທະຈອນ ວົງໄຊ ປະທານສະມາຄົມນັກທຸລະກິດຍິງລາວ ພ້ອມດວ້ຍແຂກຈາກຂະແໜງທຸລະກິດລາວ, ສະມາຄົມນັກທຸລະກິດຍິງ, ຜູ້ໄດ້ຮັບທຶນສົມທົບຈາກໂຄງການ LCT, ສະຖາບັນການສຶກສາ, ຜູ້ໃຫ້ທຶນ, ບັນດາກະຊວງກ່ຽວຂ້ອງ ແລະ ອົງການຈັດຕັ້ງສາກົນ ປະມານ 250 ກໍ່ເຂົ້າຮ່ວມ ເຊິ່ງຈຸດປະສົງຂອງງານດ່ັງກ່າວ ແມ່ນເພື່ອສະເຫຼີມສະຫຼອງວັນຕ້ານການໃຊ້ຄວາມຮຸນແຮງຕໍ່ແມ່ຍິງ 25 ພະຈິກ ຜ່ານການສົນທະນາແລກປ່ຽນ ໂດຍເນັ້ນໃຫ້ເຫັນເຖິງບົດບາດເພດ ໃນການສົ່ງເສີມຄວາມສະເໜີພາບຍິງ-ຊາຍ, ສ້າງຄວາມເຂັ້ມແຂງໃຫ້ແກ່ແມ່ຍິງໃນຂະແໜງການຄ້າ ແລະ ການມີສ່ວນຮ່ວມຂອງເພດຊາຍໃນການຢຸດຕິການໃຊ້ຄວາມຮູນແຮງຕໍ່ແມ່ຍິງ ພ້ອມດຽວກັນນັ້ນກໍ່ເພື່ອເຮັດໃຫ້ເກີດມີການປ່ຽນແປງໃນທົ່ວສັງຄົມ ແລະ ເພື່ອບັນລຸເປົ້າໝາຍພັດທະນາແບບຍືນຍົງ, ກ່ອນອື່ນໝົດ ພວກເຮົາຕ້ອງຮັບປະກັນການມີສ່ວນຮ່ວມ ແລະ ການຕັດສິນໃຈຂອງແມ່ຍິງຢ່າງເຕັມສ່ວນໃນການເຄື່ອນໄຫວທຸລະກິດ ແລະ ເສດຖະກິດ.
ທ່ານ ປອ ມະໂນທອງ ວົງໄຊ ຮອງລັດຖະມົນຕີກະຊວງອຸດສາຫະກຳ ແລະ ການຄ້າ ຍັງໄດ້ກ່າວໃນງານດັ່ງກ່າວວ່າ: ເຖິງວ່າ ໃນຊຸມປີມໍ່ໆມານີ້, ເພື່ອຮັບປະກັນ ຄວາມສະເໝີພາບຍິງ-ຊາຍ, ພວກເຮົາໄດ້ສ້າງນິຕິກຳ ແລະ ລະບຽບ ກົດໝາຍ ທີ່ຈຳເປັນ ແລະ ເປັນພື້ນຖານ, ແຕ່ເຖິງຢ່າງໃດກໍ່ຕາມ, ໃນຂະນະທີ່ກົດຫມາຍ ແລະ ນະໂຍບາຍເຫຼົ່ານັ້ນ ລ້ວນແລ້ວແຕ່ ມີເນື້ອໃນ ທີ່ເປັນກາງ ຄວາມສະໝີພາບທາງເພດ, ທາງເພດ, ແຕ່ໃນທາງປະຕິບັດຕົວຈິງພວກເຮົາຍັງພົບເຫັນ ຜົນໄດ້ຮັບທີ່ແຕກຕ່າງກັນລະຫວ່າງຜູ້ຊາຍ ແລະ ແມ່ຍິງ ຈາກການປະຕິບັດລະບຽບກົດໝາຍ ແລະ ນະໂຍບາຍສົ່ງເສີມຕ່າງໆ ທີ່ມີຢູ່.
ແລະ ໃນຊຸມປີຜ່ານມາ, ພວກເຮົາໄດ້ຮັບຮອງເອົາຫຼາຍຍຸດທະສາດ ເພື່ອສົ່ງເສີມຄວາມກ້າວໜ້າຂອງແມ່ຍິງ ແລະ ສົ່ງເສີມຄວາມສະເໝີພາບລະຫວ່າງຍິງ-ຊາຍ. ຫວ່າງບໍ່ດົນມານີ້, ພວກເຮົາໄດ້ຮັບຮອງ ຍຸດທະສາດແຫ່ງຊາດ ຄັ້ງທີ 2 ເພື່ອຄວາມກ້າວໜ້າຂອງແມ່ຍິງ ແລະ ຍຸດທະສາດແຫ່ງຊາດກ່ຽວກັບຄວາມສະເໝີພາບຍິງ-ຊາຍ ສຳລັບປີ 2016-2025. ນອກຈາກນັ້ນ, ລະບົບການຈົດທະບຽນວິສາຫະກິດແບບໃໝ່ທີ່ໄດ້ນໍາໃຊ້ໃນປີ 2011 ໄດ້ຊ່ວຍໃຫ້ແມ່ຍິງຫຼາຍຄົນໃນການຈົດທະບຽນ ແລະ ສ້າງຕັ້ງທຸລະກິດຂອງຕົນຢ່າງເປັນທາງການ, ເຊິ່ງໄດ້ເປັນການເປີດການເຂົ້າເຖິງການບໍລິການ ແລະ ຕະຫຼາດ. ເຫຼົ່ານີ້ແມ່ນເອກະສານນະໂຍບາຍທີ່ສຳຄັນທັງໝົດທີ່ເປັນພື້ນຖານໃນການສ້າງຄວາມເຂັ້ມແຂງໃຫ້ແກ່ແມ່ຍິງ ແລະ ເດັກຍິງ ໂດຍຜ່ານການສ້າງສະພາບແວດລ້ອມ ແລະ ເງື່ອນໄຂທີ່ເອື້ອອຳນວຍ.
ເຖິງຢ່າງໃດກໍ່ຕາມ, ພວກເຮົາຍັງມີຫຼາຍວຽກທີ່ຈະຕ້ອງໄດ້ສືບຕໍ່ ເພື່ອຮັບປະກັນໃນການຈັດຕັ້ງປະຕິບັດກົດໝາຍ, ລະບຽບການ ແລະ ນະໂຍບາຍ ທີ່ມີຢູ່ຢ່າງເໝາະສົມ ເພື່ອຮັບປະກັນໃຫ້ແມ່ຍິງ ແລະ ເດັກຍິງໃນ ສປປ ລາວ ໄດ້ຮັບສິດ ແລະ ຜົນປະໂຫຍດຢ່າງເຕັມສ່ວນ.
ສິ່ງທ້າທາຍ ແລະ ອຸປະສັກອື່ນໆ ເຊັ່ນ: ມາດຕະຖານ ແລະ ຄວາມຮັບຜິດຊອບທາງສັງຄົມ, ອາດຈະເຮັດໃຫ້ແມ່ຍິງບໍ່ສາມາດມີສ່ວນຮ່ວມໃນການບໍລິຫານບໍລິສັດ ແລະ ການເປັນຜູ້ປະກອບການໄດ້. ຜົນການສຶກສາສະແດງໃຫ້ເຫັນວ່າ ຄວາມແຕກຕ່າງໃນດ້ານການສຶກສາ, ບັນຫາທາງພູມສັນຖານ ແລະ ຄວາມຫ່າງໄກສອກຫຼີກ, ຊົນເຜົ່າ, ແລະ ປະເພນີທາງດ້ານວັດທະນະທໍາ ໄດ້ເປັນສາຍເຫດໃຫ້ເກີດມີຄວາມແຕກຕ່າງ ໃນຜົນໄດ້ຮັບທາງດ້ານສັງຄົມ, ທາງດ້ານການເມືອງ ແລະ ເສດຖະກິດ. ປະເພນີ ທາງດ້ານວັດທະນະທໍາແມ່ນແຕກຕ່າງກັນໄປໃນແຕ່ລະຊົນເຜົ່າໃນ ສປປ ລາວ ແລະ ຄວາມແຕກຕ່າງ ເຫຼົ່ານີ້ ອາດຈະນໍາໄປສູ່ຄວາມແຕກຕ່າງໃນຜົນໄດ້ຮັບທາງດ້ານເສດຖະກິດສໍາລັບແມ່ຍິງເຊັ່ນດຽວກັນ.
