ກອງປະຊຸມວຽກງານອຸດສາຫະກຳ ແລະ ການຄ້າ ປະຈຳສົກປີ 2009-2010 ຄັ້ງວັນທີ 31ພຶດສະພາ -1 ມິຖຸນາ 2010.
ໃນວັນທີ 31 ພຶດສະພາ - 1 ມີຖຸນາ 2010 ທີ່ຜ່ານມາ ກະຊວງອຸດສາຫະກຳ ແລະ ການຄ້າ ໄດ້ຈັດກອງປະຊຸມວຽກງານ ອຸດສາຫະກຳ ແລະ ການຄ້າ ປະຈຳສົກປີ 2009-2010 ຂຶ້ນຢູ່ທີ່ ຫ້ອງປະຊຸມ ໂຮງແຮມ ດອນຈັນ ພາເລສ. ໂດຍການເປັນປະທານຂອງ ທ່ານ ດຣ ນາມ ວິຍະເກດ ລັດຖະມົນຕີວ່າການ ກະຊວງອຸດສາຫະກຳ ແລະ ການຄ້າ. ເປັນກຽດເຂົ້າຮ່ວມກອງປະຊຸມ ດັ່ງກ່າວ ປະກອບດ້ວຍ: ຮອງເຈົ້າແຂວງ, ຫົວໜ້າພະແນກ ອຸດສາຫະກຳ ແລະ ການຄ້າ ແຂວງ, ຕາງໜ້າຈາກບັນດາກະຊວງ. ທັງໝົດມີຜູ້ເຂົ້າຮ່ວມ 190 ຄົນ. ຈຸດປະສົງຂອງການຈັດກອງປະຊຸມ ວຽກງານອຸດສາຫະກຳ ແລະ ການຄ້າໃນຄັ້ງນີ້ ແມ່ນເພື່ອ:
1. ສັງເກດຕີລາຄາສະພາບການຈັດຕັ້ງປະຕິບັດແຜນການພັດທະນາ ແລະ ການຄຸ້ມຄອງວຽກ ງານ ອຸດສາຫະກຳ ແລະ ການຄ້າ 5 ປີ ຄັ້ງທີ່ VI ແລະ ແຜນພັດທະນາຂອງຂະແໜງອຸດສາຫະກຳ ແລະ ການຄ້າ 5 ປີ ຄັ້ງທີ່ VII (2011-2015);
2. ສັງເກດຕີລາຄາສະພາບການຈັດຕັ້ງປະຕິບັດແຜນການພັດທະນາ ແລະ ການຄຸ້ມຄອງວຽກ ງານ ອຸດສາຫະກຳ ແລະ ການຄ້າ ສົກປີ 2008-2009; ສະຫຼຸບ 6 ເດືອນ ຕົ້ນປີ ແລະ ຄາດຄະເນ ການຈັດຕັ້ງປະຕິບັດ ບັນດາຄາດໝາຍໃນແຜນພັດທະນາເສດຖະກິດ-ສັງຄົມ ສົກປີ 2009-2010 ແລະ ແຜນສົກປີ 2010-2011;
3. ລົງເລິກແຕ່ລະບັນຫາທີ່ກ່ຽວຂ້ອງກັບຂະແໜງອຸດສາຫະກຳ ແລະ ການຄ້າ ອີກຈຳນວນໜຶ່ງ;
4. ຟັງການເຜີຍແຜ່ບາງບົດຮຽນຈາກພາກສ່ວນທຸລະກິດ ໃນການດຳເນີນທຸລະກິດຕົວຈິງ ເພື່ອ ເປັນແບບຢ່າງ ແລະ ເປັນການແລກປ່ຽນບົດຮຽນລະຫ່ວາງ ພາກລັດ ແລະ ເອກະຊົນ.
