ລະຫວ່າງວັນທີ 11-17 ກຸມພາ 2018 ທ່ານ ນ. ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກຳ ແລະ ການຄ້າ ພ້ອມດ້ວຍຄະນະຜູ້ຕາງໜ້າຈາກ ຫ້ອງການກະຊວງ, ກົມການນຳເຂົ້າ ແລະ ສົ່ງອອກ, ກົມອຸດສາຫະກຳ ແລະ ຫັດຖະກຳ, ກົມການຄ້າພາຍໃນ, ກົມແຜນການ ແລະ ການຮ່ວມມື, ກົມທະບຽນ ແລະ ຄຸ້ມຄອງວິສາຫະກິດ ແລະ ກົມສົ່ງເສີມການຄ້າ ໄດ້ເຄື່ອນໄຫວຢ້ຽມຢາມ ແລະ ເຮັດວຽກຢູ່ 3 ແຂວງພາກເໜືອເຊັ່ນ: ແຂວງຜົ້ງສາລີ, ຫຼວງນ້ຳທາ ແລະ ອຸດົມໄຊ.
ໃນໄລຍະການເຄື່ອນໄຫວດັ່ງກ່າວ, ທ່ານ ລັດຖະມົນຕີ ກະຊວງອຸດສາຫະກຳ ແລະ ການຄ້າ ໄດ້ເຂົ້າຮ່ວມເປັນປະທານ ກອງປະຊຸມ ເຜີຍແຜ່ ແລະ ຜັນຂະຫຍາຍແຜນພັດທະນາວິສາຫະກິດຂະໜາດນ້ອຍ ແລະ ກາງ ປີ 2016-2020 ຂອງບັນດາແຂວງພາກເໜືອ ໃນຕອນເຊົ້າຂອງວັນທີ 12 ກຸມພາ 2018 ຊຶ່ງຈັດຂຶ້ນໂດຍກົມສົ່ງເສີມວິສາຫະກິດຂະໜາດນ້ອຍ ແລະ ກາງ ຮ່ວມກັບ ພະແນກອຸດສາຫະກຳ ແລະ ການຄ້າແຂວງອຸດົມໄຊ ໂດຍມີຄະນະກົມ, ຄະນະພະແນກ, ວິຊາການຈາກກະຊວງ, ສະພາປະຊາຊົນບັນດາແຂວງ ພາກເໜືອ, ພະແນກ ອຄ ແຂວງພາກເໜືອ ແລະ ພະແນກ ອຄ ແຂວງບໍລິຄຳໄຊ, ບັນດາຫ້ອງການອຸດສາຫະກຳ ແລະ ການຄ້າເມືອງ ແຂວງອຸດົມໄຊ ແລະ ສະພາການຄ້າ ແລະ ອຸດສາຫະກໍາແຂວງ ພາກເໜືອເຂົ້າຮ່ວມຢ່າງພ້ອມພຽງ. ຈຸດປະສົງຂອງກອງປະຊຸມຄັ້ງນີ້ແມ່ນເພື່ອລາຍງານສະພາບປັດຈຸບັນ, ຜົນສຳເລັດ, ບັນຫາ ແລະ ສິ່ງທ້າທ້າຍ ແລະ ເປັນການແລກປ່ຽນບົດຮຽນ ກ່ຽວກັບວຽກງານສົ່ງເສີມວິສາຫະກິດຂະໜາດນ້ອຍ ແລະ ກາງ ຂອງບັນດາພະແນກ ອຄ ແຂວງ ພາກເໜືອ.
