ກອງປະຊຸມພົບປະ ແລະ ປຶກສາຫາລືວຽກງານ ລະຫວ່າງ ກະຊວງກະສິກໍາ ແລະ ປ່າໄມ້ ແລະ ກະຊວງອຸດສາຫະກໍາ ແລະ ການຄ້າ, ໄດ້ຈັດຂຶ້ນໃນວັນທີ 14 ມິຖຸນາ 2023, ທີ່ກະຊວງກະສິກໍາ ແລະ ປ່າໄມ້.

   ໂດຍການເປັນປະທານຮ່ວມຂອງ ທ່ານ ປອ ເພັດ ພົມພີພັກ ລັດຖະມົນຕີກະຊວງກະສິກໍາ ແລະ ປ່າໄມ້, ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກໍາ ແລະ ການຄ້າ. ຊຶ່ງມີ ທ່ານ ກິແກ້ວ ສິງນາວົງ ຮອງລັດຖະມົນຕີກະຊວງກະສິກໍາ ແລະ ປ່າໄມ້, ທ່ານຮອງລັດຖະມົນຕີກະຊວງອຸດສາຫະກໍາ ແລະ ການຄ້າ, ທ່ານຫົວໜ້າ-ຮອງຫົວໜ້າຫ້ອງການ, ກົມ, ທ່ານຫົວໜ້າ-ຮອງຫົວໜ້າພະແນກ ຂອງທັງສອງກະຊວງ ເຂົ້າຮ່ວມທັງໝົດ 39 ທ່ານ, ຍິງ 07 ທ່ານ.

     ຈຸດປະສົງຂອງກອງປະຊຸມໃນຄັ້ງນີ້ ເພື່ອພົບປະ ແລະ ປຶກສາຫາລື ກ່ຽວກັບ ວຽກ ງານການສົ່ງເສີມການຜະລິດກະສິກຳ ແລະ ປ່າໄມ້ ເພື່ອຊົມໃຊ້ພາຍໃນ ແລະ ເປັນສິນ ຄ້າສົ່ງອອກ ແລະ ການຄຸ້ມຄອງລາຄາສິນຄ້າກະສິກຳ ແລະ ປ່າໄມ້ ແລະ ການຄຸ້ມ ຄອງ ແລະ ສົ່ງເສີມການຄ້າ ຜະລິດຕະພັນກະສິກຳ ແລະ ປ່າໄມ້;

ຫົວຂໍ້ທີ່ນໍາມາປຶກສາຫາລື ແລະ ແລກປ່ຽນຄໍາຄິດຄໍາເຫັນ ໃນມື້ນີ້ປະກອບມີ:

1. ການຜະລິດເປັນສິນຄ້າ;

2. ການຄຸ້ມຄອງລາຄາສິນຄ້າກະສິກໍາ;

3. ການຄຸ້ມຄອງການນໍາເຂົ້າສິນຄ້າກະສິກໍາ;

4. ການສົ່ງອອກສິນຄ້າກະສິກໍາ;

5. ລາຍການມາດຕະຖານຜະລິດຕະພັນໄມ້ເພື່ອສົ່ງອອກ ຕາມແຈ້ງການ 27/ຫສພ, ລົງວັນທີ 05 ມັງກອນ 2023;

6. ການ ມອບ-ໂອນ ໂຮງງານປຸງແຕ່ງກະສິກໍາ ແລະ ປ່າໄມ້;

7. ການຈັດຕັ້ງປະຕິບັດ ແຈ້ງການ ສະບັບເລກທີ 885/ຫສນຍ, ລົງວັນທີ 28 ກໍລະກົດ 2021;

8. ການສົ່ງອອກ ແລະ ນໍາເຂົ້າ ຜະລິດຕະພັນໄມ້ ແລະ ເຄື່ອງປ່າຂອງດົງ;

9. ການເຂົ້າເຖິງແຫຼ່ງທຶນ ຈຸນລະວິສາຫະກິດ ຂະໜາດນ້ອຍ ແລະ ຂະໜາດກາງ.

ແຫລ່ງຂ່າວ: ຂ່າວສານກະສິກໍາ, ປ່າໄມ້ ແລະ ພັດທະນາຊົນນະບົດ ກຊ ກປ

ລົງຂ່າວ: ນ ຖື ແຫວນວົງສົດ ກຜຮ ກຊ ອຄ