ກະຊວງອຸດສາຫະກຳ ແລະ ການຄ້າ (ອຄ) ໄດ້ຈັດກອງປະຊຸມເຊື່ອມຊຶມເອກະສານກະກຽມເລືອກຕັ້ງສະມາຊິກສະພາແຫ່ງຊາດ ຊຸດທີ VIII ແລະ ສະພາປະຊາຊົນຂັ້ນແຂວງໃຫ້ພະນັກງານທີ່ຂຶ້ນກັບ ກະຊວງ ອຄ ເພື່ອໃຫ້ເຂົ້າໃຈຈຸດປະສົງ, ເປົ້າໝາຍ ຮັບປະກັນຜົນສຳເລັດໃນບັ້ນເລືອກຕັ້ງ ແລະ ສາມາດເລືອກໄດ້ບຸກຄົນທີ່ເປັນຕົວແທນຂອງປະຊາຊົນ.
ກອງປະຊຸມດັ່ງກ່າວ ມີຜູ້ເຂົ້າຮ່ວມທົ່ວກະຊວງ ອຄ, ສະພາການຄ້າ ແລະ ອຸດສາຫະກຳແຫ່ງຊາດ ແລະ ລັດວິສາຫະກິດທີ່ຂຶ້ນກັບກະຊວງ ອຄ ທັງໝົດ 533 ທ່ານ ໂດຍແບ່ງເປັນ 2 ວັນຄື: ວັນທີ 17 ກຸມພາ 2016 ມີຜູ້ເຂົ້າຮ່ວມ 279 ທ່ານ ແລະ ວັນທີ 18 ກຸມພາ 2016 ມີຜູ້ເຂົ້າຮ່ວມ 256 ທ່ານ, ໃນແຕ່ລະວັນຈະຈັດເຄິ່ງຄາບ ຄື: 8:00-12:00 ໂມງ ໂດຍການເຂົ້າຮ່ວມ ແລະ ເປັນປະທານຂອງ ທ່ານ ສຽວສະຫວາດ ສະແຫວງສຶກສາ ແລະ ທ່ານ ບຸນມີ ມະນີວົງ ລັດຖະມົນຕີຊ່ວຍວ່າການກະຊວງ ອຄ.
ທ່ານ ສຽວສະຫວາດ ສະແຫວງສຶກສາ ລັດຖະມົນຕີຊ່ວຍວ່າການກະຊວງ ອຄ ກ່າວວ່າ: ການເລືອກຕັ້ງສະມາຊິກສະພາແຫ່ງຊາດ ຊຸດທີ VIII ແລະ ສະພາປະຊາຊົນຂັ້ນແຂວງຄັ້ງນີ້ ຖືເປັນບຸນປາງໃຫຍ່ທີ່ປະຊາຊົນລາວບັນດາເຜົ່າໃນຂອບເຂດທົ່ວປະເທດ ຈະໄດ້ພ້ອມກັນໄປໃຊ້ສິດຂອງຕົນເອງເລືອກເອົາສະມາຊິກສະພາແຫ່ງຊາດ ເພື່ອເປັນຕົວແທນຂອງປະຊາຊົນໃນແຕ່ລະເຂດ, ສຳລັບການເຊື່ອມຊຶມເອກະສານຄັ້ງນີ້ ມັນກໍ່ຄືການເລືອກຕັ້ງຫຼາຍຄັ້ງທີ່ຜ່ານມາ ຕ້ອງມີເອກະສານທີ່ມີລັກສະນະລະບຽບການເລືອກຕັ້ງ, ຫຼັກການເລືອກຕັ້ງ, ຄວາມເປັນເອກະລາດ ອະທິປະໄຕ ໃນການໃຊ້ສິດຂອງປະຊາຊົນລາວ. ສະນັ້ນ, ຮຽກຮ້ອງໃຫ້ຜູ້ເຂົ້າຮ່ວມຈົ່ງໄດ້ຕັ້ງໃຈຮັບຟັງເພື່ອໃຊ້ສິດຂອງຕົນໃຫ້ໄດ້ຕາມລະດັບຄາດໝາຍ ແລະ ເມື່ອເວລາກັບຄືນສູ່ຄອບຄົວກໍ່ຕ້ອງໄດ້ນຳເອົາເນື້ອໃນທີ່ໄດ້ຮັບຮູ້ເຜີຍແຜ່ໃຫ້ສະມາຊິກໃນຄອບຄົວ, ໝູ່ເພື່ອນ ຫຼື ໃຫ້ຄຳແນະນຳທີ່ຖືກຕ້ອງໃນການໄປໃຊ້ສິດຂອງຕົນ.
ທ່ານລັດຖະມົນຕີຊ່ວຍວ່າການກະຊວງ ອຄ ກ່າວຕື່ມອີກວ່າ: ເອກະສານທີ່ນຳມາເຜີຍແຜ່ໃນຄັ້ງນີ້ປະກອບມີ: ມະຕິກົມການເມືອງ ເລກທີ 29/ກມສພ, ຜົນງານທີ່ພົ້ນເດັ່ນໃນການປົກປັກຮັກສາພັດທະນາປະເທດຊາດ 40 ປີ, ພາລະບົດບາດສິດໜ້າທີ່ສະພາແຫ່ງຊາດ ຊຸດທີ VIII ແລະ ສະພາແຂວງ, ເອກະສານສິດເປັນເຈົ້າຂອງປະຊາຊົນ, ເອກະສານກົດໝາຍວ່າດ້ວຍເລືອກຕັ້ງສະພາແຫ່ງຊາດ ຊຸດທີ VIII ແລະ ເອກະສານໂຄສະນາປຸກລະດົມຂະບວນການ.
[ບົດຂ່າວ: ໜັງສືພິມເສດຖະກິດ-ການຄ້າ]
[ສະບັບວັນທີ: 19 ກຸມພາ 2016]