ໃນຕອນເຊົ້າວັນທີ 13 ກຸມພາ, ທ່ານ ລັດຖະມົນຕີກະຊວງອຸດສາຫະກຳ ແລະ ການຄ້າ ພ້ອມຄະນະ ໄດ້ເຄື່ອນໄຫວພົບປະເຮັດວຽກ ກັບພະນັກງານພະແນກ ອຄ ແຂວງຜົ້ງສາລີ ແລະ ເຂົ້າຢ້ຽມຂໍ່ານັບ ທ່ານເຈົ້າແຂວງ ແຂວງຜົ້ງສາລີ ທີ່ຫ້ອງວ່າການປົກຄອງ ແຂວງຜົ້ງສາລີ;
ຕອນບ່າຍ ຂອງມື້ດຽວກັນ ທ່ານ ນ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກຳ ແລະ ການຄ້າ ພ້ອມຄະນະ ໄດ້ໄປຢ້ຽມຢາມພື້ນຖານການຜະລິດໂຮງງານປຸງແຕ່ງຊາພະຍາສີ ແລະ ສວນປູກໃບຊາ 400 ປີ ຂອງປະຊາຊົນ ບ້ານຈ່າພູ ເມືອງຜົ້ງສາລີ;
ຕອນບ່າຍວັນທີ 14 ກຸມພາ 2018, ທ່ານ ລັດຖະມົນຕີກະຊວງອຸດສາຫະກຳ ແລະ ການຄ້າ ພ້ອມຄະນະໄດ້ເຂົ້າຢ້ຽມຂໍ່ານັບ ທ່ານເຈົ້າແຂວງ ແຂວງຫຼວງນ້ຳທາ ແລະ ເຄື່ອນໄຫວພົບປະເຮັດວຽກ ກັບພະນັກງານພະແນກ ອຄ ແຂວງຫລວງນ້ຳທາ;
ໃນຕອນເຊົ້າ ຂອງວັນທີ 15 ກຸມພາ ລົງຢ້ຽມຢາມພື້ນຖານການຜະລິດຢາງພາລາ ລວມມີສວນປູກ ແລະ ໂຮງງານປຸງແຕ່ງຢາງພາລາ ທີ່ກຸ່ມບໍລິສັດຢຸນໜານ ໜົງເຂີນ ຂອງ ສປ ຈີນ ເປັນຜູ້ລົງທຶນໃນໂຄງການການປູກພືດທົດແທນການປູກຝິ່ນ ຂອງສອງລັດຖະບານ ໄດ້ຕົກລົງໃຫ້ການຊ່ວຍເຫຼືອຊຶ່ງກັນ ແລະ ກັນ ທີ່ຕ່າງຝ່າຍຕ່າງມີຜົນປະໂຫຍດ; ພ້ອມທັງ ເປັນປະທານມອບຜ້າຫົ່ມກັນໜາວ ໃຫ້ແກ່ກຳມະກອນປູກຕົ້ນຢາງພາລາ ຂອງບໍລິສັດດັ່ງກ່າວ.
ຕອນບ່າຍຂອງວັນດຽວກັນ ໄດ້ລົງຢ້ຽມຢາມໂຮງງານປຸງແຕ່ງໄມ້ ຊ່ວນໄຊ້ ຈໍາກັດ ຊຶ່ງເປັນໂຮງງານຂະໜາດໃຫຍ່ ຂອງແຂວງອຸດົມໄຊ ໂຮງງານດັ່ງກ່າວມີພະນັກງານກຳມະກອນ 300 ກວ່າຄົນ,ໃນນັ້ນ 50 ຄົນແມ່ນຊ່າງເຕັກນິກວິຊາການມາຈາກ ປະເທດຈີນ; ມີການນຳໃຊ້ເຄື່ອງມີການຜະລິດທີ່ທັນສະໄໝ ແລະ ສົ່ງອອກຜະລິດຕະພັນໄມ້ສໍາເລັດຮູບໄປ ສປ ຈີນ.
ຕອນເຊົ້າ ຂອງວັນທີ 16 ກຸມພາ 2018, ທ່ານ ລັດຖະມົນຕີກະຊວງອຸດສາຫະກຳ ແລະ ການຄ້າ ພ້ອມຄະນະໄດ້ເຄື່ອນໄຫວພົບປະເຮັດວຽກ ກັບພະນັກງານພະແນກ ອຄ ແຂວງອຸດົມໄຊ ທີ່ຫ້ອງປະຊຸມຂອງໂຮງແຮມມິດຕະພາບ;
ຕອນບ່າຍຂອງວັນດຽວກັນ, ໄດ້ໄປຢ້ຽມຊົມແຫຼ່ງທ່ອງທ່ຽວທຳມະຊາດ ນ້ຳກັດ ຢໍ່ລະປ່າ ແລະ ຫ້ອງວາງສະແດງສິນຄ້າ ໂອດ໋ອບ ຂອງແຂວງອຸດົມໄຊ ໂດຍໄດ້ຮັບການຊ່ວຍເຫຼືອຈາກອົງການ JICA ປະຈຳ ສປປ ລາວ.
ຕອນເຊົ້າຂອງວັນທີ 17 ກຸມພາ 2018, ທ່ານ ລັດຖະມົນຕີກະຊວງອຸດສາຫະກຳ ແລະ ການຄ້າ ພ້ອມຄະນະໄດ້ຮ່ວມກັບພະນັກງານ ພະແນກ ອຄ ແຂວງຫຼວງພະບາງ ໄປຢ້ຽມຢາມຊຸມຊົນຫັດຖະກໍາ ຕໍ່າຫູກ-ຕໍ່າແຜ່ນແພພື້ນເມືອງ; ຕອນບ່າຍຂອງວັນດຽວກັນ ທ່ານ ລັດຖະມົນຕີ ພ້ອມຄະນະເດີນທາງກັບຄືນນະຄອນຫລວງວຽງຈັນ.
[ຂ່າວໂດຍ: ນາງ ຖື]
