ກົມສົ່ງເສີມ ແລະ ພັດທະນາສິນຄ້າ ກະຊວງອຸດສາຫະກຳ ແລະ ການຄ້າ ສປປ ລາວ ຮ່ວມກັບກົມສົ່ງເສີມການຄ້າຫວຽດນາມ ກະຊວງອຸດສາຫະກຳ ແລະ ການຄ້າຫວຽດນາມ ແລະ ນັກທຸລະກິດທັງສອງປະເທດໄດ້ຮ່ວມກັນເປີດງານວາງສະແດງສິນຄ້າ ລາວ – ຫວຽດ ຂຶ້ນເປັນທາງການໃນວັນທີ 7 – 11 ກໍລະກົດ 2016 ທີ່ສູນການຄ້າ ລາວ - ໄອເຕັກ ນະຄອນຫຼວງວຽງຈັນ ເພື່ອເພີ່ມໂອກາດໃນການຄ້າ ແລະ ເຈລະຈາທຸລະກິດຮ່ວມກັນຂອງ 2 ປະເທດ.
ເຂົ້າຮ່ວມໃນພິທີມີ ທ່ານ ສົມຈິດ ອິນທະມິດ ຮອງລັດຖະມົນຕີກະຊວງອຸດສາຫະກຳ ແລະ ການຄ້າ ພ້ອມຄະນະ, ຝ່າຍຫວຽດນາມ ນຳໂດຍ ທ່ານ ຫງວຽນ ເກີມຕູ ຮອງລັດຖະມົນຕີກະຊວງອຸດສາຫະກຳ ແລະ ການຄ້າຫວຽດນາມ ພ້ອມຄະນະ ແລະ ທຸລະກິດ. ພ້ອມນັ້ນ, ຍັງມີຜູ້ປະກອບການທຸລະກິດທັງສອງປະເທດ ແລະ ມວນຊົນທີ່ເລາະຊົມງານຮ່ວມເປັນສັກຂີພິຍານ.
ທ່ານ ສົມຈິດ ອິນທະມິດ ໄດ້ກ່າວວ່າ: ຕະຫຼອດໄລຍະຜ່ານມາ ການພົວພັນລະຫວ່າງສອງລັດຖະບານ ສປປ ລາວ ແລະ ສສ ຫວຽດນາມ ເວົ້າສະເພາະ ສອງກະຊວງອຸດສາຫະກຳ ແລະ ການຄ້າ ຂອງສອງປະເທດ ໄດ້ລົງນາມສັນຍາຮ່ວມມືທະວິພາຄີໃນໄລຍະ 2016 – 2020 ແລະ ຂໍ້ຕົກລົງຮ່ວມມືທະວິພາຄີ ປະຈຳປີ 2016. ໃນນັ້ນ, ສອງກະຊວງອຸດສາຫະກຳ ແລະ ການຄ້າ ໄດ້ຊອກຫາບັນດາມາດຕະການ ເພື່ອກະຕຸ້ນໃຫ້ການພັດທະນາການຄ້າ 2 ປະເທດ ມີທ່າຂະຫຍາຍຕົວ ສ່ວນໂຕເລກການລົງທຶນຂອງທຸລະກິດຫວຽດນາມ ລົງທຶນຢູ່ ສປປ ລາວ ປີ 2016 ລວມມູນຄ່າ 3.5 ຕື້ໂດລາ, ເພີ່ມຂຶ້ນ 30% ປະເພດການລົງທຶນສ່ວຍໃຫຍ່ແມ່ນ ພະລັງງານ, ບໍ່ແຮ່, ກະສິກຳ ແລະ ທະນາຄານ ລວມທັງໝົດ 350 ບໍລິສັດ.
ການຈັດງານວາງສະແດງສິນຄ້າລາວ – ຫວຽດນາມ ຄັ້ງນີ້ເປັນຄັ້ງທີ່ 9 ເພື່ອສົ່ງເສີມການຄ້າດ້ວຍກັນ ຫຼຸດອັດຕາພາສີພິເສດ ຕໍ່ກັບສິນຄ້າທີ່ມີແຫຼ່ງກຳເນີດຈາກສອງປະເທດ, ວາງມາດຕະການເພື່ອເພີ່ມມູນຄ້າການຄ້າ ລາວ – ຫວຽດນາມ ໃຫ້ເພີ່ມຂຶ້ນ, ງານດັ່ງກ່າວກໍ່ຈະເປັນການກະຕຸ້ນເສດຖະກິດຂະຫຍາຍການຮ່ວມມືທາງການຄ້າ ແລະ ການລົງທຶນຢ່າງຕໍ່ເນື່ອງ, ງານດັ່ງກ່າວມີຫ້ອງວາງສະແດງທັງໝົດ 400 ຫ້ອງ ມີຫຼາຍກວ່າ 200 ບໍລິສັດ ເຂົ້າຮ່ວມ. ໃນນັ້ນ, ມີນັກທຸລະກິດ ຈາກ ສສ ຫວຽດນາມ 98 ບໍລິສັດນຳສິນຄ້າຂອງຕົນເຂົ້າຮ່ວມ.