ຜົນສຳເລັດທີ່ພົ້ນເດັ່ນໃນການພັດທະນາຂອງຂະແໜງການໃນໄລຍະ 5 ປີ ຜ່ານມາ:
1. ການຂະຫຍາຍຕົວດ້ານອຸດສາຫະກຳປຸງແຕ່ງ ແລະ ຫັດຖະກຳ
ຍອດມູນຄ່າການຜະລິດອຸດສາຫະກຳປຸງແຕ່ງ: (2006-2010) ຄາດຄະເນປະຕິບັດໄດ້ 1.834,34 ຕື້ກີບ ອັດຕາການຂະຫຍາຍຕົວສະເລ່ຍ 10,73% ຕໍ່ປີ (ແຜນການແມ່ນ 11,51%) ທຽບໃສ່ ແຜນການ 5 ປີ ປະຕິບັດໄດ້ 97,78%. ການຜະລິດຂອງຂະແໜງອຸດສາຫະກຳປຸງແຕ່ງເດັ່ນກວ່າໝູ່ແມ່ນ ຂະແໜງປຸງແຕ່ງອາຫານ ແລະ ເຄື່ອງດື່ມ, ວັດສະດຸກໍ່ສ້າງ, ຕັດຫຍິບ, ຢາສູບ, ເກີບ
ໂຮງງານອຸດສາຫະກຳປຸງແຕ່ງ ແລະ ຫັດຖະກຳ ທົ່ວປະເທດໃນປັດຈຸບັນມີທັງໝົດ 24,149 ຫົວໜ່ວຍ ໃນນີ້ມີໂຮງງານຂະໜາດໃຫຍ່ 363 ຫົວໜ່ວຍ; ຂະໜາດກາງ 424 ຫົວໜ່ວຍ ແລະ ຂະໜາດນ້ອຍ 23,362 ຫົວໜ່ວຍ. ການລົງທຶນດ້ານອຸດສາຫະກຳປຸງແຕ່ງມີມູນຄ່າທັງໝົດ 15,102 ຕື້ກີບ, ໃນນີ້ເປັນທຶນຄົງທີ່ 12,926 ຕື້ກີບ. ບັນດາໂຮງງານອຸດສາຫະກຳປຸງແຕ່ງ ແລະ ຫັດຖະກຳເຫຼົ່ານີ້ ໄດ້ສ້າງວຽກເຮັດງານທຳໄດ້ທັງໝົດ 115,540 ຄົນ, ໃນນັ້ນມີແຮງງານຕ່າງປະເທດ 4,342 ຄົນ.
ສຳລັບ 4 ເດືອນຕົ້ນປີສົກ 2009-2010 ມູນຄ່າການຜະລິດອຸດສາຫະກຳປຸງແຕ່ງ ຄາດຄະເນປະຕິບັດໄດ້ 217,11 ຕື້ກີບ, ເພີ່ມຂຶ້ນ 6,87% ເມື່ອທຽບໃສ່ໄລຍະດຽວກັນຂອງສົກປີ 2008-2009 ທຽບໃສ່ແຜນການປະຕິບັດໄດ້ 50% ຄາດຄະເນ 6 ເດືອນທ້າຍປີບັນລຸໄດ້ 225,67 ຕື້ກີບ, ຄາດຄະເນໝົດປີ (2009-10) 442,79 ຕື້ກີບ.
2. ການຄ້າພາຍໃນ
ລວມມູນຄ່າຈໍລະຈອນສິນຄ້າພາຍ ໃນໄລຍະ 5 ປີ 2006-2010 ບັນລຸໄດ້ 29,395 ຕື້ກີບ ເພີ່ມຂຶ້ນສະເລ່ຍ 11% ຕໍ່ປີ. ລາຄານ້ຳມັນເຊື້ອໄຟໃນຮອບ 5 ປີຜ່ານມາ ໄດ້ມາການປັບລາຄາທັງໝົດ 74 ຄັ້ງ ໃນນີ້ປັບຫຼຸດລົງ 46 ຄັ້ງ ແລະ ອາຍແກສຫຸງຕົ້ມປັບທັງໝົດ 15 ຄັ້ງ ໃນນີ້ປັບລົງ 3 ຄັ້ງ.
ປັດຈຸບັນ ທົ່ວປະເທດມີຕະຫຼາດທັງໝົດ 628 ແຫ່ງ ໃນນີ້ຕະຫຼາດໃຫ່ຍ 73 ແຫ່ງ, ລະດັບກາງ 156 ແຫ່ງ, ລະດັບນ້ອຍ ແລະ ຕະຫຼາດນັດ 429 ແຫ່ງ. ເວົ້າລວມ ຕະຫຼາດຢູ່ບັນດາຕົວເມືອງໃຫ່ຍໆ ໃນທົ່ວປະເທດ ໄດ້ຮັບການຂະຫຍາຍ ເຮັດໃຫ້ການແລກປ່ຽນຊື້-ຂາຍ ແລະ ຈໍລະຈອນແຈກຢາຍສິນຄ້າສາມາດລົງສູ່ຊົນນະບົດ ແລະ ບ່ອນຫ່າງໄກສອກຫຼີກ. ນອກນີ້ຍັງມີດ່ານຊາຍແດນສາກົນ 17 ແຫ່ງ, ດ່ານທ້ອງຖິ່ນ 43 ແຫ່ງ ແລະ ຈຸດຊາຍແດນຊື້-ຂາຍແລກປ່ຽນຂອງປະຊາຊົນ 63 ແຫ່ງ.
