ໃນລະຫວ່າງວັນທີ 13-18 ກັັນຍາ 2022, ທ່ານ ມະໄລທອງ ກົມມະສິດ, ລັດຖະມົນຕີກະຊວງອຸດສາຫະກໍາ ແລະ ການຄ້າ ທັງເປັນລັດຖະມົນຕີເສດຖະກິດອາຊຽນຂອງ ສປປ ລາວ ໄດ້ນຳພາຄະນະຜູ້ແທນ ສປປ ລາວ ເຂົ້າຮ່ວມກອງປະຊຸມລັດຖະມົນຕີເສດຖະກິດອາຊຽນ ຄັ້ງທີ 54 ແລະ ກອງປະຊຸມອື່ນໆທີ່ກ່ຽວຂ້ອງ ທີ່ ສຽມຣຽບ, ກໍາປູເຈຍ. ພາຍໃຕ້ການເປັນປະທານຂອງ ທ່ານ Pan Sorasak, ລັດຖະມົນຕີກະຊວງການຄ້າ ກໍາປູເຈຍ ໃນຖານະປະທານໝູນວຽນອາຊຽນ ໃນປີ 2022.
ກອງປະຊຸມຄັ້ງນີ້ ບັນດາລັດຖະມົນຕີເສດຖະກິດອາຊຽນ ໄດ້ພົບປະ ແລະ ແລກປ່ຽນທັດສະນະຮ່ວມກັນ ກ່ຽວກັບ ສະພາບເສດຖະກິດພາຍໃນອາຊຽນ ກໍຄືການຟື້ນຟູເສດຖະກິດພາຍຫຼັງທີ່ໄດ້ຮັບຜົນກະທົບຈາກການແຜ່ລະບາດ ຂອງພະ ຍາດໂຄວິດ-19, ການພັດທະນາການຄ້າໃນພາກພື້ນ ແລະ ສາກົນ, ການຈັດຕັ້ງປະຕິບັດແຜນແມ່ບົດປະຊາຄົມເສດຖະ ກິດອາຊຽນ 2025, ແຜນວຽກບູລິມະສິດພາຍໃຕ້ເສົາຄໍ້າເສດຖະກິດອາຊຽນ ທີ່ສະເໜີໂດຍກໍາປູເຈຍ ໃນນາມເປັນປະທານອາຊຽນປີ 2022, ການສົ່ງເສີມການພົວພັນເສດຖະກິດລະຫວ່າງອາຊຽນກັບພາຍນອກ, ການຄ້າດ້ານເອເລັກໂຕຣນິກ ແລະ ເສດຖະກິດດິຈິຕອນ, ຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ ແລະ ການຫຼຸດຜ່ອນຄວາມແຕກໂຕນດ້ານການພັດທະນາ, ເຊິ່ງລວມມີກອງປະຊຸມທັງໝົດ 21 ກອງປະຊຸມ ເຊັ່ນ: ກອງປະຊຸມສະພາເຂດການຄ້າເສລີອາຊຽນ ຄັ້ງທີ 36, ກອງປະຊຸມສະພາເຂດການລົງທຶນອາຊຽນ ຄັ້ງທີ 25, ກອງປະຊຸມລັດຖະມົນຕີເສດຖະ ກິດອາຊຽນຄັ້ງທີ 54, ກອງປະຊຸມປຶກສາຫາລືລະຫວ່າງລັດຖະມົນຕີເສດຖະກິດອາຊຽນ ແລະ ຄູ່ຮ່ວມເຈລະຈາ ເຊັ່ນ: ສປ ຈີນ, ສ. ເກົາຫຼີ, ຍີ່ປຸ່ນ, ອາຊຽນບວກສາມ, ຮົງກົງ, ອິນເດຍ, ອົດສະຕາລີ-ນິວຊີແລນ, ອີຢູ, ລັດເຊຍ, ອາເມລິກາ, ອັງກິດ, ການາດາ ແລະ ກອງປະຊຸມລັດຖະມົນຕີເສດຖະກິດອາຊີຕາເວັນອອກ. ນອກນັ້ນ, ຍັງມີກອງປະຊຸມລະຫວ່າງລັດຖະມົນຕີເສດຖະກິດອາຊຽນ ກັບສະພາທີ່ປຶກສາທຸລະກິດອາຊຽນ, ກອງປະຊຸມລັດຖະມົນຕີເສດຖະກິດກໍາປູເຈຍ-ລາວ-ມຽນມາ-ຫວຽດນາມ ຄັ້ງທີ 14, ກອງປະຊຸມລັດຖະມົນຕີສັນຍາຮ່ວມມືເສດຖະກິດແບບຮອບດ້ານລະດັບພາກພື້ນ (RCEP) ຄັ້ງປະຖົມມະເລີກ; ພ້ອມທັງການພົບປະແບບສອງຝ່າຍລະຫວ່າງ ທ່ານ ລັດຖະມົນຕີ ມະໄລທອງ ກົມມະສິດ ຮ່ວມກັບ ບັນດາລັດຖະມົນຕີ ຈາກປະເທດສະມາຊິກອາຊຽນ ແລະ ບັນດາຄູ່ຮ່ວມຕ່າງໆ ລວມທັງ ທ່ານ ເລຂາທິການໃຫ່ຍຂາອາຊຽນ.
ໂອກາດເຂົ້າຮ່ວມກອງປະຊູມຄັ້ງນີ້, ບັນດາລັດຖະມົນຕີເສດຖະກິດອາຊຽນ ຍັງໄດ້ປຶກສາຫາລື ແລະ ໃຫ້ຄວາມສຳຄັນ ກ່ຽວກັບການສືບຕໍ່ຮັກສາລະດັບການເປີດຕະຫຼາດການຄ້າ ແລະ ການລົງທຶນໃນພາກພື້ນ ເພື່ອຮັບປະກັບຄວາມຕໍ່ເນື່ອງຂອງກົນໄກຕ່ອງໂສ້ການສະໜອງໃຫ້ສາມາດດໍາເນີນຢ່າງເປັນປົກກະຕິ ໂດຍໄດ້ເພີ່ມຂອບເຂດ ແລະ ຈໍານວນຂອງບັນຊີລາຍການສິນຄ້າທີ່ເຫັນວ່າຈໍາເປັນ ສໍາລັບການຮ່ວມມືໃນໄລຍະການຟື້ນຟູເສດຖະກິດພາຍຫລັງການແຜ່ລະບາດຂອງເຊື້ອພະຍາດໂຄວິດ-19 ໂດຍບໍ່ສ້າງມາດຕະການທີ່ເປັນອຸປະສັກຕໍ່ການຄ້າ-ການລົງທຶນ ຮັບປະກັນໃຫ້ມີການໝູນວຽນຂອງສິນຄ້າເຫລົ່ານີ້ ພາຍໃນພາກພື້ນອາຊຽນໃຫ້ມີຄວາມສະດວກ ທັງນີ້ກໍ່ເພື່ອເປັນການສ້າງຄວາມເຂັ້ມແຂງໃຫ້ແກ່ການຮ່ວມມືເສດຖະກິດອາຊຽນ, ຊຸກຍູ້ໃຫ້ມີການຜະລິດໃນອາຊຽນ, ແລະ ສົ່ງເສີມການຄ້າ-ການລົງທຶນໃນອາຊຽນໃຫ້ນັບມື້ນັບຫລາຍຂຶ້ນເທື່ອລະກ້າວ.
ກອງປະຊຸມຄັ້ງນີ້, ບັນດາລັດຖະມົນຕີເສດຖະກິດອາຊຽນ ໄດ້ຮັບຮອງເອົາເອກະສານ ສໍາຄັນຄື: (1) ເອກະສານຄູ່ມືດ້ານນະໂຍບາຍ ກ່ຽວກັບ ການສ້າງຄວາມເຂັມແຂງໃຫ້ທຸລະກິດຍິງ ຢູ່ໃນນະໂຍບາຍແຫ່ງຊາດ ແລະ ແຜນດໍາເນີນງານ ວ່າດ້ວຍຈຸ ລະວິສາຫະກິດ ແລະ ວິສາຫະກິດຂະໜາດນ້ອຍ ແລະ ກາງ, ແລະ (2) ເອກະສານຫຼັກການພື້ນຖານ ສໍາລັບການເຈລະຈາສັນຍາຂອບວຽກວ່າດ້ວຍການແຂ່ງຂັນ.
ແຫຼ່ງຂ່າວ: ກອງເລຂາ
ຮຽບຮຽງ : ໄພວັນ ໂຄດວັນທາ
