ໃນຕອນເຊົ້າເວລາ 8:30 ໂມງ ຂອງວັນທີ 5 ພຶດສະພາ 2023, ທີ່ຫ້ອງຮັບແຂກໃຫຍ່ຊັ້ນ 04 ກະຊວງອຸດສາຫະກໍາ ແລະ ການຄ້າ, ທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ Jean Denis Pesme, ຫົວໜ້າການເງິນ, ການແຂ່ງຂັນ ແລະ ນະວັດຕະກໍາ ຂອງທະນາຄານໂລກ ພ້ອມຄະນະ ໃນໂອກາດເຂົ້າພົບປະທ່ານ ລັດຖະມົນຕີ ເພື່ອປຶກສາຫາລືກ່ຽວກັບສະພາບໂດຍລວມ ໃນການຈັດຕັ້ງປະຕິບັດບັນດາໂຄງການຊ່ວຍເຫລືອ ຂອງທະນາຄານໂລກ ໃຫ້ແກ່ກະຊວງອຸດສາຫະກຳ ແລະ ການຄ້າ ເປັນກຽດເຂົ້າຮ່ວມມີບັນດາ ທ່ານຫົວໜ້າ-ຮອງຫົວໜ້າກົມ ກ່ຽວຂ້ອງອ້ອມຂ້າງກະຊວງ ເຂົ້າຮ່ວມທັງສອງຝ່າຍປະມານ 15 ທ່ານ.
ໂອກາດນີ້ ທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ກໍ່ສະແດງຄວາມຍ້ອງຍໍຊົມເຊີຍຕໍ່ ທ່ານ Jean Denis Pesme, ໃນການຊຸກຍູ້ ເພື່ອພັດທະນາວຽກງານກອງທຶນສົ່ງເສີມວິສາຫະກິດ ຂະໜາດນ້ອຍ ແລະ ກາງ ໂດຍສະເພາະການຊຸກຍູ້ສົ່ງເສີມ SME ພາຍຫລັງການລະບາດຂອງ ພະຍາດໂຄວິດ-19 ມີຂໍ້ສະດວກ, ຂໍ້ຫຍຸ້ງຍາກ ແລະ ແຜນການຕໍ່ໜ້າ; ການຢ້ຽມຢາມຖາມຂ່າວກ່ຽວກັບສະພາບໂດຍລວມ ໃນການຈັດຕັ້ງປະຕິບັດ ບັນດາໂຄງການຊ່ວຍເຫລືອ ຂອງທະນາຄານໂລກ ໃຫ້ແກ່ກະຊວງອຸດສາຫະກຳ ແລະ ການຄ້າ ເປັນຕົ້ນ ໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າ (LCT) ມີຂໍ້ສະດວກ, ຂໍ້ຫຍຸ້ງຍາກ ແລະ ແຜນຕໍ່ໜ້າຄືແນວໃດ
ໃນໄລຍະຜ່ານມາ, ການຈັດຕັ້ງປະຕິບັດວຽກງານ ໂຄງການສົ່ງເສີມການເຂົ້າເຖິງແຫຼ່ງທຶນຂອງວິສາຫະກິດຂະໜາດນ້ອຍ ແລະ ກາງ (MSME A2F) ໄດ້ພົບຄວາມຫຍຸ້ງຍາກບາງດ້ານ ເປັນຕົ້ນແມ່ນ ກ່ອນຈະເອົາເງິນໄປໃຫ້ທະນາຄານທຸລະກິດປ່ອຍສິນເຊື່ອ ແມ່ນຕ້ອງໄດ້ຜ່ານຂັ້ນຕອນຫລາຍຂັ້ນ ແລະ ໃຊ້ເວລາສົມຄວນ ເຊັ່ນ: ການປະເມີນລະບຽບການດ້ານສັງຄົມ ແລະ ສິ່ງແວດລ້ອມ (Environment and Social Regulations/ESR) ຂອງລາວ ແລະ WB.
ການສ້າງເງື່ອນໄຂໃຫ້ການຊ່ວຍເຫຼືອ ພາກທຸລະກິດຜ່ານທຶນສົມທົບ (Matching Grant) ເນື່ອງຈາກພາຍໃນກະຊວງ ອຄ ເຮົາ ກໍມີ ພາກສ່ວນທີ່ຊ່ວຍເຫຼືອພາກທຸລະກິດ ໃນຮູບແບບດຽວກັບ ໂຄງການທີ່ພາຍໃຕ້ກົມ ຜຮ ຈະຊ່ວຍເຫຼືອລ້າ ດ້ານວິຊາການ 50% ຂອງມູນຄ່າທັງໝົດ; ໃນຂະນະທີ່ ບາງທຶນສົມທົບພາຍໃຕ້ ກົມສົ່ງເສີມວິສາະຫະກິດຂະໜາດນ້ອຍ ແລະ ກາງ(SME) ມີການຊ່ວຍເຫຼືອລ້າດ້ານວິຊາການ ເຖິງ 100% ຂອງມູນຄ່າທັງໝົດ ແລະ ມີບາງກໍລະນີກໍ່ລວມມີການຊ່ວຍເຫຼືອສຳລັບການລົງທຶນ;,ຊຶ່ງກົມ ຜຮ ຄິດວ່າ ຄວນຈະໄດ້ມີການປຶກສາຫາລື ແລະ ປະສານກັນຕື່ມລະຫວ່າງສອງພາກສ່ວນນີ້ ເພື່ອຄົ້ນຄວ້າວິທີແກ້ໄຂ ແລະ ຫຼີກລ່ຽງຄວາມເຂົ້າໃຈຜິດ ຂອງ ພາກທຸລະກິດ ທີ່ກະຊວງ ອຄ ໄດ້ໃຫ້ການຊ່ວຍເຫຼືອ.
ຕອນທ້າຍ, ທ່ານ Jean Denis Pesme, ຫົວໜ້າການເງິນ, ການແຂ່ງຂັນ ແລະ ນະວັດຕະກໍາ ຂອງທະນາຄານໂລກ ກໍ່ໄດ້ສະແດງຄວາມຂອບໃຈຕໍ່ທ່ານລັດຖະມົນຕີ ທີ່ໄດ້ຕ້ອນຮັບ ແລະ ໃຫ້ການຮ່ວມມື ລະຫວ່າງ ສປປ ລາວ – ທະນາຄານໂລກ ແລະ ອຳນວຍຄວາມສະດວກໃນວຽກງານຫຼາຍດ້ານ ເພື່ອໃຫ້ເກີດຜົນປະໂຫຍດສູງສຸດໃນຕໍ່ໜ້າ.
ພາບ-ຂ່າວ: ໄພຄໍາອີ ສູນສະຖິຕິ ແລະ ຂໍ້ມູນຂ່າວສານ ກະຊວງ ອຄ.
