|
ການຝຶກອົບຮົມວຽກງານອຸດສາຫະກຳ ແລະ ການຄ້າ ຂັ້ນເມືອງທົ່ວປະເທດ
ໃນວັນທີ 25 ມັງກອນ 2010, ທ່ານ ນາງ ເຂັມມະນີ ພົນເສນາ, ລັດຖະມົນຕີຊ່ວຍວ່າການກະຊວງອຸດສາຫະກຳ ແລະ ການຄ້າ ໄດ້ເຂົ້າຮ່ວມເປັນປະທ່ານໃນກອງປະຊຸມຝຶກອົບຮົມພະນັກງານອຸດສາຫະກຳ ແລະ ການຄ້າ ຂັ້ນເມືອງທົ່ວປະເທດ ພາຍໃຕ້ຫົວຂໍ້ “ວຽກງານອຸດສາຫະກຳ ແລະ ການຄ້າກັບການລົບລ້າງຄວາມທຸກຈົນ”
ຈຸດປະສົງຂອງການຈັດຝຶກອົບຮົມຄັ້ງນີ້ ແມ່ນແນໃສ່ຍົກລະດັບຄວາມສາມາດໃນການຄຸ້ມຄອງບໍລິຫານ ແລະ ສ້າງຄວາມເຂັ້ນແຂງທາງດ້ານວຽກງານການຄ້າ ໃຫ້ກັບພະນັກງານອຸດສາຫະກຳ ແລະ ການຄ້າເມືອງ ໂດຍສະເພາະ ແມ່ນເຈາະຈົງໃສ່ເມືອງທີ່ຍັງບໍ່ທັນຫລຸດພົ້ນອອກຈາກຄວາມທຸກຍາກຊຶ່ງໃນປະຈຸບັນນີ້ມີ ມີຈຳນວນ 46 ຕົວເມືອງໃນທົ່ວປະເທດ;
ໃນພິທິເປີດ, ທ່ານ ນາງ ເຂັມມະນີ ພົນເສນາໄດ້ເໜັ້ນວ່າ: ການທີ່ພັກລັດເຮົາວາງແນວທາງປ່ຽນແປງໃໝ່ທາງດ້ານເສດຖະກິດ ໂດຍການ ຫັນຈາກເສດຖະກິດແຜນການບໍລິຫານເກື້ອກູນ ໄປສູ່ເສດຖະກິດສິນຄ້າ ແລະ ເສດຖະກິດຕະຫລາດ ຕາມທິດສັງຄົມນິຍົມນັ້ນ ແມ່ນການຕັດສິນໃຈ ແລະ ມັນແມ່ນຄວາມພະຍາຍາມອັນໃຫຍ່ຫລວງຂອງພັກເຮົາ ໃນການນຳເອົາປະເທດຊາດໃຫ້ຫລຸດພົ້ນອອກຈາກຄວາມທຸກຍາກ ທັ້ງນີ້ກໍ່ເພາະວ່າເສດຖະກິດແຫ່ງຊາດຂອງປະເທດເຮົາ ມີຈຸດເລີ່ມຢູ່ໃນລະດັບຕໍ່າ, ຄວາມຮູ້ຄວາມສາມາດ ແລະ ປະສົບການໃນການຄຸ້ມຄອງລັດ ຄຸ້ມຄອງເສດຖະກິດຂອງພະນັກງານລັດຖະ ກອນ ແລະ ອົງການຈັດຕັ້ງມະຫາພາກຢູ່ໃນລະດັບຈຳກັດ ແລະ ພື້ນຖານດ້ານທິດສະດີ, ພຶດຕິກຳ ແລະ ປະສົບການກ່ຽວກັບເສດຖະກິດຕະຫລາດຕາມທິດສັງຄົມນິຍົມຍົງບໍ່ສົມບູນ.
ການຝຶກອົບຮົມຄັ້ງນີ້ແມ່ນຈັດໂດຍສະຖາບັນຄົ້ນຄ້ວາເສດຖະກິດການຄ້າ ແລະ ຈະໄດ້ດຳເນີນການອົບຮົມເປັນເວລາ 5 ວັນ.
ໂດຍ: ດາວຮຸ່ງ
- ກັບຄືນ -
|
ຂ່າວການຄ້າ