ລາວ-ຈີນ ຕົກລົງເສີມຂະຫຍາຍການຮ່ວມມື ແລະ ແລກປ່ຽນຂັ້ນສູງ ລະຫວ່າງ ສອງກອງທັບ ຢ່າງໃກ້ຊິດ ໂດຍຈີນຈະໃຫ້ການຊ່ວຍເຫລືອພັດທະນາກອງທັບປະຊາຊົນ ລາວ ທັງດ້ານບຸກຄະລາກອນ ແລະ ດ້ານເທັກນິກ.
ການຕົກລົງ ເສີມຂະຫຍາຍການຮ່ວມມື ແລະ ແລກປ່ຽນລະດັບສູງ ລະຫວ່າງ ກອງທັບປະຊາຊົນ ລາວ ກັບກອງທັບປົດປ່ອຍປະຊາຊົນ ຈີນ ໄດ້ມີຂຶ້ນໃນໂອກາດທີ່ ທ່ານ ພົນເອກ ຊາງ ອ່ານສວນ ທີ່ປຶກສາແຫ່ງລັດ ແລະ ລັດຖະມົນຕີ ກະຊວງປ້ອງກັນປະເທດ ຈີນ ເດີນທາງຢ້ຽມຢາມ ສປປ ລາວ ຢ່າງເປັນທາງການ ເມື່ອບໍ່ດົນມານີ້ ໂດຍມີ ທ່ານ ພົນໂທ ຈັນສະໝອນ ຈັນຍາລາດ ກົມການເມືອງ ສູນກາງພັກ ແລະ ລັດຖະມົນຕີກະຊວງປ້ອງກັນປະເທດ ໃຫ້ການຕ້ອນຮັບ.
ນອກຈາກການຕົກລົງດັ່ງກ່າວແລ້ວ ທັງສອງຝ່າຍຍັງໄດ້ເນັ້ນໜັກເຖິງການຮ່ວມມືດ້ານການທະຫານຢ່າງຮອບດ້ານ ລະຫວ່າງ 2 ກະຊວງ ໃຫ້ມີຄວາມເຂັ້ມແຂງ ແລະ ຂະຫຍາຍຕົວຢ່າງບໍ່ຢຸດຢັ້ງ ດ້ວຍການລົງນາມຮ່ວມກັນ ໃນແຜນການແລກປ່ຽນ ຄະນະຜູ້ແທນໃນດ້ານການທະຫານຂັ້ນສູງ, ການກໍ່ສ້າງບຸກຄະລາກອນ, ການປັບປຸງກົນໄກຢ່າງຄົບຖ້ວນ, ວຽກງານປ້ອງກັນຊາຍແດນ ແລະ ວຽກງານດ້ານການເມືອງ ໂດຍທີ່ຈີນຈະສືບຕໍ່ໃຫ້ການຊ່ວຍເຫລືອແກ່ກອງທັບປະຊາຊົນ ລາວ ທັງທາງດ້ານອຸປະກອນ ແລະ ເທັກນິກທາງການທະຫານ ລວມທັງການຊ່ວຍເຫລືອ ເພື່ອຮັກສາຄວາມປອດໄພໃຫ້ແກ່ໂຄງການກໍ່ສ້າງລົດໄຟ ຄວາມໄວສູງໃນລາວ ເພື່ອເຊື່ອມຕໍ່ລາວ ກັບ ຈີນ ແລະ ໄທ ອີກດ້ວຍ.
ກ່ອນໜ້ານີ້ ທ່ານພົນໂທ ຈັນສະໝອນ ຢືນຢັນວ່າ: ພາລະໜ້າທີ່ສໍາຄັນ ທີ່ກອງທັບປະຊາຊົນລາວ ຈະຕ້ອງປະຕິບັດໃຫ້ໄດ້ 100 ເປີເຊັນ ກໍຄືການຮັບປະກັນຄວາມປອດໄພ ໃຫ້ແກ່ໂຄງການກໍ່ສ້າງລົດໄຟ ເຊື່ອມຕໍ່ ລະຫວ່າງ ລາວ ກັບ ຈີນ ໂດຍການປະສານສົມທົບກັບທຸກພາກສ່ວນ ໃນທຸກພື້ນທີ່ ທີ່ທາງລົດໄຟຜ່ານ ແລະ ທັງຍັງຈະຕ້ອງກວດກາທຸກການເຄື່ອນໄຫວໃນສັງຄົມ ແລະ ເກັບກູ້ລະເບີດບໍ່ທັນແຕກ ຫລື UXO ທີ່ຕົກຄ້າງໃນພື້ນທີ່ ທີ່ເປັນເຂດແລວທາງ ແລະ ທີ່ຕັ້ງສະຖານີລົດໄຟອີກດ້ວຍ.
