ໃນວັນພະຫັດ ທີ 7 ມັງກອນ 2016 ທີ່ຜ່ານມາ ທີ່ກະຊວງອຸດສາຫະກຳ ແລະ ການຄ້າ ໄດ້ມີພິທີປະກາດແຕ່ງຕັ້ງ ທາ່ນ ກຽງຄຳໝັ້ນ ໂຄດຕະວົງ ຂຶ້ນເປັນຮອງຫົວໜ້າກົມນະໂຍບາຍການຄ້າຕ່າງປະເທດ ແລະ ທ່ານ ຂວັນໃຈ ອ່ຽມສຸທິ ຂຶ້ນເປັນຮອງຫົວໜ້າກົມການຄ້າພາຍໃນ ຄົນໃໝ່, ໃຫ້ກຽດເປັນປະທານໂດຍ ທ່ານ ນາງ ເຂັມມະນີ ພົນເສນາ ລັດຖະມົນຕີວ່າການກະຊວງອຸດສາຫະກຳ ແລະ ການຄ້າ ພ້ອມດ້ວຍຕ່າງໜ້າຈາກບັນດາກົມອ້ອມຂ້າງເຂົ້າຮ່ວມ.
ໂອກາດດຽວກັນ, ທ່ານ ນາງ ເຂັມມະນີ ພົນເສນາ ໄດ້ກ່າວວ່າ: ອີງຕາມຄວາມຮຽກຮ້ອງຕ້ອງການຂອງໜ້າທີ່ວຽກງານ ແລະ ຄວາມກ້າວໜ້າໃນການຝຶກຝົນຫຼໍ່ຫຼອມຂອງບັນດາພະນັກງານຂັ້ນພະແນກທີ່ມີຄວາມສາມາດສູງ ຈົນສາມາດກ້າວຂຶ້ນໄປເປັນລະດັບຮອງຫົວໜ້າກົມໄດ້. ພາຍຫຼັງທີ່ໄດ້ປະກາດແຕ່ງຕັ້ງໄປແລ້ວ ບັນດາຮອງຫົວໜ້າກົມຄົນໃໝ່ຕ້ອງມີຄວາມເສຍສະຫຼະ ເພື່ອໜ້າທີ່ວຽກງານອັນໃຫຍ່ຫຼວງ ແລະ ເພື່ອຜົນປະໂຫຍດສ່ວນລວມ ເຮັດໃຫ້ໜ້າທີ່ວຽກງານປະສົບຜົນສຳເລັດໄປດ້ວຍດີ. ສ່ວນບັນດາກົມຕ່າງໆ ຢາກໃຫ້ເບິ່ງຄືນເຖິງພາລະບົດບາດ, ສິ່ງທີ່ສາມາດເຮັດໄດ້ ລວມທັງຂໍ້ຄົງຄ້າງຕ່າງໆ ແລະ ປັບປຸງສັບຊ້ອນພະນັກງານໄປຕາມຄວາມຮຽກຮ້ອງຕ້ອງການຂອງໜ້າທີ່ວຽກງານຕາມຄວາມເໝາະສົມ.
[ບົດຂ່າວ: ໜັງສືພິມເສດຖະກິດ-ການຄ້າ]