3. ການຄ້າຕ່າງປະເທດ
+ ດ້ານການສົ່ງອອກ
ລວມຍອດມູນຄ່າຂາອອກ 5 ປີ ຄາດວ່າຈະບັນລຸໄດ້ປະມານ 5,12 ຕື້ໂດລາສະຫະລັດ ທຽບໃສ່ແຜນການ 5 ປີ ທີ່ວາງໄວ້ເພີ່ມຂຶ້ນ 46,86% ອັດຕາເພີ່ມສະເລ່ຍຂອງການສົ່ງອອກຕໍ່ປີເທົ່າກັບ 24,38% ມູນຄ່າການສົ່ງອອກໃນປີທ້າຍສະໄໝຂອງແຜນການ (2010) ຄາດຄະເນບັນລຸໄດ້ 1,046 ລ້ານໂດລາສະຫະລັດ. ໃນນັ້ນ ມູນຄ່າການສົ່ງອອກແຮ່ທາດກວມ 55,74%, ອຸດສາຫະກຳ ແລະ ຫັດຖະກຳ 17,81%, ພະລັງງານໄຟຟ້າ 10,04%, ໄມ້ ແລະ ຜະລິດຕະພັນໄມ້ 6,95% ແລະ ສິນຄ້າກະສິກຳ ແລະ ສັດລ້ຽງ 6,93%.
ຕະຫຼາດສົ່ງອອກຂອງລາວໃນ 5 ປີ ຜ່ານມາໄດ້ແກ່: ຕະຫຼາດອາຊີ ກວມ 67,54%, ອີຢູ ກວມ 20,40%, ໂອເຊອານີ 10,04% ແລະ ອາເມລິກາເໜືອ 2,02%. ໃນນັ້ນ ອາຊຽນ ກວມ 53,55% ສະເພາະແຕ່ປະເທດໄທມີສ່ວນແບ່ງ 36,09% ແລະ ຫວຽດນາມ 11,37%. ມາຮອດປັດຈຸບັນ ໄດ້ຮັບສິດທິພິເສດດ້ານພາສີນຳເຂົ້າທັງໝົດຈາກ 50 ປະເທດ.
ສຳລັບມູນຄ່າການສົ່ງອອກ 4 ເດືອນຕົ້ນສົກປີ 2009-10 ຄາດຄະເນປະຕິບັດໄດ້ 580,80 ລ້ານໂດລາ ເທົ່າກັບ 55,52% ຂອງຕົວເລກແຜນການປີ ທຽບໃສ່ໄລຍະດຽວກັນຂອງສົກປີຜ່ານມາ ເພີ່ມຂຶ້ນ 8,48%.
+ ດ້ານການນຳເຂົ້າ
ຍອດມູນຄ່າຂາເຂົ້າ 5 ປີ ຄາດຄະເນບັນລຸໄດ້ 5,06 ຕື້ໂດລາສະຫະລັດ ທຽບໃສ່ແຜນການປະຕິບັດໄດ້ລື່ນ 24,10% ເພີ່ມສະເລ່ຍ 13,44% ຕໍ່ປີ, ມູນຄ່າການນຳເຂົ້າສົກປີ 2009-2010 ຄາດຄະເນບັນລຸໄດ້ 1,16 ຕື້ກີບ. ການນຳເຂົ້າສ່ວນໃຫ່ຍແມ່ນການນຳເຂົ້າເພື່ອຊົມໃຊ້ ແລະ ຈຳໜ່າຍພາຍໃນ ຫຼາຍກວ່າ 60%. ໃນນັ້ນ ນ້ຳມັນເຊື້ອໄຟກວມອັດສ່ວນ 21,41%, ພະຫະນະ ແລະ ສິ້ນສ່ວນ 9,97%, ສະບຽງອາຫານ 2,18%, ເຄື່ອງນຸ່ງຫົ່ມ 2,04%, ເຄື່ອງກໍ່ສ້າງ 2,73% ແລະ ໄຟຟ້າ 1,96%, ວັດຖຸດິບສຳລັບຕັດຫຍິບ 9,09%, ສິນຄ້ານຳເຂົ້າຮັບໃຊ້ການຜະລິດອຸດສາຫະກຳ 10,12% ແລະ ອື່ນໆ.
ຕະຫຼາດນຳເຂົ້າຂອງລາວສ່ວນໃຫ່ຍແມ່ນມາຈາກ ກຸ່ມປະເທດອາຊີ ກວມ 96%, ອີຢູ 2,3%ເຫຼືອນັ້ນແມ່ນນຳເຂົ້າຈາກທະວີອາເມລິກາເໜືອ ແລະ ທະວີໂອເຊອານີ. ໃນນີ້ ສປປ ລາວ ນຳເຂົ້າຈາກປະເທດອາຊຽນ ກວມ 81,34% ຫຼາຍກວ່າໝູ່ແມ່ນນຳເຂົ້າຈາກໄທ 67,26% ແລະ ຫວຽດນາມ 12,25%.
