ໃນວັນທີ 8 ກຸມພາ 2018 ນີ້ຢູ່ທີ່ພະແນກອຸດສາຫະກຳ ແລະ ການຄ້າແຂວງໄດ້ຈັດພິທີປະກາດບົ່ງຕົວແຕ່ງຕັ້ງ ຄະນະພັກພາຍໃນຂົງເຂດຕົນ. ໂດຍການເປັນກຽດເຂົ້າຮ່ວມຂອງ ສະຫາຍ ຄໍາຜົງ ວົງພະຈັນ ຄະນະປະຈຳພັກແຂວງ ປະທານກວດກາພັກ – ລັດແຂວງ, ສະຫາຍ ທອງໄຊ ມັງໝໍ່ເມກ ຫົວໜ້າພະແນກອຸດສາຫະກຳ ແລະ ການຄ້າແຂວງ, ບັນດາຫົວໜ້າ, ຮອງຫົວພະແນກການອ້ອມຂ້າງ ຕະຫລອດຮອດສະມາຊິກພັກ – ພະນັກງານ ພາຍໃນຂົງເຂດດັ່ງກ່າວເຂົ້າຮ່ວມ.
ໃນພິທີ ສະຫາຍ ນິກອນ ພົມວົງສາ ຫົວໜ້າຂະແໜງກໍ່ສ້າງພັກ ໄດ້ຂຶ້ນຜ່ານມະຕິຕົກລົງຂອງທ່ານເຈົ້າແຂວງໆ ຄຳມ່ວນ ວ່າດ້ວຍການບົ່ງຕົວແຕ່ງຕັ້ງຮອງເລຂາຄະນະພັກຮາກຖານ, ກຳມະການຄະນະພັກຮາກຖານ ແລະ ຄະນະໜ່ວຍພັກບໍລິຫານທີ່ຂຶ້ນກັບຮາກຖານພັກພະແນກອຸດສາຫະກຳ ແລະ ການຄ້າແຂວງຄຳມ່ວນປະກອບມີຄືດັ່ງນີ້ : ສະ ຫາຍ ບຸນໂຮມ ມຸກດາສັກ ກຳມະການຄະນະພັກຮາກຖານ, ປະທານກວດກາພັກ, ຮອງຫົວໜ້າພະແນກຂຶ້ນເປັນຮອງເລຂາຄະນະພັກຮາກຖານ, ສະຫາຍ ວັນທອນ ບຸດສົມພັນ ກຳມະການໜ່ວຍພັກບໍລິຫານ, ຮອງຫົວໜ້າພະແນກຂຶ້ນເປັນກຳມະການຄະນະພັກຮາກຖານ, ປະທານກວດກາພັກ, ພ້ອມທັງເປັນເລຂາໜ່ວຍພັກບໍລິຫານ, ສະຫາຍ ສິນບັນດິດ ອຸດທິວົງ ຫົວໜ້າຫ້ອງການບໍລິຫານຂຶ້ນເປັນຮອງເລຂາໜ່ວຍພັກບໍລິຫານ, ສະຫາຍ ວິເສດ ໂຄດສຸວັນ ຫົວໜ້າຂະແໜງສົ່ງເສີມການຄ້າ ຂຶ້ນເປັນກຳມະການໜ່ວຍພັກບໍລິຫານ. ສຳລັບຕຳແໜ່ງທີ່ມີຢູ່ແລ້ວແມ່ນຮັກສາໄວ້ຄືເກົ່າ ທັງນີ້ກໍ່ເພື່ອໃຫ້ສອດຄ່ອງກັບຄວາມຮຽກຮ້ອງຕ້ອງການຂອງໜ້າທີ່ວຽກງານໃນໄລຍະໃໝ່ ແລະ ຄົບຖ້ວນຕາມໂຄງປະກອບຂອງການຈັດຕັ້ງພັກ. ສ່ວນສາຍເຫດໃນການປັບປຸງກົງຈັກການຈັດຕັ້ງໃນຄັ້ງນີ້ແມ່ນຍ້ອນຜູ້ເກົ່າໄດ້ມີອາຍຸກະສຽນພັກ ຜ່ອນເຂົ້າບຳນານ. ໃນໂອກາດດຽວກັນສະຫາຍ ທອງໄຊ ມັງໝໍ່ເມກ ຍັງໄດ້ກ່າວລາຍງານຕໍ່ກອງປະຊຸມໃຫ້ຮູ້ວ່າ : ຮາກຖານພັກພະແນກອຸດສາຫະກຳ ແລະ ການຄ້າປະກອບມີ 4 ໜ່ວຍພັກທີ່ຂຶ້ນກັບຄື: ໜ່ວຍພັກບໍລິຫານ, ໜ່ວຍພັກວິຊາການ, ໜ່ວຍພັກລັດວິສາຫະກິດນ້ຳມັນເຊື້ອໄຟລາວ ສາຂາແຂວງຄຳມ່ວນ, ໜ່ວຍພັກວິສາຫະກິດການຄ້າຂາອອກ – ຂາເຂົ້າ ແລະ ທ່ອງທ່ຽວ. ປະຈຸບັນປະກອບມີຄະນະພັກ 9 ສະຫາຍ, ສະມາຊິກພັກທັງໝົດ 69 ສະຫາຍ, ຍິງ 14 ສະ ຫາຍ, ໃນນີ້ສະມາຊິກພັກສຳຮອງ 6 ສະຫາຍ, ຍິງ 1 ສະຫາຍ.
[ຂ່າວ : ມະນີວັນ]
[ຮຽບຮຽງ: ນາງ ຖື]