ທັງນີ້ປາກົດວ່າ ກົມໃຫຍ່ເສນາທິການ ທີ່ເປັນພາກສ່ວນຮັບຜິດຊອບໂດຍກົງນັ້ນ ກໍໄດ້ດໍາເນີນການກວດຄົ້ນພື້ນທີ່ໄດ້ແລ້ວ 314,682 ເຮັກຕາ, ສໍາຫລວດ ແລະ ເຈາະທາງທໍລະນີສາດໃນພື້ນທີ່ 125,625 ເຮັກຕາ ແລະ ເກັບກູ້ລະເບີດ ຫລື UXO ໄດ້ 145 ໜ່ວຍ ໂດຍຄາດວ່າ ການກວດຄົ້ນ ແລະ ເກັບກູ້ລະເບີດທັງໝົດ ໃນຕະຫລອດເສັ້ນທາງລົດໄຟໃນລາວ ຈະສໍາເລັດພາຍໃນ 36 ເດືອນຕໍ່ໜ້າ.
ທາງດ້ານ ທ່ານວິຈິດ ສິນດາວົງ ຮອງປະທານຄະນະກຳມະການຮ່ວມມື ລາວ-ຈີນ ບອກວ່າ ໂຄງການຫນຶ່ງແລວທາງ-ຫນຶ່ງເສັ້ນທາງ (One Belt-One Road) ຂອງຈີນນັ້ນ ຈະສົ່ງຜົນດີກັບແຜນການພັດທະນາລາວ ໃຫ້ເປັນສູນກາງການເຊື່ອມຕໍ່ດ້ານຄົມມະນາຄົມ-ຂົນສົ່ງ ໃນເຂດລຸ່ມແມ່ນນ້ຳຂອງ ແລະ ອາຊຽນໃນອະນາຄົດ ໂດຍສະເພາະແມ່ນທາງລົດໄຟ ລາວ-ຈີນ ກໍຄືສິ່ງທີ່ຮັບປະກັນວ່າ ສປປ ລາວ ໄດ້ເຂົ້າໄປເປັນສ່ວນຫນຶ່ງ ໃນໂຄງການຫນຶ່ງແລວທາງ-ຫນຶ່ງເສັ້ນທາງ ທີ່ກອງປະຊຸມໃຫຍ່ ຄັ້ງທີ 19 ຂອງພັກຄອມມີວນິສຈີນນັ້ນ ກໍໄດ້ເນັ້ນຢໍ້າໃຫ້ເຫັນຄວາມສໍາຄັນຢ່າງຍິ່ງຕໍ່ກັບແຜນການດັ່ງກ່າວນີ້ວ່າ ຈະສົ່ງຜົນດີຕໍ່ການເປັນຫຸ້ນສ່ວນຍຸດທະສາດການພັດທະນາຢ່າງຮອບດ້ານ ລະຫວ່າງ ລາວກັບຈີນ ອີກດ້ວຍເຊັ່ນກັນ; ດັ່ງທີ່ທ່ານວິຈິດໄດ້ຢືນຢັນ: “ໃນຖານະທີ່ເປັນປະເທດບ້ານໃກ້ເຮືອນຄຽງ ທີ່ມີມູນເຊື້ອມິດຕະພາບອັນດີງາມນໍາກັນມາແຕ່ດົນນານແລ້ວ ທັງເປັນປະເທດຮ່ວມອຸດົມການສັງຄົມນິຍົມນໍາກັນອີກດ້ວຍ ຂ້າພະເຈົ້າກໍເຊື່ອວ່າ ຜົນຂອງກອງປະຊຸມຂອງພັກຄອມມີວນີສຈີນ ຄັ້ງທີ 19 ນີ້ ຈະສົ່ງຜົນສະທ້ອນອັນດີ ຕໍ່ການພົວພັນ ລາວ-ຈີນ ຈະເປັນການເພີ້ມທະວີຄວາມເຊື່ອໝັ້ນຕໍ່ກັນໜັກແໜ້ນຕື່ມອີກ ຍັງຈະເປັນພື້ນຖານອັນໃໝ່ ໃນການເພີ້ມທະວີສາຍພົວພັນແບບຄູ່ຮ່ວມຍຸດທະສາດຮອບດ້ານ ລະຫວ່າງ 2 ປະເທດ ລາວ-ຈີນ ໃຫ້ກ້າວສູ່ຈຸດສູງສຸດໃໝ່.”
ໃນປີ 2016 ນັ້ນ ທາງການ ລາວ-ຈີນ ກໍໄດ້ລົງນາມໃນເອກະສານສຳຄັນຈຳນວນ 16 ສະບັບ ກ່ຽວກັບການຮ່ວມມືຮອບດ້ານ ລະຫວ່າງ ກັນ, ໃນນີ້ລັດຖະບານ ຈີນ ໃຫ້ການຊ່ວຍເຫຼືອລັດຖະບານ ລາວ ທີ່ມີມູນຄ່າ 100 ລ້ານຢວນ, ການມອບເຮືອບິນ MA-60 ຈໍານວນສອງລໍາ ແລະ ການພັດທະນາກອງທັບປະຊາຊົນ ລາວເປັນຕົ້ນ.
[ຂ່າວໂດຍ: VOA]
[ຮຽບຮຽງໂດຍ: ຂະແໜງຂ່າວສານ]