ສຳລັບມູນຄ່າການນຳເຂົ້າ 4 ເດືອນຕົ້ນປີ ຄາດຄະເນປະຕິບັດໄດ້ 526,54 ລ້ານໂດລາ ທຽບໃສ່ຕົວເລກແຜນການປີປະຕິບັດໄດ້ 43,53% ທຽບໃສ່ໄລຍະດຽວກັນຂອງສົກປີຜ່ານມາຫຼຸດລົງ 23,96% ແລະ ຄາດຄະເນ 6 ເດືອນທ້າຍປີ 2009-10 ປະມານ 677,82 ລ້ານໂດລາ
+ ດຸນການຄ້າ
ໃນ 5 ປີຜ່ານມາ ດຸນການຄ້າຂອງ ສປປ ລາວ ຕິດລົບປະມານ 488,44 ລ້ານໂດລາ ເທົ່າກັບ 8,72% ຂອງຍອດມູນຄ່າການສົ່ງອອກທັງໝົດ, ສະເລ່ຍແຕ່ລະປີຂາດດຸນປະມານ 1,74%. ແຕ່ເປັນການຂາດດຸນທີ່ຕັ້ງໜ້າ ເນື່ອງຈາກການນຳເຂົ້າສິນຄ້າຮັບໃຊ້ໂຄງການລົງທຶນພາຍໃນ ແລະ ຕ່າງ ປະເທດ ຍັງກວມອັດຕາສ່ວນສູງ ແລະ ພ້ອມດຽວກັນ ການນຳເຂົ້ານ້ຳມັນເຊື້ອໄຟ, ພະຫະນະຮັບໃຊ້ ກໍ່ແມ່ນສິນຄ້າທີ່ມີຄວາມຕ້ອງການສຳລັບການຊົມໃຊ້ ແລະ ບໍລິໂພກຢູ່ພາຍໃນສູງຂຶ້ນໄປຕາມກົດເກນການຂະຫຍາຍຕົວທາງດ້ານເສດຖະກິດ ແລະ ສັງຄົມ.
4. ການຄ້າຊາຍແດນ
ມູນຄ່າການຄ້າຊາຍແດນ 5 ປີ ຄາດຄະເນບັນລຸໄດ້ 7,36 ຕື້ໂດລາສະຫະລັດ. ໃນນັ້ນ ມູນຄ່າການສົ່ງອອກມີ 2,66 ຕື້ໂດລາ, ນຳເຂົ້າ 4,70 ຕື້ໂດລາ. ມູນຄ່າການຄ້າຮ່ວມກັບໄທ ມີ 5,47 ຕື້ໂດລາ ໃນນັ້ນ ສປປ ລາວ ສົ່ງອອກໄປໄທມີ 1,87 ຕື້ໂດລາ ແລະ ນຳເຂົ້າຈາກໄທ 3,60 ຕື້ໂດລາ; ມູນຄ່າການຄ້າຮ່ວມກັບຫວຽດນາມ 1,24 ຕື້ໂດລາ ໃນນັ້ນ ຫວຽດນາມ ນຳເຂົ້າຈາກ ສປປ ລາວ ມີ 589 ລ້ານໂດລາ, ລາວນຳເຂົ້າຈາກຫວຽດນາມ 655 ລ້ານໂດລາ; ມູນຄ່າການຄ້າລາວ-ຈີນ ມີ 0,64 ຕື້ໂດລາ ໃນນັ້ນ ສປປ ລາວ ສົ່ງອອກ 197 ລ້ານໂດລາ ແລະ ນຳເຂົ້າ 444 ລ້ານໂດລາ; ມູນຄ່າການຄ້າຮ່ວມກັບ ກຳປູເຈຍ 1,05 ລ້ານໂດລາ ແລະ ມຽນມາ 128.290 ໂດລາ.
ໃນບັ້ນທ້າຍຂອງກອງປະຊຸມໄດ້ຮັບກຽດຟັງການໂອ້ລົມຂອງທ່ານ ສົມສະຫວາດ ເລັ່ງສະຫວັດ, ຮອງນາຍົກລັດຖະມົນຕີ ຜູ້ປະຈຳການລັດຖະບານ. ຊຶ່ງເປັນການຊີ້ທິດເຍືອງທາງ ແລະ ຊີ້ນຳ ນຳພາ ໃຫ້ແຕ່ລະຂະແໜງອຸດສາຫະກຳ ແລະ ການຄ້າ.
ໂດຍ ທິລາວັນ
ຂ່າວການຄ້າ