ສຸດທ້າຍນີ້, ທ່ານຍັງໄດ້ກ່າວຕື່ມວ່າ: ຂ້າພະເຈົ້າມີຄວາມມຸ້ງໝັ້ນ ແລະ ຕັ້ງໃຈ ຢ່າງແຮງກ້າ ໃນການສ້າງຄວາມເຂັ້ມແຂງໃຫ້ແກ່ແມ່ຍິງ ແລະ ຄວາມສະເໝີພາບທາງເພດ, ຂ້າພະເຈົ້າຮູ້ສຶກເສຍໃຈທີ່ ໃນປັດຈຸບັນ ແມ່ຍິງຍັງມີຂໍ້ຈຳກັດ ທີ່ຈະນຳໃຊ້ທ່າແຮງ ຫຼື ສັກກະຍະພາບຂອງຕົນຢ່າງເຕັມສ່ວນ, ແຕ່ໃນຂະນະດຽວກັນ ຂ້າພະເຈົ້າເອງ ກໍມີແຮງບັນດານໃຈຢ່າງສູງ ທີ່ຈະສົ່ງເສີມ ແລະ ປະກອບສ່ວນເຂົ້າໃນການສ້າງຄວາມເຂັ້ມແຂງໃຫ້ແກ່ແມ່ຍິງໃນທຸກດ້ານ ທັງໃນດ້ານວິຊາຊີບ ແລະ ສ່ວນບຸກຄົນ. ຂ້າພະເຈົ້າຫວັງຢ່າງຍິງວ່າ ທຸກທ່ານທີ່ເຂົ້າຮ່ວມໃນມື້ນີ້ ຈະຮູ້ສຶກ ແລະ ປະຕິບັດແບບດຽວກັນ, ບໍ່ດັ່ງນັ້ນ, ພວກເຮົາກໍ່ຈະບໍ່ເຫັນ ການປ່ຽນແປງທີ່ສຳຄັນ ແລະ ມີຄວາມໝາຍນີ້ ໃຫ້ປະກົດຜົນເປັນຈິງໄດ້.
ບໍ່ມີສັງຄົມໃດສາມາດພັດທະນາ ແລະ ຈະເລີນຮຸ່ງເຮືອງໄດ້ ທັງທາງດ້ານເສດຖະກິດ, ການເມືອງ, ຫຼື ດ້ານສັງຄົມ ໃນເມື່ອເຄິ່ງຫນຶ່ງຂອງປະຊາກອນຂອງຕົນ ເຊັ່ນ: ແມ່ຍິງບໍ່ສາມາດບັນລຸສັກກະຍະພາບ ແລະ ທ່າແຮງຂອງເຂົາເຈົ້າຢ່າງເຕັມສ່ວນ.
ຄວາມບໍ່ສະເໝີພາບລະຫວ່າງຍິງ-ຊາຍບໍ່ສາມາດ ແລະ ບໍ່ຄວນຖືກແກ້ໄຂໂດຍແມ່ຍິງ ແລະ ເດັກຍິງເທົ່ານັ້ນ. ແຕ່ສິ່ງສໍາຄັນ, ຜູ້ຊາຍ ແລະ ເດັກຊາຍ ແມ່ນມີບົດບາດສຳຄັນໃນການລົບລ້າງຄວາມບໍ່ສະ ເໝີພາບລະຫວ່າງຍິງ-ຊາຍ ໂດຍການທ້າທາຍ ແລະ ທຳລາຍລະບົບ ແລະ ພຶດຕິກຳຂອງເພດຊາຍ ທີ່ເຮັດໃຫ້ເກີດມີການຈຳແນກທາງເພດ ແລະ ຄວາມຮຸນແຮງຕໍ່ແມ່ຍິງ ແລະ ເດັກຍິງ ຊຶ່ງລວມທັງການຮັບປະກັນຄວາມສົມດູນຂອງອໍານາດ ແລະ ການເຄົາລົບຢ່າງເຕັມສ່ວນ ແລະ ເທົ່າທຽມກັນໃນການພົວພັນແບບສ່ວນຕົວ ແລະ ໃນສະຖານທີ່ເຮັດວຽກ.
ມັນເຖິງເວລາແລ້ວ ທີ່ພວກເຮົາ ຕ້ອງໄດ້ມີການປ່ຽນແປງທີ່ໃຫຍ່ຫຼວງ ດ້ານທັດສະນະຄະຕິ, ແນວຄິດ, ແລະ ຈິດໃຈຂອງພວກເຮົາຕໍ່ແມ່ຍິງ ແລະ ເດັກຍິງ.
- ພວກທ່ານແມ່ນສຸດຍອດ! ສຸດທີ່ພາກພູມໃຈ! ພວກທ່ານເປັນກຳລັງແຮງຂອງຊາດ; ເປັນສ່ວນສໍາຄັນໃນການປະກອບສ່ວນເຂົ້າໃນການພັດທະນາ ແລະ ສ້າງສາປະເທດຊາດ ເຊີ່ງສາມາດເວົ້້າໄດ້ວ່າພວກທ່ານເປັນອະນາຄົດຂອງຊາດ;
- ໃນຖານະເປັນແມ່ຍິງ, ພວກທ່ານ ແລະ ພວກເຮົາ ສາມາດເຮັດທຸກສິ່ງທຸກຢ່າງທີ່ພວກເຮົາຕັ້ງໃຈໄວ້ຄືກັນ.
