ໃນໂອກາດເຂົ້າຮ່ວມກອງປະຊຸມຄະນະກຳມະການຊີ້ນຳກອງປະຊຸມທຸລະກິດລາວ ລັດຖະມົນຕີກະຊວງອຸດສາຫະກຳ ແລະ ການຄ້າ ໄດ້ເນັ້ນໃຫ້ພາກລັດ ແລະ ທຸລະກິດເລັ່ງຈັດຕັ້ງແກ້ໄຂບັນຫາທີ່ພົບເຫັນໃນໄລຍະຜ່ານມາໃຫ້ຂາດຕົວ ໂດຍສະເພາະແມ່ນການເຮັດວຽກຮ່ວມກັນໂດຍກົງລະຫວ່າງກົມແຜນການ ແລະ ການຮ່ວມມື ກັບສະພາການຄ້າ ແລະ ອຸດສາຫະກຳແຫ່ງຊາດລາວ.
ກອງປະຊຸມ ຄະນະກຳມະການຊີ້ນຳກອງປະຊຸມທຸລະກິດລາວ ໄດ້ຈັດຂຶ້ນວັນທີ 08 ທັນວາ ທີ່ຜ່ານມາ ທີ່ໂຮງແຮມດອນຈັນພາເລດ ໂດຍການເປັນປະທານຮ່ວມຂອງ ທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກຳ ແລະ ການຄ້າ, ທ່ານ ອຸເດດ ສຸວັນນະວົງ ປະທານສະພາການຄ້າ ແລະ ອຸດສາຫະກຳແຫ່ງຊາດລາວ; ມີບັນດາຫົວໜ້າກົມກ່ຽວຂ້ອງ, ພະແນກການ, ຮອງປະທານສະພາການຄ້າ ພາກທຸລະກິດພາຍໃນ ແລະ ຕ່າງປະເທດເຂົ້າຮ່ວມ.
ທ່ານ ນາງ ເຂັມມະນີ ພົນເສນາ ໄດ້ມີຄຳເຫັນ ພາຍຫຼັງຮັບຟັງການລາຍງານສະພາບບັນຫາທີ່ພາກທຸລະກິດພົບພໍ້ໃນໄລຍະຜ່ານມາ ແລະ ຜ່ານການປຶກສາຫາລືລະຫວ່າງຂະແໜງການຂອງລັດ ແລະ ພາກທຸລະກິດ ໂດຍເນັ້ນໃຫ້ສະພາການຄ້າ ແລະ ອຸດສາຫະກຳແຫ່ງຊາດ ແລະ ກົມແຜນການ ແລະ ການຮ່ວມມື ເປັນໃຈກາງປະສານງານກັນໃຫ້ມີຄວາມລະອຽດ ໃນການແກ້ໄຂບັນຫາທີ່ຫຍຸ້ງຍາກຜ່ານມາໃຫ້ຂາດຕົວເປັນແຕ່ລະບັນຫາໄປ ໂດຍບໍ່ໃຫ້ມີການແກ່ຍາວເວລາໄປຫຼາຍ ແລະ ເພື່ອຫຼີກລ້ຽງເອົາບັນຫາເກົ່າມາເວົ້າກັນອີກ. ພ້ອມກັນນັ້ນ, ການຮັບເອົາຂໍ້ມູນໃຫ້ມີຄວາມຕໍ່ເນື່ອງກັນ (ບໍ່ຢາກໃຫ້ມາວ່າມາປະຊຸມຄັ້ນນີ້ ແລະ ກໍ່ແລ້ວໄປຊື່ໆ), ຜ່ານມາບັນຫາເກົ່າແມ່ນເວົ້າມາ 10 ປີກໍ່ຍັງແກ້ໄຂບໍ່ແລ້ວເຫຼົ່ານີ້ເປັນຕົ້ນ.
ພ້ອມດຽວກັນນັ້ນ, ກໍ່ເພື່ອຫຼີກລ້ຽງ ຫຼື ບໍ່ໃຫ້ເອົາບັນຫາໃໝ່ມາເວົ້າໂດຍທີ່ບັນຫາເກົ່າຍັງບໍ່ໄດ້ຮັບການແກ້ໄຂ. ສະນັ້ນ, ຈຶ່ງເນັ້ນໃຫ້ກອງເລຂາສະພາການຄ້າ ແລະ ອຸດສາຫະກຳແຫ່ງຊາດ ແລະ ກົມແຜນການ ແລະ ການຮ່ວມມື ເຮັດວຽກນຳກັນຢ່າງຈິງຈັງ ແລະ ເດັດຂາດ ເຊິ່ງເຫັນດີໃຫ້ວາງບັນຫາເປັນໄລຍະສັ້ນ, ກາງ ແລະ ໄລຍະຍາວ.
