ໃນຕອນເຊົ້າ ເວລາ 9: 00 ໂມງ ຂອງວັນທີ 23 ມັງກອນ 2022 ທີ່ຫ້ອງຮັບແຂກໃຫຍ່ຊັ້ນ 4 ກະຊວງ ອຸດສາຫະກໍາ ແລະ ການຄ້າ ທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ ນາງ ອີນາ ມາຈູລໍນີເເຕ (Ina MACIULIONYTE), ເອັກອັກຄະລັດຖະທູດ ແຫ່ງ ສະຫະພາບເອີຣົບ (EU) ປະຈໍາ ສປປ ລາວ ເນື່ອງໃນໂອກາດການເຂົ້າຢ້ຽມຂໍ່ານັບຄັ້ງນີ້ ເພື່ອປຶກສາຫາລືກ່ຽວກັບການເຄື່ອນໄຫວ, ຮ່ວມມື ແລະ ຊ່ວຍເຫຼືອ ລະຫວ່າງ ສປປ ລາວ ແລະ ສະຫະພາບ ເອີຣົບ ໃນໄລຍະຜ່ານມາ ແລະ ການຮ່ວມມືໃນອະນາຄົດ, ຊຶ່ງມີຜູ້ຕາງໜ້າຈາກທັງສອງຝ່າຍເຂົ້າຮ່ວມ ຈໍານວນ 15 ທ່ານ.
ໃນໂອກາດພົບປະຄັ້ງນີ້ ສອງຝ່າຍໄດ້ປຶກສາຫາລື ແລະ ໄດ້ລາຍງານໃຫ້ຊາບ ກ່ຽວກັບສະພາບເສດຖະກິດມະຫາພາກຂອງ ສປປ ລາວ ພາຍຫຼັງທີ່ໄດ້ຖືກກະທົບຈາກການລະບາດຂອງພະຍາດ COVID-19, ຊຶ່ງໄດ້ສົ່ງຜົນກະທົບຢ່າງຫຼວງຫຼາຍໃຫ້ກັບທຸກຂະແໜງການ ຈາກຜົນກະທົບຂອງການແຜ່ລະບາດ Covid-19 ໃນໄລຍະທີ່ຜ່ານມາ. ການພົວພັນການຄ້າ ລະຫວ່າງ ລາວ ແລະ ອີຢູ ໃນໄລຍະຜ່ານມາ ແມ່ນສາມາດຈັດຕັ້ງປະຕິບັດຕາມເງື່ອນໄຂສິດທິພິເສດທາງການຄ້າເຊັ່ນ: EBA (Everything But Arms) ແລະ GSP (Generalized System of Preference) ທີ່ສະຫະພາບເອີຣົບ (EU) ໄດ້ໃຫ້ແກ່ບັນດາປະເທດດ້ອຍພັດທະນາ, ຊຶ່ງໃນ 9 ເດືອນ ປີ 2022 ມູນຄ່າການຄ້າສອງຝ່າຍ ລາວ-ອີຍູ ບັນລຸໄດ້ 366.9 ລ້ານໂດລາສະຫະລັດ. ໃນນັ້ນ, ມູນຄ່າການສົ່ງອອກບັນລຸໄດ້ 239.8 ລ້ານໂດລາສະຫະລັດ ແລະ ມູນຄ່າການນໍາເຂົ້າບັນລຸໄດ້ 127.1 ລ້ານໂດລາສະຫະລັດ.
- ສິນຄ້າຫລັກທີ່ ສປປ ລາວ ສົ່ງອອກໄປ ອີຢູ ໃນ 9 ເດືອນ ປີ 2022: ເຄື່ອງນຸ່ງຫົ່ມ; ເກີບ; ກາເຟ (ບໍ່ທັນໄດ້ປຸງແຕ່ງ); ເພັດ; ເຂົ້າ; ເຄື່ອງຫຼີ້ນກິລາ; ເຄື່ອງຊຸບຫົວ (ໝວກ, ຜ້າຄຸມຫົວ); ເຄື່ອງສຳລັບການເດີນທາງ; ພລາສະຕິກ ແລະ ເຄື່ອງໃຊ້ທີ່ເຮັດດ້ວຍພລາສະຕິກ ແລະ ອື່ນໆ.
- ສິນຄ້າຫລັກທີ່ ສປປ ລາວ ນໍາເຂົ້້າຈາກ ອີຢູ ໃນ 9 ເດືອນ ປີ 2022: ອຸປະກອນກົນຈັກ (ນອກຈາກເຄື່ອງກົນຈັກພາຫະນະ); ເຫຼົ້າ, ເບຍ, ວາຍ; ເຍື່ອໄມ້ ແລະ ເສດເຈ້ຍ; ເພັດ; ພາຫະນະທາງບົກ (ນອກຈາກລົດຈັກ,ລົດໄຖ); ຜະລິດຕະພັນການຢາ (ເພສັດຊະກໍາ); ແກ້ວປະເສີດ ຫຼື ເຄິ່ງປະເສີດ; ຊິ້ນສ່ວນອາໄຫຼ່ລົດ (ລວມທັງຢາງ, ແວ່ນ, ໂສ້…); ເສັ້ນໄຍສັງເຄາະ; ເຄື່ອງມື ແລະ ອຸປະກອນທັດສະນະສາດ ແລະ ອື່ນໆ. ນັບທັງໂຄງການ TDF 1-TDF 2 ທີ່ໄດ້ຊ່ວຍເຫຼືອໃນໄລຍະຜ່ານມາ.
ຕອນທ້າຍນີ້ ທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ສະແດງຄວາມຍິນດີ ຕໍ່ ທ່ານ ເອກອັກຄະລັດຖະທູດ ທີ່ໃຫ້ຄວາມຮ່ວມມືເປັນຢ່າງດີຕໍ່ການພົວພັນ ລາວ ແລະ ສະຫະພາບເອີຣົບ (EU) ແລະ ທ່ານ ນາງ ອີນາ ມາຈູລໍນີເເຕ ກໍ່ສະແດງຄວາມຂອບໃຈ ມາຍັງທ່ານລັດຖະມົນຕີ ກະຊວງ ອຄ ທີ່ໃຫ້ການຕ້ອນຮັບຢ່າງອົບອຸ່ນ ແລະ ດ້ວຍໄມຕີຈິດມິດຕະພາບ.
ພາບ ແລະ ຂ່າວ: ໄພຄຳອີ ວິໄລຄຳ
