ໃນວັນທີ 30 ກັນຍາ 2022, ທີ່ໂຮງແຮມແລນມາກ ແມ່ຂອງລີເວີໄຊ, ກະຊວງອຸດສາຫະກໍາ ແລະ ການຄ້າ, ກົມການຄ້າພາຍໃນ, ພະແນກຄຸ້ມຄອງການແຂ່ງຂັນທາງທຸລະກິດ ໄດ້ຈັດກອງປະຊຸມເຜີຍແຜ່ກົດໝາຍວ່າດ້ວຍການແຂ່ງຂັນທາງທຸລະກິດ ໃຫ້ແກ່ພາກລັດ ແລະ ພາກທຸລະກິດ ໂດຍໃຫ້ກຽດເປັນປະທານຮ່ວມຂອງ ທ່ານ ບຸນເຖິງ ດວງສະຫວັນ ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ (ປະທານຄະນະກຳມະການຄວບຄຸມການແຂ່ງຂັນທາງທຸລະກິດ ຄຂທ) ແລະ ທ່ານ Frank Tibitanzl ຫົວໜ້າໂຄງການ GIZ-COMPETE, ໂດຍການສະໜັບສະໜູນຈາກ ອົງການ GIZ-COMPETE ລັດຖະບານເຢຍລະມັນ ໂດຍການມີສ່ວນຮ່ວມຂອງກະຊວງອຸດສາຫະກໍາ ແລະ ການຄ້າ. ມີຜູ້ເຂົ້າຮ່ວມຈາກບັນດາສະມາຄົມທີ່ຂຶ້ນກັບສະພາການຄ້າ ແລະ ອຸດສາຫະກໍາ ແຫ່ງຊາດລາວ, ສະພາການຄ້າຕ່າງປະເທດ, ບໍລິສັດທີ່ເປັນຜູ້ຕາງໜ້າ ແລະ ຕົວແທນທຸລະກິດໃນລາວ, ພະນກງານໂຄງການ GIZ ແລະ ຜູ້ຕາງໜ້າຈາກບັນດາກົມ, ພະແນກທີ່ກ່ຽວຂ້ອງພາຍໃນກະຊວງອຸດສາຫະກໍາ ແລະ ການຄ້າ ຈໍານວນ 100 ທ່ານ.
ທ່ານ ບຸນເຖິງ ດວງສະຫວັນ ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ກ່າວວ່າ ກອງປະຊຸມໃນຄັ້ງນີ້ ແມ່ນມີຄວາມໝາຍຄວາມສໍາຄັນຫລາຍ ແລະ ເພື່ອເປັນການຈັດຕັັ້ງຜັນຂະຫຍາຍ, ເຜີຍແຜ່ກົດໝາຍວ່າດ້ຍການແຂ່ງຂັນທາງທຸລະກິດ ສະບັດເລກທີ 60/ສພຊ, ລົງວັນທີ 14 ກໍລະກົດ 2015, ຊຶ່ງວຽກງານການແຂ່ງຂັນທາງທຸລະກິດ ເປັນສ່ວນຫນຶ່ງທີ່ຊຸກຍູ້, ສົ່ງເສີມໃຫ້ການດໍາເນີນທຸລະກິດ ໃຫ້ມີຄວາມເປັນທໍາ, ຕ້ານ ແລະ ສະກັດກັ້ນການແຂ່ງຂັນທີ່ບໍ່ເປັນທຳ, ການຈຳກັດການແຂ່ງຂັນ, ການລວມຕົວທາງເສດຖະກິດ ແລະ ເພື່ອແນໃສ່ເຮັດໃຫ້ພາກທຸລະກິດສາມາດກໍາໄດ້ ແລະ ເຂົ້າໃຈກ່ຽວກັບວຽກງານດັ່ງກ່າວ, ທ່ານປະທານຍັງກ່າວຕື່ມວ່າ ຮຽກຮ້ອນໃຫ້ຜູ້ເຂົ້າຮ່ວມພ້ອມກັນປຶກສາຫາລື, ແລກປ່ຽນຄໍາຄິດເຫັນ, ສ້າງຄວາມເຂົ້າໃຈກ່ຽວກັບວຽກງານດັ່ງກ່າວ ແລະ ວຽກງານທີ່ປິ່ນອ້ອມ. ຜູ້ເຂົ້າຮ່ວມຍັງໄດ້ຮັບຟັງການລາຍງານການຈັດຕັ້ງປະຕິບັດໄລຍະຜ່ານມາ, ການສະຫຼຸບ, ລາຍງານ, ສ້າງຄວາມເຂົ້າໃຈ ແລະ ແລກປ່ຽນຄວາມຄິດເຫັນນໍາກັນປະກອບດ້ວຍ: 1. ອົງການຄຸ້ມຄອງ ແລະ ກົດໝາຍວ່າດ້ວຍ ການແຂ່ງຂັນທາງທຸລະກິດ; 2. ການແຂ່ງຂັນທາງທຸລະກິດທີ່ບໍ່ເປັນທໍາ; 3. ວຽກງານຊັບສິນທາງປັນຍາ; 4. ການຕົກລົງກັນເພື່ອຈໍາກັດການແຂ່ງຂັນທາງທຸລະກິດ; 5. ການສວຍໃຊ້ການຄອບຄອງຕະຫຼາດ ແລະ ການຜູກຂາດຕະຫຼາດ; 6. ການລວມຕົວເພື່ອຈໍາກັດການແຂ່ງຂັນທາງທຸກິດ; 7. ພັນທະຂອງພາກທຸລະກິດຕໍ່ກັບວຽກງານການແຂ່ງຂັນທາງທຸລະກິດ.
ພາຍຫຼັງຮັບຟັງການບັນຍາຍໃນຫົວຂໍ້ຕ່າງໆກ່ຽວກັບວຽກງານການແຂ່ງຂັນທາງທຸລະກິດ ໄດ້ເຮັດໃຫ້ຜູ້ເຂົ້າຮ່ວມສາມາດເຂົ້າໃຈ, ກຳໄດ້ເນື້້ອໃນສຳຄັນ ແລະ ຄວາມຮູ້ທາງດ້ານວິຊາການ, ຊຶ່ງທັງໝົດນີ້ໄດ້ເປັນການຍົກສູງຄວາມຮູ້ ແລະ ປະສົບການຂອງຜູ້ເຂົ້າຮ່ວມໃຫ້ສູງຂື້ນຕື່ມອີກກ້າວຫນຶ່ງ, ທີ່ສຳຄັນແມ່ນຈະໄດ້ນຳເອົາເນື້ອໃນຈິດໃຈຂອງກອງປະ ຊຸມໄປນຳໃຊ້ເຂົ້າໃນວຽກງານການແຂ່ງຂັນທາງທຸລະກິດທີ່ໄດ້ຮັບມອບຫມາຍ ເພື່ອສົ່ງເສີມການແຂ່ງຂັນທີ່ເປັນທຳ ພາຍໃຕ້ກົດໝາຍ ແລະ ລະບຽບການ.
ຕອນທ້າຍກອງປະຊຸມ ປະທານຍັງໄດ້ຮຽກຮ້ອງໃຫ້ຜູ້ເຂົ້າຮ່ວມກອງປະຊຸມໃນຄັ້ງນີ້ຈົ່ງເອົາໃຈໃສ່ຄົ້ນຄວ້າ, ຕິດຕາມ, ປະກອບຄໍາເຫັນ, ກໍາໄດ້ ແລະ ເຂົ້າໃຈເນື້ອໃນ ທີ່ສໍາຄັນແມ່ນສາມາດນໍາເອົາບັນດາເນື້ອໃນທີ່ໄດ້ຈາກກອງປະຊຸມເຜີຍແຜ່ໃນຄັ້ງນີ້ ນໍາໃຊ້ເຂົ້າໃນການດໍາເນີນທຸລະກິດຂອງຕົນ ໃຫ້ຖືກຕ້ອງຕາມລະບຽບກົດໝາຍ ແລະ ເກີດດອກອອກຜົນ, ເຮັດໃຫ້ການຈັດຕັ້ງປະຕິບັດວຽກງານນີ້ໃຫ້ມີການຂະຫຍາຍຕົວ ແລະ ມີປະສິດທິຜົນ ເພື່ອຜົນປະ ໂຫຍດລວມຂອງປະເທດຊາດ ແລະ ປະຊາຊົນລາວເຮົາທຸກຄົນ
ພາບ ແລະ ຂ່າວ: ໄພວັນ ໂຄດວັນທາ
