ຕອນບ່າຍ ເວລາ 15: 30 ໂມງ ຂອງວັນທີ 29 ພະຈິກ 2021 ທີ່ຫ້ອງຮັບແຂກໃຫຍ່ຊັ້ນ 4 ກະຊວງອຸດສາຫະກໍາ ແລະ ການຄ້າ, ທ່ານ ປອ. ຄໍາແພງ ໄຊສົມແພງ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ແຫ່ງ ສປປ ລາວ ໄດ້ໃຫ້ກຽດຕ້ອນຮັບ ການເຂົ້າຢ້ຽມຂໍ່ານັບຂອງ ທ່ານ ນ Le Thi Phuong Hoa , ທີ່ປຶກສາທູດເສດຖະກິດ-ການຄ້າ ແຫ່ງ ສສ ຫວຽດນາມ ປະຈຳ ສປປ ລາວ ພ້ອມດ້ວຍຄະນະ ເນື່ອງໃນໂອກາດມາຮັບໜ້າທີ່ທາງການທູດປະຈໍາຢູ່ລາວ ແລະ ມີຜູ້ຕາງໜ້າເຂົ້າຮ່ວມທັງສອງຝ່າຍ ປະມານ 13 ທ່ານ.
ໂອກາດນີ້ ທ່ານ ປອ. ຄໍາແພງ ໄຊສົມແພງ ລັດຖະມົນຕີ ກະຊວງ ອຄ ກໍ່ແດງຄວາມຍິນດີຕໍ່ ທ່ານ Le Thi Phuong Hoa, ທີ່ໄດ້ມາດຳລົງຕຳແໜ່ງທີ່ປຶກສາທູດ ຊຶ່ງຈະເຮັດໜ້າທີ່ດ້ານການທູດໃຫ້ແກ່ ສອງປະເທດ ລະຫວ່າງ ລາວ-ຫວຽດນາມ ຮັດແໜ້ນຂຶ້ນ, ສອງຝ່າຍໄດ້ປຶກສາຫາລື ຄວາມເຂົ້າໃຈຮ່ວມກັນ ເສີມສ້າງສາຍພົວພັນຮ່ວມມືຊຶ່ງກັນ ແລະ ກັນ; ໄລຍະຜ່ານມາທັງສອງຝ່າຍໄດ້ຕີລາຄາສູງຕໍ່ການພົວພັນຮ່ວມມືທີ່ດີ ລະຫວ່າງ ສປປ ລາວ – ສສ ຫວຽດນາມ ເຖິງແມ່ນວ່າໃນໄລຍະຜ່ານມາການແຜ່ລະບາດພະຍາດໂຄວິດ-19 ເຮັດໃຫ້ສອງປະເທດພົບຄວາມຫຍຸ້ງຍາກໃນຫຼາຍດ້ານ ແຕ່ກໍ່ຈະບຸກບືນໃຫ້ຜ່ານພົ້ນໄປ, ພ້ອມດຽວກັນນີ້ ທັງສອງຝ່າຍຍັງສົ່ງເສີມການເພີ່ມຜະລິດຕະພາບ ອັນດີງາມໃນຂົງເຂດພາກລັດ ແລະ ພາກທຸລະກິດ ລະຫວ່າງ ສອງປະເທດ ໃຫ້ມີການຄ້າຮ່ວມກັນ ໂດຍສະເພາະສິນຄ້າການນໍາເຂົ້າ-ສົ່ງອອກເພີ້ມຂຶ້ນໃນອະນາຄົດ; ເຖິງຢ່າງໃດກໍ່ຕາມ ເພື່ອເຮັດໃຫ້ການຮ່ວມມືທາງດ້ານອຸດສາຫະກຳ ແລະ ການຄ້າ ຂອງສອງຝ່າຍ ໃຫ້ຂະຫຍາຍຕົວຂຶ້ນໃນອະນາຄົດ ທັງສອງຝ່າຍໄດ້ຮ່ວມກັນປຶກສາ ແລະ ແລກປ່ຽນຂໍ້ມູນ ກ່ຽວກັບສະພາບການພັດທະນາ ແລະ ດຳເນີນທຸລະກິດ ຂອງບັນດາທຸລະກິດ ຂອງສອງປະເທດ ເພື່ອໃຫ້ມີການພົວພັນທາງດ້ານທຸລະກິດຮ່ວມກັນໃຫ້ຫລາຍຂຶ້ນ; ໃນນີ້ ທ່ານທີ່ປຶກສາທູດເສດຖະກິດ-ການຄ້າໄດ້ ສະແດງຄວາມຊົມເຊີຍຕໍ່ທ່ານລັດຖະມົນຕີ ໃນໄລຍະຜ່ານມາໄດ້ຊຸກຍູ້ສົ່ງເສີມ ການພັດທະນາເສດຖະກິດ-ການຄ້າ ຂອງ ສປປ ລາວ ແລະ ສສ ຫວຽດນາມ ໃຫ້ເຕີບໃຫຍ່ຂະຫຍາຍຕົວຢ່າງໄວວາ ແລະ ໃຫ້ຄໍາໝັ້ນສັນຍາໃນຕໍ່ໜ້າຈະໃຫ້ການຮ່ວມມື, ໃຫ້ຄຳປຶກສາສິ່ງອຳນວຍຄວາມສະດວກໃນວຽກງານຫຼາຍດ້ານແກ່ ສປປ ລາວ; ພ້ອມທັງ ສະແດງທ່າທີການຮັດແໜ້ນສາຍພົວພັນທີ່ມູນເຊື້ອອັນດີງາມຕະຫຼອດມາ ແລະ ອວຍພອນໄຊໃນວັນຊາດທີ 2 ທັນວາ ຄົບຮອບ 46 ປີ ຂອງສປປ ລາວທີ່ຈະມາເຖິງນີ້ ໃຫ້ປະເທດລາວມີຄວາມຈະເລີນຮຸ່ງເຮືອງ, ປະຊາຊົນມີຄວາມຜາສຸກ ແລະ ຂະແໜງອຸດສາຫະກໍາ ແລະ ການຄ້າເຕີບໃຫຍ່ຂະຫຍາຍຕົວໃນຕໍ່ໜ້າ.
ໃນຕອນທ້າຍ ທ່ານ ລັດຖະມົນຕີ ກະຊວງ ອຄ ສະແດງຄວາມຂອບໃຈຕໍ່ ທ່ານທີ່ປຶກສາທູດເສດຖະກິດ-ການຄ້າ ແຫ່ງ ສສ ຫວຽດນາມ ປະຈໍາ ສປປ ລາວ ໃນການຮ່ວມມືເປັນຢ່າງດີ ແລະ ທ່ານ ທີ່ປຶກສາທູດເສດຖະກິດ-ການຄ້າ ກໍ່ສະແດງຄວາມຂອບໃຈ ມາຍັງ ທ່ານລັດຖະມົນຕີ ທີ່ໃຫ້ການຕ້ອນຮັບຢ່າງອົບອຸ່ນ ແລະ ດ້ວຍໄມຕີຈິດມິດຕະພາບທີ່ສະໜິດແໜ້ນ.
ພາບ-ຂ່າວໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຜຮ