ພາກລັດ ແລະ ພາກເອກະຊົນ ຮ່ວມກັບບັນດາຄູ່ຮ່ວມພັດທະນາ ພ້ອມກັນປຶກສາຫາລື ບັນດາບູລິມະສິດສຳລັບໄລຍະກາງ ໃນການພັດທະນາຂະແໜງການຄ້າ ແລະ ພາກເອກະຊົນ

By theu vaenvongsod On 30 Jun, 2017 At 08:30 AM | Categorized As ຂ່າວສຳຄັນ | With 0 Comments

ພາກລັດ ແລະ ພາກເອກະຊົນ ຮ່ວມກັບບັນດາຄູ່ຮ່ວມພັດທະນາ ພ້ອມກັນປຶກສາຫາລື ບັນດາບູລິມະສິດສຳລັບໄລຍະກາງ ໃນການພັດທະນາຂະແໜງການຄ້າ ແລະ ພາກເອກະຊົນ ພ້ອມທັງຍົກໃຫ້ເຫັນ ບັນຫາທີເປັນຊ່ອງວ່າງ ແລະ ສົ່ງຜົນກະທົບຕໍ່ກັບຄວາມອາດສາມາດໃນການແຂ່ງຂັນຂອງທຸລະກິດ ແລະ ຊອກຫາຊ່ອງທາງໃນການເພີ່ມກາລະໂອກາດແກ່ການເຊື່ອມໂຍງເສດຖະກິດໃນພາກພື້ນ

ນະຄອນຫຼວງວຽງຈັນ, ວັນທີ 28 ມິຖຸນາ 2017, ກະຊວງອຸດສາຫະກຳ ແລະ ການຄ້າ ໄດ້ຈັດກອງປະຊຸມໜ່ວຍງານຂະແໜງການຄ້າ ແລະ ພາກເອກະຊົນ (TPSWG) ຄັ້ງທີ 11 ຂຶ້ນທີ່ໂຮງແຮມດອນຈັນພາເລດ, ນະຄອນຫຼວງວຽງຈັນ. ເຊິ່ງເປັນກອງປະຊຸມກາງສະໄໝ ເພື່ອປຶກສາຫາລືທາງດ້ານນະໂຍບາຍ ລະຫວ່າງ ພາກລັດຖະບານ ແລະ ບັນດາຄູ່ຮ່ວມພັດທະນາ ໂດຍການເປັນປະທານຂອງ ທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກຳ ແລະ ການຄ້າ ຮ່ວມກັບ ທ່ານ Leo Faber ເອກອັກຄະລັດຖະທູດ EU ແລະ ທ່ານ Michael Grau, ເອກອັກຄະລັດຖະທູດ ເຢຍລະມັນ ປະຈຳ ສປປ ລາວ ພ້ອມດ້ວຍຜູ້ເຂົ້າຮ່ວມຈຳນວນ 100 ກວ່າທ່ານ ທີ່ເປັນຕົວແທນຈາກບັນດາກະຊວງທີ່ກ່ຽວຂ້ອງ, ຄູ່ຮ່ວມພັດທະນາ ແລະ ຈາກພາກເອກະຊົນ.

ກອງປະຊຸມໄດ້ພ້ອມກັນປຶກສາຫາລື ບັນດາວຽກງານທີ່ເປັນແຜນບູລິມະສິດໄລຍະກາງ ສຳລັບການພັດທະນາ ຂະແໜງການຄ້າ ແລະ ພາກເອກະຊົນ ໃນ ສປປ ລາວ ແລະ ໄດ້ວາງແຜນໃນການໃຫ້ການສະໜັບສະໜູນ ການຈັດຕັ້ງປະຕິບັດບັນດາ ແຜນບູລິມະສິດ ໃນການພັດທະນາຂະແໜງການຄ້າ ຂອງປະເທດເຮົານຳອີກ ລວມທັງບັນດາບັນຫາ ທີ່ເປັນບັນຫາສະເພາະໃນວົງກ້ວາງ ທີ່ສົ່ງຜົນກະທົບຕໍ່ກັບຄວາມອາດສາມາດໃນການແຂ່ງຂັນ ຂອງພາກເອກະຊົນຂອງພວກເຮົາ ແລະ ພ້ອມກັນຫາວິທີວ່າຈະສ້າງກາລະໂອກາດທີ່ເກີດຂຶ້ນໃຫ້ໄດ້ຫຼາຍທີ່ສຸດໄດ້ຈັ່ງໃດ? ຈາກການເພີ່ມທະວີການເຊື່ອມໂຍງເສດຖະກິດກັບພາກພື້ນ ດ້ວຍການນຳສະເໜີ ບົດຄົ້ນຄ້ວາຈຳນວນສອງບົດຕໍ່ກອງປະຊຸມ ເຊິ່ງລວມມີ: ບົດທີໜຶ່ງ ແມ່ນ ບົດສຶກສາກ່ຽວກັບ ຜົນກະທົບຈາກນະໂຍບາຍ ພັດທະນາເຂດເສດຖະກິດພິເສດຕາມຊາຍແດນຂອງໄທ ຕໍ່ກັບການພັດທະນາເຂດເສດຖະກິດພິເສດໃນລາວ ເຊິ່ງນຳສະເໜີໂດຍ ທີມງານຄົ້ນຄວ້າພາຍໃນປະເທດ ແລະ ບົດທີສອງ ແມ່ນ ບົດສຶກສາຜົນການສຳຫຼວດວິສາຫະກິດຂອງທະນາຄານໂລກ ກ່ຽວກັບຜະລິດຕະພາບ ແລະ ທັດສະນະຂອງວິສາຫະກິດ ຕໍ່ບັນດາສິ່ງກີດຂວາງບັນຍາກາດການລົງທຶນສະບັບຫຼ້າສຸດ.

