ໃນຕອນເຊົ້າ ວັນທີ 02 ພຶດສະພາ 2023 ທີ່ຫ້ອງປະຊຸມສ່ອງແສງຊັ້ນ 3 ກະຊວງອຸດສາຫະກໍາ ແລະ ການຄ້າ ໄດ້ເປີດຊຸດຝຶກອົບຮົມລະບົບການນໍາໃຊ້ຫ້ອງການທັນສະໄໝ ໃຫ້ແກ່ຫ້ອງການ, ສະຖາບັນອຸດສາຫະກໍາ ແລະ ການຄ້າ ແລະ ບັນດາກົມທີ່ກ່ຽວຂ້ອງທົ່ວກະຊວງອຸດສາຫະກໍາ ແລະ ການຄ້າ; ມີຂັ້ນຮອງຫົວໜ້າກົມ, ຫົວໜ້າ-ຮອງຫົວໜ້າພະແນກ ແລະ ວິຊາການ ເຂົ້າຮ່ວມປະມານ 35 ທ່ານ.
ການຝຶກອົບຮົມຄັ້ງນີ້ ໂດຍການເປັນປະທານ ຂອງ ທ່ານ ນາງ ຄໍາພັດ ພູນສຸກ ຮອງຫົວໜ້າຫ້ອງການ ຊຶ່ງໄດ້ກ່າວເປີດການຝຶກອົບຮົມກ່ຽວກັບການຄຸ້ມຄອງ ແລະ ນຳໃຊ້ລະບົບຫ້ອງການທັນສະໄໝ (e-Office) ໃຫ້ແກ່ຄະນະຮັບຜິດຊອບຄຸ້ມຄອງລະບົບ ແລະ ຄູຝຶກ (TOT) ແລະ ຮຽນເຊີນ ທ່ານ ນາງ ຈິນຕະນະພອນ ຈັນສີລິລາດ ຮອງຫົວໜ້າສູນບໍລິຫານລັດດິຈິຕອນ ກະຊວງເຕັກໂນໂລຊີ ແລະ ການສື່ສານ ເປັດກຽດນໍາສະເໜີພາບລວມໂດຍຫຍໍ້ ກ່ຽວກັບສະພາບການຫັນເປັນທັນສະໄໝຂອງລັດຖະບານ ແລະ ການນໍາໃຊ້ລະບົບຫ້ອງການທັນສະໄໝ; ນຳສະເໜີພາບລວມໂຄງສ້າງລະບົບຫ້ອງການທັນສະໄໝ (e-Office); ການຝຶກສອນວິທີການນຳໃຊ້ລະບົບຄົບຖ້ວນ ແລະ ສ້າງໃຫ້ເປັນເວທີແລກປ່ຽນບົດຮຽນຕົວຈິງ ໂດຍທີມງານຄູຝຶກ ຂອງກະຊວງເຕັກໂນໂລຊີ ແລະ ການສື່ສານ, ຊຶ່ງຖືວ່າເປັນຜູ້ທີ່ມີປະສົບການດ້ານການຄົ້ນຄວ້າອອກແບບ ແລະ ຮັບຜິດຊອບໃນການສ້າງລະບົບຫ້ອງການທັນສະໄໝ ໃຫ້ແກ່ກະຊວງອຸດສາຫະກໍາ ແລະ ການຄ້າ;ການຝຶກອົບຮົມໃນການເປັນຄູຝຶກແມ່ນສືບຕໍ່ຝຶກອົບຮົມ ຈົນສຳເລັດໃນໄລຍະ 04 ວັນ ຊຶ່ງນັບແຕ່ ວັນທີ 2-5 ພຶດສະພາ 2023.
ທ່ານ ນາງ ຄໍາພັດ ພູນສຸກ ຍັງໄດ້ກ່າວວ່າ: ການຈັດຝຶກອົບຮົມຄັ້ງນີ້ ຈະມີປະໂຫຍດບໍ່ຫຼາຍກໍ່ໜ້ອຍໃຫ້ກັບບັນດາທ່ານ ນັກສໍາມະນາກອນ ແລະ ສາມາດນໍາເອົາບົດຮຽນ ແລະ ທິດສະດີໄປຈັດຕັ້ງປະຕິບັດໃຫ້ສອດຄ່ອງກັບວຽກງານຕົວຈິງ. ສະນັ້ນ,ຈຶ່ງຮຽກຮ້ອງມາຍັງບັນດາທ່ານ ຈົ່ງເອົາໃຈໃສ່ຮັບຟັງ ນັກວິທະຍາກອນບັນຍາຍ ຢ່າງສຸດກົກສຸດປາຍ, ຖ້າມີຄວາມສົນໃຈ ຫຼື ຂໍ້ສົງໄສຕໍ່ປະເດັນໃດກໍໃຫ້ສະເໜີຖາມ ແລະ ແລກປ່ຽນ ບົດຮຽນຕົວຈິງ.
ສຸດທ້າຍນີ້ ຂ້າພະເຈົ້າຂໍຕາງໜ້າໃຫ້ຄະນະຮັບຜິດຊອບຈັດຝຶກອົບຮົມ ຂໍສະແດງຄວາມຂອບໃຈ ມາຍັງທີມງານຈາກກະຊວງເຕັກໂນໂລຊີ ແລະ ການສື່ສານ ແລະ ບັນດາທ່ານນັກສໍາມະນາກອນທັງໝົດ ທີ່ໄດ້ສະຫຼະເວລາອັນມີຄ່າ ເຂົ້າຮ່ວມການຝຶກອົບຮົມໃນຄັ້ງນີ້, ຂໍອວຍພອນໃຫ້ການຝຶກອົບຮົມປະສົບຜົນສຳເລັດ ຕາມລະດັບຄາດໝາຍ.
ພາບ-ຂ່າວ: ໄພຄໍາອີ ສູນສະຖິຕີ ແລະ ຂໍ້ມູນຂ່າວສານ ກະຊວງ ອຄ.
