ຕອນເຊົ້າ ເວລາ 11: 00 ໂມງ ຂອງວັນທີ 05 ຕຸລາ 2017 ທີ່ຫ້ອງຮັບແຂກຊັ້ນ 4 ຂອງກະຊວງອຸດຫະກໍາ ແລະ ການຄ້າ ທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ຮັບຕ້ອນການຢ້ຽມຂໍ່ານັບ ທ່ານ Jen LUTKENHERM ເອກອັກຄະລັດຖະທູດຜູ້ມີອຳນາດເຕັມ ແຫ່ງ ປະເທດເຢຍລະມັນປະຈໍາ ສປປ ລາວ ຄົນໃໝ່ ເນື່ອງໃນໂອກາດທີ່ໄດ້ດຳລົງຕຳແໜ່ງໃໝ່.
ການເຂົ້າຢ້ຽມຂໍ່າານັບໃນຄັ້ງນີ້ແມ່ນຄົບຮອບສາຍພົວພັນການທູດ 60 ປີ ລະຫວ່າງລາວ-ເຢຍລະມັນ ແລະ ໄດ້ປຶກສາຫາລືຄວາມເຂົ້າໃຈການຮ່ວມມືຫຼາຍດ້ານ, ນອກນີ້ເຢຍລະມັນຈະສືບຕໍ່ໃຫ້ການສະໜັບສະໜູນດ້ານໂຄງການ GIZ ເຊິ່ງໂຄງການດັ່ງກ່າວຈະໃຊ້ເວລາອີກ 3 ປີ.
ທ່ານ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ສະເໜີໃຫ້ປະເທດເຢຍລະມັນສືບຕໍ່ໃຫ້ການຊ່ວຍເຫຼືອລາວ ໂດຍສະເພາະແມ່ນວຽກງານປັບປຸງສິ່ງແວດລ້ອມໃນການດໍາເນີນທຸລະກິດພ້ອມທັງດຶງດູດເອົານັກລົງທຶນຈາກເຢຍລະມັນມາລົງທຶນຢູ່ ສປປ ລາວ ເປັນຕົ້ນແມ່ນບໍລິສັດ (SIMEN & BOSCH).
ນອກນັ້ນໃນເດືອນພະຈິກ 2017 ທີ່ຈະມາເຖີງນີ້ ກອງປະຊຸມໂຕະມົນ (RTM) ຈະໄດ້ເປີດຂຶ້ນນຢູ່ແຂວງຈໍາປາສັກ, ກະຊວງ ອຄ ໃນນາມຈຸດປະສານງານ ກັບຂະແໜງການຕ່າງໆທັງພາກລັດ ແລະ ພາກເອກະຊົນ ໂດຍສະເພາະສະພາການຄ້າ ແລະ ອຸດສາຫະກໍາ ແຫ່ງຊາດລາວ ແລະ ຝ່າຍເຢຍລະມັນ ແມ່ນມີຄວາມຍິນດີໃຫ້ການຮ່ວມມື, ນອກນັ້ນ ຍັງຈະເສີມຂະຫຍາຍສາຍພົວພັນການຄ້າ, ການລົງທຶນລະຫວ່າງສອງປະເທດໃຫ້ມີການຈັດຕັ້ງປະຕິບັດໃຫ້ເກີດຜົນເປັນຈິງ.
ຕອນທ້າຍ ທ່ານ ນ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ຍັງຂອບໃຈມາຍັງທ່ານເອກອັກຄະລັດຖະທູດເຢຍລະມັນ ປະຈໍາ ສປປ ລາວ ຄົນໃໝ່ ທີ່ໄດ້ໃຫ້ການປຶກສາຫາລືເປັນຢ່າງດີ, ມີຄະນະທັງສອງຝ່າຍເຂົ້າຮ່ວມ ໂດຍຕາງໜ້າຂັ້ນຮອງຫົວໜ້າກົມ, ຫົວໜ້າພະແນກ ແລະ ວິຊາການທີ່ກ່ຽວຂ້ອງ, ຈໍານວນ 8 ທ່ານ.
[ຂ່າວໂດຍ: ຂະແໜງຂ່າວສານ]