ໃນບົດກ່າວເປີດ ຂອງທ່ານ ນາງ ເຂັມມະນີ ພົນເສນາ ທ່ານໄດ້ກ່າວວ່າ “ແຜນພັດທະນາເສດຖະກິດ-ສັງຄົມຄັ້ງທີ8 ຂອງປະເທດເຮົາ, ຍຸດທະສາດດ້ານການພັດທະນາແຫ່ງຊາດ ຮອດປີ 2025 ແລະ ວິໄສທັດ ຮອດປີ 2030 ໄດ້ເນັ້ນໃຫ້ເຫັນບົດບາດຄວາມສຳຄັນ ຂອງຂະແໜງການຄ້າ ແລະ ພາກເອກະຊົນ ໃນການສ້າງວຽກເຮັດງານທຳ ແລະ ຊ່ວຍຫຼຸດຜ່ອນຄວາມທຸກຍາກ. ພ້ອມກັນນັ້ນ, ຍຸດທະສາດດ້ານການພັດທະນາຂອງພວກເຮົາ ກໍຍັງໄດ້ເວົ້າເຖິງການພັດທະນາພາກເອກະຊົນ ນຳອີກ ເຊິ່ງລວມມີ ການສົ່ງເສີມທຸລະກິດຂະໜາດນ້ອຍ ແລະ ກາງ ປຽບເໝືອນຫົວຈັກຂັບເຄື່ອນ ສຳລັບຄວາມຍືນຍົງ ແລະ ການເຕີບໂຕໂດຍລວມ”. ນອກນັ້ນ ທ່ານຍັງໄດ້ກ່າວຢ້ຳອີກວ່າ “ໜຶ່ງໃນບົດຮຽນຫຼັກໆ ທີ່ພວກເຮົາສາມາດຖອດຖອນມາໄດ້ ຕະຫຼອດສອງສາມປີຜ່ານມາ ໃນການພັດທະນາພື້ນຖານຕະຫຼາດ ໃນປະເທດເຮົາ ກໍ່ແມ່ນທຸກຫົວໜ່ວຍທຸລະກິດທີ່ປະສົບຜົນສຳເລັດໃນປະເທດເຮົາ ລ້ວນແລ້ວແຕ່ແມ່ນທຸລະກິດທີ່ໄດ້ຮັບການສ້າງຕັ້ງຂຶ້ນ ແລະ ບໍລິຫານໂດຍບັນດາຜູ້ປະກອບການເອງ ແລະ ພາກສ່ວນທີ່ກ່ຽວຂ້ອງຫຼັກຈາກພາກລັດ ຈະມີໜ້າທີ່ພຽງແຕ່ສ້າງສະພາບແວດລ້ອມທີ່ເອື້ອອຳນວຍ ເພື່ອອຳນວຍຄວາມສະດວກແກ່ການສ້າງຕັ້ງ ແລະ ດຳເນີນງານຂອງທຸລະກິດເທົ່ານັ້ນ. ສະນັ້ນ, ດ້ວຍການສະໜັບສະໜູນຢ່າງເຕັມທີ່ຈາກບັນດາຄູ່ຮ່ວມພັດທະນາ, ພວກເຮົາໄດ້ມີຄວາມພະຍາຍາມຢ່າງສູງ ໃນການສ້າງນະໂຍບາຍ ແລະ ແຜນວຽກແກ່ພາກລັດ ເພື່ອຊ່ວຍໃຫ້ພວກເຮົາ ໄດ້ມີຄວາມເຂົ້າໃຈບັນດາອຸປະສັກຢ່າງເລິກເຊິ່ງ ຕໍ່ກັບການດຳເນີນງານຂອງພາກທຸລະກິດ ແລະ ບັນດາປັດໃຈທີ່ສົ່ງຜົນກະທົບຕໍ່ກັບຄວາມອາດສາມາດແຂ່ງຂັນຂອງເຂົາເຈົ້າ”.