ທ່ານກ່າວຕື່ມອີກວ່າ: ງານດັ່ງກ່າວຈະຊ່ວຍສົ່ງເສີມນັກທຸລະກິດທັງສອງປະເທດ ໃຊ້ງານນີ້ເປັນເວທີແລກປ່ຽນຂໍ້ມູນ – ຂ່າວສານ ເຈລະຈາຫາຄູ່ຄ້າສ້າງຄວາມເຂັ້ມແຂງທາງດ້ານທຸລະກິດເພື່ອພ້ອມກັນພັດທະນາຮ່ວມກັນ.
ງານວາງສະແດງນີ້ເປັນຂົວຕໍ່ທີ່ມີປະສິດທິຜົນສຳລັບບັນດາການຈັດຕັ້ງການຄ້າ, ຜູ້ຜະລິດ, ນັກລົງທຶນຫວຽດນາມ ແລະ ລາວ ພົບປະແລກປ່ຽນປະສົບການ, ຖ່າຍທອດເຕັກໂນໂລຊີ, ການລົງທຶນ, ສຳພັນທຸລະກິດນຳກັນ, ງານດັ່ງກ່າວຈະເປັນເງື່ອນໄຂທີ່ດີສຳລັບບັນດາວິສາຫະກິດຂອງຫວຽດນາມ ທີ່ຈະໄດ້ມີໂອກາດໂຄສະນາຍີ່ຫໍ້ ຊອກຫາຕະຫຼາດ ແລະ ຄວາມຕ້ອງການຊົມໃຊ້ຂອງສິນຄ້າຕົນ ຈາກນັ້ນສາມາດສ້າງຕາໜ່າງແຈກຢາຍ ແລະ ຈຳໜ່າຍສິນຄ້າໄປຍັງຕະຫຼາດລາວ ແລະ ພາກຕາເວັນອອກສ່ຽງເໜືອຂອງປະເທດໄທ.
ໃນງານມີສິນຄ້າຫຼາກຫຼາຍລາຍການເປັນຕົ້ນແມ່ນ: ເຄື່ອງໄຟຟ້າ, ເຄື່ອງຢາງ, ເຄື່ອງມືກະສິກຳ, ອາຫານທະເລ, ເຟີນີເຈີ, ເຄື່ອງຫັດຖະກຳ, ກະສິກຳປຸງແຕ່ງ, ສິນຄ້າໂອດ໊ອບ, ຢາພື້ນເມືອງ ແລະ ອື່ນໆ.
ທ່ານ ວິລັດ ປັນຍາລາດ ປະທານບໍລິສັດຄຳທະນະພອນ ຄວັດແກະສະຫຼັກຫັດຖະກຳໄມ້ຈຳກັດຜູ້ດຽວໄດ້ກ່າວວ່າ: ງານດັ່ງກ່າວຈະໃຫ້ໂອກາດຜູ້ຜະລິດ ແລະ ຜູ້ຊົມໃຊ້ໄດ້ມາພົບປະກັນ ບໍ່ວ່າຈະເປັນທຸລະກິດລາວ ຫຼື ຫວຽດນາມ ເຊິ່ງຮຽກຮ້ອງຜູ້ປະກອບການໃຊ້ເວທີນີ້ເພື່ອຕໍ່ຍອດການຂາຍ ຫຼື ສ້າງຕາໜ່າງໃຫ້ສິນຄ້າຂອງຕົນ ບໍ່ຢາກໃຫ້ຄິດວ່າເອົາງານນີ້ມາພຽງຊື້ – ຂາຍເທົ່ານັ້ນ ຕ້ອງຄິດວ່າຈະຕ້ອງໄດ້ມີການເຮັດສັນຍາຊື້ – ຂາຍໄລຍະຍາວ ຫຼັງຈາກແລ້ວງານກໍ່ຕາມ.
ດ້ານ ທ່ານ ລັງກອນ ໄຊຍະວົງ ປະທານທີ່ປຶກສາ ບໍລິສັດ ກຸ່ມໄຊຍະວົງ ຈຳກັດຜູ້ດຽວ (ທຸລະກິດກ່ຽວກັບລະບົບທໍ່ສົ່ງນ້ຳທຸກປະເພດ) ໄດ້ກ່າວວ່າ: ສຳລັບການມາວາງສະແດງສິນຄ້າໃນງານເປົ້າໝາຍຫຼັກຂອງຕົນແມ່ນ ເພື່ອວາງສະແດງສິນຄ້າ ແລະ ໃຫ້ຄຳປຶກສາແກ່ລູກຄ້າທີ່ມີບັນຫາເລື້ອງລະບົບທໍ່ສົ່ງນ້ຳທຸກປະເພດ. ສະນັ້ນ, ໂອກາດທາງການຄ້າຂອງບໍລິສັດແມ່ນສ້າງຄວາມເຂົ້າໃຈເພື່ອໃຫ້ລູກຄ້າຮັບຮູ້ກ່ຽວກັບຜະລິດຕະພັນ ຫຼັງຈາກນັ້ນການຊື້ – ຂາຍກໍ່ຈະເກີດຕາມຫຼັງ ແລະ ຍືນຍົງກວ່າການຂາຍພຽງໜ້າຮ້ານ.
[ພາບ ແລະ ຂ່າວ: ໜັງສືພິມເສດຖະກິດ - ການຄ້າ]