ທ່ານ ອຸເດດ ສຸວັນນະວົງ ໄດ້ກ່າວວ່າ: ໃນສະພາບຕົວຈິງ ທຸລະກິດທັງພາຍໃນປະເທດ, ຂົງເຂດ ແລະ ສາກົນ ກໍ່ຄືທົ່ວໂລກ ມີການແຂ່ງຂັນກັນສູງໃນການຍາດແຍ່ງຕະຫຼາດ ດ້ານການຜະລິດ, ການບໍລິການ, ການຄົ້ນຄວ້າວິໄຈ ແລະ ພັດທະນານະວັດຕະກຳໃໝ່ໆ ຈຶ່ງເປັນສິ່ງທ້າທາຍໃຫ້ນັກທຸລະກິດທົ່ວຂະແໜງການ ລວມທັງນັກທຸລະກິດລາວ ທີ່ຈະຕ້ອງຍົກລະດັບການຜະລິດ ການບໍລິການຕ່າງໆໃນຂະແໜງການຂອງຕົນ ທັງດ້ານປະລິມານ, ຄຸນນະພາບ ຄວາມທັນສະໄໝ ແລະ ຄວາມເປັນມິດກັບສິ່ງແວດລ້ອມ ເພື່ອໃຫ້ສາມາດແຂ່ງຂັນບໍ່ພຽງແຕ່ໃນປະເທດເທົ່ານັ້ນ ແຕ່ກັບສາກົນນຳອີກ.
ທ່ານກ່າວຕື່ມອີກວ່າ: ເພື່ອໃຫ້ບັນຫາມີຄຳຕອບ ແລະ ຖືກຕິດຕາມແກ້ໄຂຢ່າງແທ້ຈິງ ຂະແໜງການກ່ຽວຂ້ອງຂອງພາກລັດ ກໍ່ຄວນມີຜູ້ປະສານງານສະເພາະ ເພື່ອໃຫ້ການຕິດຕາມແກ້ໄຂບັນຫາທີ່ພາກທຸລະກິດສະເໜີມີປະສິດທິພາບ ແລະ ແກ້ໄຂມີຄວາມຕໍ່ເນື່ອງ.
ຂະນະທີ່ ທ່ານ ສະໝານ ອາເນກາ ຮອງປະທານສະພາການຄ້າ ແລະ ອຸດສາຫະກຳແຫ່ງຊາດລາວ ໄດ້ລາຍງານບັນຫາທີ່ພາກທຸລະກິດພົບພໍ້ ແລະ ມີຄວາມຫຍຸ້ງຍາກ ມີຄື: ການເກັບອາກອນ, ການຂົນສົ່ງ, ນຳເຂົ້າ, ສົ່ງອອກສິນຄ້າ, ບັນຫາການຈັດຊື້ ຈັດຈ້າງຂອງໂຄງການລັດຖະບານ, ການແຂ່ງຂັນທີ່ບໍ່ເປັນທຳຈາກບັນດາທຸລະກິດທີ່ບໍ່ໄດ້ຈົດທະບຽນ,ການຈັດລະບຽບທຸລະກິດໂຮງພິມ, ການນຳເຂົ້ານ້ຳມັນທີ່ບໍ່ໄດ້ມາດຕະຖານ ແລະ ການຈັດສັນສະຖານທີ່ຕັ້ງປ້ຳນ້ຳມັນ, ການໃຫ້ອະນຸຍາດຕັ້ງປ້າຍໂຄສະນາທັບຊ້ອນ, ຄວາມຫຍຸ້ງຍາກໃນການເຂົ້າຫາແຫຼ່ງທຶນ, ການຊຳລະສະສາງຄ່າກໍ່ສ້າງ, ດ້ານກະສິກຳ, ດ້ານຫັດຖະກຳ ແລະ ການສົ່ງເສີມການທ້ອງທ່ຽວ.
[ພາບ: ກະຊວງອຸດສາຫະກຳ ແລະ ການຄ້າ]
[ບົດຂາວ: ໜັງສືພິມເສດຖະກິດ-ການຄ້າ]