ໃນຕອນທ້າຍບົດກ່າວປິດ ຂອງທ່ານລັດຖະມົນຕີ ທ່ານໄດ້ກ່າວສະແດງຄວາມຂອບໃຈ ຕໍ່ທ່ານ Michael Grau, ເຊິ່ງທ່ານຈະໄດ້ສຳເລັດວາລະຂອງການປະຈຳການ ໃນ ສປປ ລາວ ໃນໄວໆນີ້ ທີ່ທ່ານໄດ້ໃຫ້ກຽດເປັນປະທານ ໃຫ້ແກ່ກອງປະຊຸມ ໜ່ວຍງານຂະແໜງການຄ້າ ແລະ ພາກເອກະຊົນຕະຫຼອດໄລຍະເວລາສາມປີທີ່ຜ່ານມາ ແລະ ອວຍພອນໄຊໃຫ້ແກ່ທ່ານ ຈົ່ງປະສົບຜົນສຳເລັດໃນອານະຄົດ. ສຸດທ້າຍ, ທ່ານ ນາງ ເຂັມມະນີ ພົນເສນາ ກໍ່ໄດ້ກ່າວປິດກອງປະຊຸມ ດ້ວຍການສະແດງຄວາມຮູ້ບຸນຄຸນ ຕໍ່ກັບບັນດາຄູ່ຮ່ວມພັດທະນາທຸກພາກສ່ວນ ທີ່ໄດ້ໃຫ້ການສະໜັບສະໜູນແກ່ວາລະການພັດທະນາ ຂອງຂະແໜງການຄ້າ ແລະ ພາກເອກະຊົນໃນລາວ ແລະ ຮຽກຮ້ອງມາຍັງທຸກພາກສ່ວນ ຈົ່ງໄດ້ພ້ອມກັນລົງມືປະຕິບັດຢ່າງຈິງຈັງ ເພື່ອສົ່ງເສີມຄວາມອາດສາມາດ ໃຫ້ກັບບັນດາຜູ້ປະກອບການຂອງລາວ ໂດຍຜ່ານການຫຼຸດຜ່ອນບັນດາຄ່າສີ້ນເປືອງທາງດ້ານການຄ້າ, ນະໂຍບາຍທີ່ບໍ່ມີຄວາມແນ່ນອນ ແລະ ຄ່າໃຊ້ຈ່າຍທີ່ເປັນທຳຕາມລະບຽບກົດໝາຍໃຫ້ກັບພາກທຸລະກິດ.

ໜ່ວຍງານ TPSWG ແມ່ນໜຶ່ງໃນສິບໜ່ວຍງານ ພາຍໃຕ້ຂະບວນການໂຕະມົນ ແລະ ເປັນເວທີຫຼັກ ສໍາລັບການປຶກສາຫາລື ດ້ານນະໂຍບາຍ ລະຫວ່າງພາກລັດ ແລະ ບັນດາຄູ່ຮ່ວມພັດທະນາ. ບັນດາຜູ້ທີ່ເຂົ້າຮ່ວມ ໃນກອງປະຊຸມ ແມ່ນມາຈາກພາກລັດ, ຄູ່ຮ່ວມພັດທະນາ, ພາກເອກະຊົນ ແລະ ອົງການຈັດຕັ້ງສັງຄົມ. ສ່ວນໜ່ວຍງານຂະແໜງການອື່ນ ໃນ 10 ໜ່ວຍງານລວມມີ: ສາທາ; ສຶກສາ; ການປົກຄອງ; ເສດຖະກິດມະຫາພາກ; ໂຄງລ່າງພື້ນຖານ; ການຄວບຄຸມບັນຫາຢາເສບຕິດ; ລະເບີດບໍ່ທັນແຕກ; ກະສິກຳ ແລະ ພັດທະນາຊົນນະບົດ; ແລະ ການຄຸ້ມຄອງຊັບພະຍາກອນ ທຳມະຊາດ ແລະ ສິ່ງແວດລ້ອມ.