ຕອນບ່າຍວັນທີ 21 ທັນວາ 2016 ທີ່ ຫ້ອງສ່ອງແສງ, ກະຊວງອຸດສາຫະກໍາ ແລະ ການຄ້າ, ໄດ້ຈັດກອງປະ ຊຸມປືກສາຫາລື ລະຫວ່າງ ກະຊວງອຸດສາຫະກໍາ ແລະ ການຄ້າ ແລະ ກະຊວງກະສິກໍາ ແລະ ປ່າໄມ້ ຊຶ່ງນໍາໂດຍ ທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກໍາ ແລະ ການຄ້າ ແລະ ທ່ານ ປອ ລຽນ ທິແກ້ວ ລັດຖະມົນ ຕີ ກະຊວງກະສິກໍາ ແລະ ປ່າໄມ້ ເຊິ່ງມີຄະນະກົມ ແລະ ວິຊາການຈາກກົມ ຂອງສອງພາກສ່ວນເຂົ້າຮ່ວມ.
ກອງປະຊຸມແມ່ນສືບຕໍ່ຈາກກອງປະຊຸມທີ່ເປັນມູນເຊື້ອ ຂອງສອງກະຊວງໃນການພົວພັນປະສານງານໂດຍອີງໃສ່ດໍາລັດຂອງທ່ານນາຍົກລັດຖະມົນຕີ ກ່ຽວກັບການປະສານງານລະຫວ່າງບັນດາກະຊວງ.
ຈຸດປະສົງຂອງກອງປະຊຸມແມ່ນເພື່ອປືກສາຫາລືກ່ຽວກັບ ການຜັນຂະຫຍາຍສັນຍາການຄາຊາຍແດນ ລະຫວ່າງລັດຖະບານແຫ່ງ ສປປ ລາວ ແລະ ລັດຖະບານແຫ່ງ ສສ ຫວຽດນາມ ສະບັບລົງນາມວັນທີ 17 ມິຖຸນາ 2015 ເພື່ອໃຫ້ເກີດຜົນປະໂຫຍດຕົວຈິງ, ກອງປະຊຸມເຫັນດີເປັນເອກະພາບມອບໃຫ້ກົມວິຊາການທີ່ກ່ຽວຂ້ອງ ຂອງສອງກະຊວງຮີບຮ້ອນກະກຽມໃຫ້ສໍາເລັດບົດແນະນໍາ ຈັດຕັ້ງປະຕິບັດສັນຍາດັ່ງກ່າວໂດຍໄວ ເພື່ອເຮັດໃຫ້ປະຊາຊົນສາມາດສົ່ງສິນ ຄ້າໄປ ສສ ຫວຽດນາມຕາມຂອບສັນຍານີ້. ນອກຈາກນີ້ ກອງປະຊຸມໄດ້ແບ່ງຄວາມຮັບຜິດຊອບ ກ່ຽວກັບການສົ່ງເສີມໃຫ້ປະຊາຊົນລາວຜະລິດສະບຽງອາຫານ ເພື່ອຮອງຮັບໂຄງການສ້າງທາງລົດໄຟລາວ - ຈີນ ແລະ ສົ່ງເສີມການຜະລິດສິນຄ້າກະສິກໍາ ເພື່ອສົ່ງອອກ ແລະ ຮັບປະກັນມີຕະຫລາດຮອງຮັບ.
[ສູນສະຖິຕິ ແລະ ຂໍ້ມູນຂ່າວສານ]
