ໃນຕອນເຊົ້າຂອງວັນທີ 23 ພຶດສະພາ 2016 ຜ່ານມາ, ກະຊວງອຸດສາຫະກຳ ແລະ ການຄ້າ (ອຄ) ໄດ້ຈັດກອງປະຊຸມເຊື່ອມຊຶມມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ X ຂອງພັກຂຶ້ນ ທີ່ຫ້ອງປະຊຸມໃຫຍ່ຂອງກະຊວງ ອຄ ໂດຍໃຫ້ກຽດເຂົ້າຮ່ວມເປັນປະທານໂດຍ ສະຫາຍ ນາງ ເຂັມມະນີ ພົນເສນາ ກຳມະການສູນກາງພັກ, ເລຂາຄະນະບໍລິຫານງານພັກກະຊວງ, ລັດຖະມົນຕີກະຊວງອຸດສາຫະກຳ ແລະ ການຄ້າ, ມີບັນດາສະຫາຍໃນຄະນະບໍລິຫານງານພັກກະຊວງ, ຮອງລັດຖະມົນຕີກະຊວງ, ຫົວໜ້າກົມ, ຮອງຫົວໜ້າກົມ, ຫົວໜ້າສະຖາບັນຄົ້ນຄວ້າເສດຖະກິດການຄ້າ, ຮອງຫົວໜ້າສະຖາບັນຄົ້ນຄວ້າເສດຖະກິດການຄ້າ, ບັນດາເລຂາຄະນະພັກຮາກຖານ, ເລຂາ, ຮອງເລຂາໜ່ວຍພັກລັດວິສາຫະກິດ ແລະ ບໍລິສັດອ້ອມຂ້າງອົງຄະນະພັກກະຊວງ ລວມທັງໝົດ 242 ທ່ານ.
ກອງຊຸມດັ່ງກ່າວຈະຈັດຂຶ້ນເປັນເວລາ 3 ວັນເຕັມ, ເລີ້ມແຕ່ວັນທີ 23 – 25 ພຶດສະພາ 2016 ເຊິ່ງເນື້ອໃນໃນເອກະສານທີ່ຈະເຜີຍແຜ່ເຊື່ອມຊຶມທັງໝົດປະກອບມີ 3 ບົດຄື: ບົດທີ 01 ຜົນສຳເລັດການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ X ຂອງພັກ; ບົດທີ 02 ບັນດາຄາດໝາຍໃຫຍ່ສຳລັບຮອດປີ 2030, 2025 ແລະ 2020; ບົດທີ 03 ທິດທາງວຽກງານຈຸດສຸມສຳລັບໄລຍະແຕ່ປີ 2016 – 2020 ເພື່ອນຳພາປະເທດຊາດຫຼຸດພົ້ນອອກຈາກສະຖານະພາບຄວາມດ້ອຍພັດທະນາ.
[ບົດຂ່າວ: ສູນສະຖິຕິ ແລະ ຂ່າວສານ]