ພ້ອມດຽວກັນນັ້ນ, ທ່ານ ນາງ ຈັນທະຈອນ ວົງໄຊ, ປະທານສະມາຄົມນັກທຸລະກິດຍິງ ກໍ່ຍັງໄດ້ກ່າວມີຄຳເຫັນບາງຈຸດ:
- ການສ້າງຄວາມເຂັ້ມແຂງທາງດ້ານເສດຖະກິດໃຫ້ແກ່ແມ່ຍິງ (WEE) ແມ່ນຜົນໄດ້ຮັບທີ່ສໍາຄັນ ແລະ ມີທ່າແຮງທີ່ຈະເສີມຂະຫຍາຍການເຕີບໂຕທາງດ້ານເສດຖະກິດ ແລະ ຜົນໄດ້ຮັບຂອງການພັດທະນາທີ່ກວ້າງຂວາງສໍາລັບແມ່ຍິງ, ຄອບຄົວ ແລະ ສັງຄົມຂອງເຂົາເຈົ້າ.
- ເຖິງແນວໃດກໍ່ຕາມ, ຍຸດທະສາດຂອງການສ້າງຄວາມເຂັ້ມແຂງທາງດ້ານເສດຖະກິດໃຫ້ແກ່ແມ່ຍິງ-WEE ຈໍານວນຫຼາຍ ແມ່ນບໍ່ໄດ້ລະບຸເຖິງສາເຫດຕົ້ນຕໍຂອງຄວາມບໍ່ສະ ເໝີພາບທີ່ປະກົດຂຶ້ນ. ປະຈຸບັນພວກເຮົາໄດ້ມີຄວາມຮູ້ເພີ່ມຂຶ້ນກ່ຽວກັບວິທີການສະຫນັບສະຫນູນບັນຫາດັ່ງກ່າວໃນສະພາບການທີ່ຫຼາກຫຼາຍ ແລະ ສໍາລັບກຸ່ມແມ່ຍິງທີ່ແຕກຕ່າງກັນ. ພວກເຮົາຄວນເນັ້ນໃສ່ການເຂົ້າເຖິງຄຸນນະພາບ, ວຽກງານທີ່ໄດ້ຮັບຄ່າຈ້າງທີ່ເໝາະສົມ, ສິດໃນການຄຸ້ມຄອງຊັບສິນ ແລະ ການເຂົ້າເຖິງແຫຼ່ງທຶນ, ການປົກປ້ອງທາງສັງຄົມ, ການສຶກສາ, ການພັດທະນາສີມືແຮງງານ, ແລະ ການຝຶກອົບຮົມເປັນຂົງເຂດຈຸດສຸມທີ່ສໍາຄັນ.
- ຄວາມເປັນເອກະພາບ ກ່ຽວກັບການປະຕິບັດທີ່ດີສໍາລັບການສະຫນັບສະໜູນການສ້າງຄວາມເຂັ້ນມແຂງໃຫ້ແກ່ແມ່ຍິງ ຮຽກຮ້ອງໃຫ້ມີການລົງທຶນໃນລະດັບລະບົບ ເພື່ອແກ້ໄຂສາເຫດຕົ້ນຕໍຂອງຄວາມສະເໝີພາບຍິງຊາຍ. ສິ່ງນີ້ກ່ຽວຂ້ອງກັບການສົ່ງເສີມບັນດາມາດຕະການທີ່ສະເໝີພາບ; ຮັບປະກັນຄວາມມັກ ແລະ ບຸລິມະສິດຂອງແມ່ຍິງມີສ່ວນຮ່ວມໃນການວາງແຜນ ແລະ ຕິດຕາມກວດກາ; ການໃຫ້ສິດທິພິເສດແກ່ຄວາມຕ້ອງການຂອງແມ່ຍິງທີ່ປະເຊີນກັບສິ່ງທ້າທາຍລວມ; ສະໜັບສະໜູນການເຄື່ອນໄຫວຂອງແມ່ຍິງ ແລະ ເພດຍິງ.
ທ້າຍສຸດນີ້, ທ່ານຍັງໄດ້ກ່າວຂອບໃຈມາຍັງນັກວິທະຍາກອນ ແລະ ຜູ້ບັນຍາຍ ສໍາລັບການປະກອບສ່ວນຢ່າງຕັ້ງໜ້າ ແລະ ເປັນປະໂຫຍດຫລາຍ, ປະທານຮ່ວມຂອງຂ້າພະເຈົ້າ ຕໍ່ການສະໜັບສະໜູນໃນການອໍານວຍຄວາມສະດວກໃຫ້ແກ່ການສົນທະນາໃນມື້ນີ້ ແລະ ຂ້າພະເຈົ້າຂໍຂອບໃຈມາຍັງຜູ້ເຂົ້າຮ່ວມທັງ ໝົດສໍາລັບການມີສ່ວນຮ່ວມຢ່າງຕັ້ງໜ້າ.
ຂ່າວ: ເພັດປະກາຍ ສີສົມບູນ
ພາບ: ພະແນກຄຸ້ມຄອງການຈັດຕັ້ງປະຕິບັດຊ່ວບເຫຼືອຂອງຕ່າງປະເທດ
