ຕອນເຊົ້າຂອງວັນທີ 22 ມີນາ 2017 ທີ່ຫ້ອງປະຊຸມຊັ້ນ 3 ກະຊວງອຸດສາຫະກໍາ ແລະ ການຄ້າ ໄດ້ໄຂກອງປະຊຸມຄັ້ງປະຖົມມະເລີກ ເພື່ອຈັດຕັ້ງປະຕິບັດສັນຍາຂອບວ່າດ້ວຍການຄ້າ ແລະ ການລົງທຶນລະຫວ່າງ ສປປ ລາວ ແລະ ສະຫະລັດອາເມລິກາ, ໂດຍການເປັນປະທານ ຂອງ ທ່ານ ສົມຈິດ ອິນທະມິດ ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ, ທ່ານ ນາງ ບາບາຮາ ໄວເຊລ ຜູ້ຊ່ວຍຫ້ອງການຜູ້ຕາງໜ້າການຄ້າສະຫະລັດອາເມຣິກາ ແລະ ທ່ານ ນາງ ຮີນາ ບິດເຕີ ເອກອັກຄະລັດຖະທູດອາເມຣິກາ ປະຈໍາ ສປປ ລາວ, ແລະ ມີເຈົ້າໜ້າທີ່ກ່ຽວຂ້ອງຂອງທັງສອງຝ່າຍເຂົ້າຮ່ວມຈໍານວນ 20 ກວ່າທ່ານ.
ການປະຊຸມຄັ້ງນີ້ແມ່ນປະຕິບັດຕາມຂອບສັນຍາ TIFA ຫຼື ສັນຍາການຄ້າ – ການລົງທຶນກັບທຸກໆປະເທດສະມາ ຊິກອາຊຽນ, ສັນຍາ TIFA ໄດ້ກຳນົດໃຫ້ແຕ່ງຕັ້ງຄະນະກຳມະການຮ່ວມສົ່ງເສີມການຄ້າ ແລະ ການລົງທຶນ ລະຫວ່າງສອງປະເທດ ໂດຍອາໄສເວທີດັ່ງກ່າວເປັນເວທີເພື່ອປຶກສາຫາລື, ສົນທະນາແລກປ່ຽນຄໍາຄິດເຫັນ, ໃນການຈັດຕັ້ງປະຕິບັດພັນທະສັນຍາຕ່າງໆທີ່ ສປປ ລາວ ແລະ ອາເມຣິກາ ມີນຳກັນ ເປັນຕົ້ນແມ່ນສັນຍາການຄ້າສອງຝ່າຍ ເຊິ່ງກວມເອົາທັງສອງສັນຍາກ່ຽວກັບເນື້ອໃນການຄ້າ, ວັດຖຸພັນການຄ້າການບໍລິການ, ການລົງທຶນ ແລະ ການສົ່ງເສີມວຽກງານຊັບສິນທາງປັນຍາ ແລະ ຂອບອື່ນໆ ນອກຈາກນັ້ນກໍ່ຍັງມີສັນຍາກັບບັນດາປະເທດອາຊຽນອີກ.
ສຳລັບການຫາລືໃນຄັ້ງນີ້ ຝ່າຍອາເມຣິກາ ຈະຊ່ວຍໃນການປັບປຸງການຈັດຕັ້ງປະຕິບັດກົດໝາຍປົກປ້ອງຊັບສິນທາງປັນຍາ, ການເຂົ້າເປັນພາຄີຂອງອົງການຈັດຕັ້ງສາກົນ ເພື່ອຍາດແຍ່ງເອົາການຊ່ວຍເຫຼືອ, ການທົດລອງ, ເຕັກນິກ ແລະ ສ້າງຄວາມອາດສາມາດໃຫ້ເຈົ້າໜ້າທີ່ ໃນການປະຕິບັດພັນທະຂອບອົງການໆຄ້າໂລກ ແລະ ການຮ່ວມມືຂອງພາກພື້ນ ແລະ ຮຽກຮ້ອງໃຫ້ພາກທຸລະກິດປັບປຸງໂຕເອງ ໃນການພັດທະນາຜະລິດຕະພັນ ເພື່ອເຮັດແນວໃດໃຫ້ສິນຄ້າຂອງລາວເຂົ້າໄປຕະຫລາດສະຫະລັດອາເມຣິກາໄດ້ຫຼາຍາຍຂຶ້ນ ແລະ ໃນສ່ວນອັດຕາພາສີກໍ່ຈະເນັ້ນໜັກເພີ່ມເຕີມເລື່ອງ ສິດທິພິເສດໃນການນໍາສິນຄ້າທີ່ມີອັດຕາພາສີຕໍ່າເຂົ້າສູ່ຕະຫລາດສະຫະລັດອາເມຣິກາ.
[ພາບ ແລະ ຂ່າວ: ສູນສະຖິຕິ ແລະ ຂໍ້ມູນຂ່າວສານ]
