ໃນວັນທີ 24 ກຸມພາ 2017 ເວລາປະມານ 9:00 ທາງຄະນະທີມງານຕິດຕາມການຕິດສະລາກລາຄາສິນຄ້າ ເຊິ່ງນໍາໂດຍ ທ່ານ ສົມຈິດ ອິນທະມິດ ຮອງລັດຖະມົນຕີ ກະຊວງອຸດດສາຫະກໍາ ແລະ ການຄ້າ, ພ້ອມດ້ວຍບັນດາ ທ່ານ ຫົວໜ້າກົມ, ຮອງຫົວຫນ້າກົມ, ຄະນະພະແນກ ແລະ ວິຊາການ ກົມການຄ້າພາຍໃນ, ພະແນກ ອຸດສາ ຫະກໍາ ແລະ ການຄ້າ ນະຄອນຫລວງ, ໄດ້ລົງ ຊຸກຍູ້ ຕິດຕາມ ບໍລິສັດ ເບຍລາວຈໍາກັດ, ບໍລິສັດ ເອເຊຍປາຊີຟິກ ບີເວີຣີ ຈໍາກັດ, ບໍລິສັດໂຄຄາໂຄລ້າ ບອ໊ຕຕລິງ ຈໍາກັດ, ບໍລິສັດພອນສະຫວັນ ຂາອອກ-ຂາເຂົ້າ ຈໍາກັດຜູ້ດຽວ ໃນການຕິດສະຫລາກສິນຄ້າເປັນພາສາລາວ
ການລົງຕິດຕາມໃນຄັ້ງນີ້ແມ່ນເພື່ອເຮັດໃຫ້ການປະຕິບັດການຕິດສະຫລາກສິນຄ້າເປັນພາສາລາວ ຕໍ່ສິນຄ້າທີ່ຜະລິດຢູ່ໃນ ສປປ ລາວ ແລະ ສິນຄ້າທີ່ນໍາເຂົ້າມາຈາກຕ່າງປະເທດ ມີປະສິດທິພາບ ແລະ ຮັບປະກັນ ການອ່ານງ່າຍ ຊັດເຈນ, ມີການບໍລິການແບບທຳມາພິບານ ຊຶ່ງເປັນຕົວແບບນຳໜ້າພາທາງໃນການຈັດຕັ້ງປະຕິບັດ ການຕິດສະຫຼາກເປັນສິນຄ້າເປັນພາສາລາວ ຕໍ່ສິນຄ້າທີ່ຕົນຜະລິດ ຫຼື ນຳເຂົ້າ ສຳລັບເຄື່ອງດື່ມທີ່ມີທາດເຫຼົ້າ ແລະ ບໍ່ມີທາດເຫຼົ້າ; ໄປພ້ອມໆກັບການຊຸກຍູ້ໃຫ້ພາກສ່ວນອື່ນ ຫຼື ຫົວໜ່ວຍທຸລະກິດອື່ນ ພ້ອມກັນປະຕິບັດຕາມລະບຽບການເຫຼົ່ານີ້ ແລະ ຖືເປັນແບບຢ່າງໃນການປະຕິບັດຕາມ. ຖ້າຫົວໜ່ວຍທຸລະກິດໄດ້ລະເມີດ ກໍຈະຖືກປະຕິບັດວິໄນຕາມລະບຽບກົດໝາຍທີ່ກຳນົດໄວ້ ທີ່ສໍາຄັນແມ່ນເພື່ອປະຕິບັດຕາມຄໍາສັ່ງຂອງລັດຖະມົນຕີ ກະຊວງອຸດສາຫະກໍາ ແລະ ການຄ້າ ກ່ຽວກັບການຕິດສະຫລາກສິນຄ້າເປັນພາສາລາວ ສະບັບເລກທີ 2501/ອຄ. ຄພນ, ລົງວັນທີ 16 ທັນວາ 2015, ເພື່ອຜັນຂະຫຍາຍການຈັດຕັ້ງປະຕິບັດກົດຫມາຍປົກປ້ອງຜູ້ຊົມໃຊ້ ໃຫ້ມີຄວາມສັກສິດ.
[ພາບ ແລະ ຂ່າວ: ສູນສະຖິຕິ ແລະ ຂໍ້ມູນຂ່າວສານ]
