ໃນຕອນບ່າຍຂອງມື້ນີ້, ກົມແຜນການ ແລະ ການຮ່ວມມື ກະຊວງ ອຸດສາຫະກຳ ແລະ ການຄ້າ (ອຄ) ໄດ້ຈັດພິທີມອບຮັບ ໃບຢັ້ງຢືນເປັນໜ່ວຍພັກເຂັ້ມແຂງ ຮູ້ນຳພາຮອບດ້ານ ຄັ້ງທີ II ປະຈຳສົກປີ 2014-2015 ຂອງໜ່ວຍພັກ ກົມແຜນການ ແລະ ການຮ່ວມມື ຂຶ້ນທີ່ຫ້ອງປະຊຸມພັກ ກະຊວງ ອຄ ໂດຍການເປັນປະທານຂອງ ທ່ານ ນາງ ເຂັມມະນີ ພົນເສນາ ເລຂາຄະນະພັກ, ລັດຖະມົນຕີວ່າການ ກະຊວງ ອຄ, ທ່ານ ສົມຈິດ ອິນທະມິດ ຄະນະປະຈຳພັກ, ລັດຖະມົນຕີຊ່ວຍວ່າການ ກະຊວງ ອຄ, ທ່ານ ສີລິສຳພັນ ວໍຣະຈິດ ຄະນະປະຈຳພັກກະຊວງ, ຫົວໜ້າກົມແຜນການ ແລະ ການຮ່ວມມື, ພ້ອມດ້ວຍສະມາຊິກພັກ ກົມແຜນການ ແລະ ການຮ່ວມມື ຈຳນວນ 17 ສະຫາຍ ແລະ ຕ່າງໜ້າຈາກບັນດາກົມອ້ອມຂ້າງເຂົ້າຮ່ວມ.
ໃນພິທີ ໄດ້ຜ່ານບົດສະຫຼຸບຕີລາຄາການຈັດຕັ້ງປະຕິບັດແຜນການສ້າງໜ່ວຍພັກເຂັ້ມແຂງ-ຮູ້ນຳພາຮອບດ້ານຄັ້ງທີ II ຂອງໜ່ວຍພັກກົມແຜນການ ແລະ ການຮ່ວມມື (ຜຮ) ປະຈຳສົກປີ 2014-2015 ແລະ ແຜນສ້າງໜ່ວຍພັກເຂັ້ມແຂງ-ຮູ້ນຳພາຮອບດ້ານຄັ້ງທີ III ສົກປີ 2015-2016, ຈາກນັ້ນກໍ່ໄດ້ຜ່ານມະຕິຕົກລົງຮັບຮອງເອົາໜ່ວຍພັກ ກົມ ຜຮ ເປັນໜ່ວຍພັກເຂັ້ມແຂງ-ຮູ້ນຳພາຮອບດ້ານຄັ້ງທີ II ແລະ ມະຕິຕົກລົງຮັບຮອງເອົາແຜນການສ້າງໜ່ວຍພັກເຂັ້ມແຂງ-ຮູ້ນຳພາຮອບດ້ານຄັ້ງທີ III ສົກປີ 2015-2016 ກ່ອນຈະມີການມອບໃບຢັ້ງຢືນໜ່ວຍພັກເຂັ້ມແຂງ-ຮູ້ນຳພາຮອບດ້ານຄັ້ງທີ II ໃຫ້ແກ່ ກົມແຜນການ ແລະ ການຮ່ວມມື.
ໃນຕອນທ້າຍຂອງຂອງພີທີ ທ່ານ ນາງ ເຂັມມະນີ ພົນເສນາ ເລຂາຄະນະພັກ ກະຊວງ ອຄ ຍັງໄດ້ກ່າວວ່າ: ເພື່ອໃຫ້ໜ່ວຍພັກ ກົມ ຜຮ ເປັນໜ່ວຍພັກເຂັ້ມແຂງ-ຮູ້ນຳພາຮອບດ້ານ ຈະຕ້ອງໄດ້ເອົາໃຈໃສ່ເນັ້ນໜັກຕື່ມວຽກງານ 3 ສ້າງ ແລະ ວຽກງານການຜະລິດເປັນສິນຄ້າ ແລະ ຄ້ຳປະກັນສະບຽງອາຫານ, ເຮັດແນວໃດໃຫ້ວຽກງານທີ່ສະຫຼຸບມາໃຫ້ມີການເກາະກ່າຍກັນ, ສືບຕໍ່ຜັນຂະຫຍາຍຫຼັກການລວມສູນປະຊາທິປະໄຕ ໃຫ້ເຫັນໄດ້ວ່າບົດບາດການນຳພາຂອງພັກ ແລະ ປະຊາທິປະໄຕໂດຍລວມເປັນແນວໃດ, ນອກນັ້ນຍັງຕ້ອງສືບຕໍ່ເອົາໃຈໃສ່ກໍ່ສ້າງແນວຄິດການເມືອງໃຫ້ແກ່ບຸຂະລາກອນພາຍໃນໃຫ້ມີຄວາມເຂັ້ມແຂງ, ຮູ້ນຳພາ ແລະ ຈັດຕັ້ງປະຕິບັດ ລວມເຖິງວຽກງານວິຊາສະເພາະອີກດ້ວຍ.
[ບົດຂ່າວ: ສູນສະຖິຕິ ແລະ ຂ່າວສານ]
