ຕອນເຊົ້າເວລາ 09:30ໂມງ ຂອງວັນທີ 07 ພຶດສະພາ 2021, ທີ່ຫ້ອງຮັບແຂກ ຊັ້ນ 4 ກະຊວງອຸດສາຫະກໍາ ແລະ ການຄ້າ, ບໍລິສັດ ຮັດຈິລາວ ຈໍາກັດຜູ້ດຽວ (Hatchi Lao Sole.co.,Ltd) ທີ່ດໍາເນີນທຸລະກິດ ຢູ່ ສປປ ລາວ ຊຶ່ງນໍາພາໂດຍ ທ່ານ ຜູ້ຈັດການບໍລິສັດ ພ້ອມດ້ວຍຄະນະ ໄດ້ມອບເຄື່ອງຊ່ວຍເຫຼືອ ໃຫ້ແກ່ ທ່ານ ສົມຈິດ ອິນທະມິດ ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ ທັງເປັນຮອງຫົວໜ້າຄະນະສະເພາະກິດຮັບມືການແຜ່ລະບາດ ຂອງພະຍາດໂຄວິດ19 ເພື່ອຮັບໃຊ້ເຂົ້າໃນວຽກງານປ້ອງກັນພະຍາດອັກເສບປອດຈາກເຊື້ອຈຸລະໂຣກສາຍພັນໃໝ່ COVID-19, ມີຜູ້ຕາງໜ້າເຂົ້າຮ່ວມທັງສອງຝ່າຍ ປະມານ 13 ທ່ານ, ເຄື່ອງຊ່ວຍເຫຼືອດັ່ງກ່າວປະກອບມີ: 1./ ເສື້ອກາວ Surgical Isolation Gown Non woven 30g Antibacterial 2./ ໝວກ Sungiral Cap ຊຸດປ້ອງກັນ ແບບໃຊ້ໄດ້ເທື່ອດຽວ ຈໍານວນ 300 ຊຸດ ລວມມູນຄ່າທັງໝົດ 1.350.000 ໂດລາສະຫະລັດ.
ໃນໂອກາດນີ້ທ່ານ ຮອງລັດຖະມົນຕີ ກໍ່ໄດ້ມອບໃບຍ້ອງຍໍ ໃຫ້ແກ່ບໍລິສັດ ແລະ ສະແດງຄວາມຂອບອົກຂອບໃຈຕໍ່ການຊ່ວຍເຫຼືອໃນຄັ້ງນີ້ ແລະ ຈະໄດ້ນໍາເອົາເຄື່ອງຊ່ວຍເຫຼືອດັ່ງກ່າວແຈກຢາຍ ໃຫ້ແກ່ບັນດາກົມ, ຫ້ອງການ ແລະ ສະຖາບັນຄົ້ນຄວ້າເສດຖະກິດອຸດສາຫະກໍາ ແລະ ການຄ້າເພື່ອໃຫ້ພະນັກງານໄດ້ນໍາໃຊ້ຕາມຄວາມເໝາະສົມ ໃນໄລຍະເວລາມາປະຕິບັດໜ້າທີ່ວຽກງານຂອງຕົນ ແລະ ອວຍພອນໄຊ ໃຫ້ບໍລິສັດ ຈົ່ງສືບຕໍ່ດໍາເນີນທຸລະກິດດ້ວຍຄວາມສະດວກ ແລະ ໄດ້ຮັບການພັດທະນາຂຶ້ນໄປເລື້ອຍໆ, ພ້ອມທັງສະແດງຄວາມເປັນຫວ່ງ ແລະ ໃຫ້ຄໍາແນະນໍາແກ່ບໍລິສັດໃນການປະສານກັບ ກະຊວງສາທາລະນະສຸກ ເພື່ືອສັກຢາວັກຊິນປ້ອງກັນພະຍາດໂຄວິດ 19 ໃຫ້ແກ່ພະນັກງານ-ກໍາມະກອນພາຍໃນບໍລິສັດ ແລະ ໂຮງງານດັ່ງກ່າວ.
ຂ່າວ ແລະ ພາບໂດຍ: ທ ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກົມ ຜຮ
