ຕອນເຊົ້າ ເວລາ 10: 00 ໂມງ ຂອງວັນທີ 03 ພະຈິກ 2022 ທີ່ຫ້ອງປະຊຸມທາງໄກຊັ້ນ 3 ກະຊວງອຸດສາຫະກໍາ ແລະ ການຄ້າ, ທ່ານ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ໃຫ້ກຽດຕ້ອນຮັບການພົບປະເຮັດວຽກຂອງ ທ່ານ ເຈົ້າແຂວງໆຈໍາປາສັກ ພ້ອມຄະນະ, ມີຜູ້ຕາງໜ້າເຂົ້າຮ່ວມທັງສອງຝ່າຍ ປະມານ 35 ທ່ານ.
ໂອກາດນີ້ ທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ກໍ່ແດງຄວາມຍິນດີຕ້ອນຮັບຕໍ່ ທ່ານ ເຈົ້າແຂວງໆຈໍາປາສັກ ເພື່ອເຮັດໃຫ້ ສອງຝ່າຍໄດ້ເສີມຂະຫຍາຍການພົວພັນແລະ ຮ່ວມມືທີ່ດີ ຊຶ່ງກັນ ແລະ ກັນ, ທັງສອງຝ່າຍໄດ້ປຶກສາຫາລືທົບທວນຄືນຄວາມເຂົ້າໃຈຮ່ວມກັນໃນບົດບັນທຶກການຈັດຕັ້ງປະຕິບັດວຽກງານລະຫວ່າງ ແຂວງຈໍາປາສັກ ແລະ ກະຊວງ ອຄ ໃນໄລຍະຜ່ານມາ ເປັນຕົ້ນ ການພັດທະນາ SME ໂດຍສະເພາະການເຂົ້າເຖິງແຫຼ່ງທຶນ, ວຽກງານສົ່ງເສີມການຄ້າ (Made in Lao), ການວາງສະແດງສິນຄ້າ, ການນໍາເຂົ້າ ແລະ ສົ່ງອອກສິນຄ້າ, ການຜະລິດສິນຄ້າທີ່ເປັນທ່າແຮງ ແລະ ວຽກງານການທ່ອງທ່ຽວ ຂອງແຂວງຈໍາປາສັກ. ນອກນັ້ນຍັງໄດ້ປຶກສາຫາລືກັນໃນດ້ານວິຊາການ ທີ່ຈະສ້າງແຜນພັດທະນາ ແລະ ໂຄງການຮ່ວມມືໃນ 3 ປີ 2023-2025 ເພື່ອກ້າວໄປເຖິງການເຊັນບົດບັນທຶກຮ່ວມກັນ; ໃນນີ້: ທ່ານເຈົ້າແຂວງໆຈໍາປາສັກ ໄດ້ສະເໜີໃນຕໍ່ໜ້າ ຂໍການສະໜັບສະໜູນໃນວຽກງານຕ່າງໆທີ່ຕິດພັນກັບກະຊວງ ອຄ ໂດຍສະເພາະວຽກຊັບສິນທາງປັນຍາ ແລະ ວຽກມາດຕະຖານ ແລະ ວັດແທກ ທີ່ທາງກະຊວງ ອຄ ໄດ້ໂຮມມາຈາກກະຊວງວິທະຍາສາດ ແລະ ເຕັກໂນໂລຊີເກົ່າ, ຈະສືບຕໍ່ໃຫ້ການຮ່ວມມື ແລະ ຊ່ວຍເຫຼືອວຽກງານຕ່າງໆທີ່ມີຄວາມຕ້ອງການພັດທະນາ ຂອງແຂວງ ພ້ອມທັງຂອບໃຈມາຍັງທ່ານລັດຖະມົນຕີກະຊວງ ອຄ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ແລະ ໃຫ້ຄຳປຶກສາສິ່ງອຳນວຍຄວາມສະດວກໃນວຽກງານຫຼາຍດ້ານແກ່ ຄະນະ.
ຕອນທ້າຍ, ທ່ານລັດຖະມົນຕີ ກໍ່ສະແດງຄວາມຂອບໃຈທີ່ທ່ານເຈົ້າແຂວງໆຈໍາປາສັກ ໄດ້ມີຄໍາເຫັນຢ່າງກົງໄປກົງມາ ພ້ອມທັງອວຍພອນໄຊ ໃຫ້ທ່ານເຈົ້າແຂວງໆຈໍາປາສັກ ແລະ ຄະນະ ປະຕິບັດໜ້າທີ່ວຽກງານຂອງຕົນ ໄດ້ຮັບຜົນສໍາເລັດຢ່າງຈົບງາມ ສືບຕໍ່ໃຫ້ການຮ່ວມມືກັບກະຊວງ ອຄ ເພື່ອຈະໄດ້ເຊັນບົດບັນທຶກການຮ່ວມມືກັນອີກໃນຕໍ່ໜ້າ.
ພາບ-ຂ່າວ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຜຮ
