ໃນຕອນເຊົ້າເວລາ 11:00 ໂມງ ຂອງວັນທີ 22 ສິງຫາ 2022, ທີ່ຫ້ອງຮັບແຂກໃຫຍ່ ຊັ້ນ 4 ກະຊວງອຸດສາຫະກໍາ ແລະ ການຄ້າ, ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກໍາ ແລະ ການຄ້າ ແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ ລີ ຢົງ ຊົນ, ເອກອັກຄະລັດຖະທູດ ສປປ ເກົາຫລີ ປະຈໍາ ສປປ ລາວ ໃນໂອກາດເຂົ້າພົບປະເນື່ອງໃນໂອກາດທີ່ທ່ານໄດ້ຮັບການແຕ່ງຕັ້ງ ເປັນລັດຖະມົນຕີກະຊວງອຸດສາຫະກໍາ ແລະ ການຄ້າ ຜູ້ໃໝ່ ແລະ ປຶກສາຫາລືເພື່ອຊອກຫາໂອ ກາດໃນການເສີມຂະຫຍາຍການຮ່ວມມືເສດ ຖະກິດ, ການຄ້າ ແລະ ອຸດສາຫະກຳ ພາຍຫລັງການລະບາດຂອງພະຍາດ ໂຄວິດ-19 ໂດຍສະເພາະສິນຄ້າກະສິກຳ ເຊັ່ນ: ຫມາກໄມ້, ຢາງພາລາ ແລະ ສິນຄ້າປະເພດເຄື່ອງເຟີນີເຈີ. ນອກນັ້ນ ຍັງໄດ້ປຶກສາຫາລືກ່ຽວກັບການສືບຕໍ່ ຈັດກອງປະຊຸມຄະນະກຳມາທິການຮ່ວມມືເສດຖະກິດການຄ້າ, ວິທະຍາສາດ ແລະ ເຕັກໂນໂລຊີ (JC) ຄັ້ງທີ 4 ເຊິ່ງ ສປປ ເກົາຫລີ ຈະເປັນເຈົ້າພາບ ເຊິ່ງເປັນກຽດເຂົ້າຮ່ວມຂອງບັນດາ ທ່ານຫົວໜ້າ-ຮອງຫົວໜ້າກົມ ກ່ຽວຂ້ອງອ້ອມຂ້າງກະຊວງ.
ໂອກາດນີ້ ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກໍາ ແລະ ການຄ້າ ກໍ່ໄດ້ສະ ແດງຄວາມຂອບໃຈມາຍັງ ທ່ານ ລີ ຢົງ ຊົນ, ເອກອັກຄະລັດຖະທູດ ສປປ ເກົາຫລີ ປະຈໍາ ສປປ ລາວ ທີ່ໄດ້ໃຫ້ ການສະໜັບສະໜູນ ແລະ ສົ່ງເສີມ ວຽກງານອຸດສາຫະກຳ ແລະ ການຄ້າ ພ້ອທັງຝາກຄວາມຢ້ຽມຢາມຖາມຂ່າວໄປຍັງ ທ່ານລັດຖະມົນຕີເສດຖະກິດຕ່າງປະເທດ, ຊຶ່ງໃນ 7 ເດືອນ ຕົ້ນປີ 2022 ມູນຄ່າການຄ້າສອງຝ່າຍ ລາວ-ສປປ ເກົາຫລີ ບັນລຸໄດ້ 28.467 ໂດລາສະຫະລັດ. ໃນນັ້ນ, ມູນຄ່າການນໍາເຂົ້າບັນລຸໄດ້ 21.667 ໂດລາສະຫະລັດ ແລະ ມູນຄ່າການສົ່ງອອກບັນລຸໄດ້ 6.800 ໂດລາສະຫະລັດ.
- ສິນຄ້າຫຼັກທີ່ ສປປ ລາວ ນໍາເຂົ້້າຈາກ ສປປ ເກົາຫລີ ໃນ 7 ເດືອນ ຕົ້ນປີ 2022 ປະກອບມີ: ຊິ້ນສ່ວນອາໄຫຼ່ລົດ (ລວມທັງຢາງ, ແວ່ນ, ໂສ້…); ອຸປະກອນກົນຈັກ (ນອກຈາກເຄື່ອງກົນຈັກພາຫະນະ); ພາຫະນະທາງບົກ (ນອກຈາກລົດຈັກ,ລົດໄຖ);ເຫຼັກ ແລະ ເຄື່ອງທີ່ເຮັດດ້ວຍເຫຼັກ, ເຫຼັກກ້າ; ເຄື່ອງໄຟຟ້າ ແລະ ອຸປະກອນໄຟຟ້າ ແລະ ສິນຄ້າອື່ນໆ.
- ສິນຄ້າຫຼັກທີ່ ສປປ ລາວ ສົ່ງອອກໄປ ສປປ ເກົາຫລີ ໃນ 7 ເດືອນ ຕົ້ນປີ 2022 ປະກອບມີ: ຖ່າານດຳ, ຖ່ານຂາວ ແລະ ສິນຄ້າອື່ນໆ.
ການລົງທຶນທົ່ວໄປ ເລີ່ມແຕ່ປີ 2008 ມາຮອດປັດຈຸບັນ ການລົງທຶນ ຂອງ ສປປ ເກົາຫລີ ໃນ ສປປ ລາວ ມີພຽງແຕ່ 1 ຫົວໜ່ວຍວິສາຫະກິດ ແລະ ມີມູນຄ່າລົງທຶນພຽງ 800 ລ້ານກີບ ໂດຍລົງທຶນໃນຂະແໜງການບໍລິການດ ແລະ ຄູ້ມຄອງບໍລິຫານ.
ໃນຕອນທ້າຍ ທ່ານ ທ່ານ ລີ ຢົງ ຊົນ, ເອກອັກຄະລັດຖະທູດ ສປປ ເກົາຫລີ ປະຈໍາ ສປປ ລາວ ໄດ້ສະແດງຄວາມຍິນດີຕໍ່ ທ່ານ ລັດຖະມົນຕີ ທີ່ໄດ້ມາຮັບຕໍາແໜ່ງໜ້າທີ່ໃໝ່ ແລະ ເຊື່ອໝັ້ນວ່າ ໃນຕໍ່ໜ້າຈະເຮັດໃຫ້ການຮ່ວມມືທາງດ້ານເສດຖະກິການຄ້າ ແລະ ອຸດສາຫະ ກຳ ລະຫວ່າງ ສປປ ລາວ – ສປປ ເກົາຫລີ ໃຫ້ນັບມື້ນັບຂະຫຍາຍຕົວເພີ່ມຂື້ນ ເພື່ອໃຫ້ເກີດຜົນປະໂຫຍດສູງສຸດໃຫ້ແກ່ສອງປະເທດໃນຕໍ່ໜ້າ.
ຂ່າວ: ວັນນະໄຊ ສຸກຂະເສີມ
ພາບ: ກອງເລຂາ
