ໃນຕອນເຊົ້າຂອງ ວັນທີ 21 ແລະ 23 ທັນວາ 2015 ທີ່ຜ່ານມາ ຢູ່ໂຮງແຮມດອນຈັນພາເລດ, ນະຄອນຫຼວງວຽງຈັນ. ໄດ້ຈັດພິທີເຊັນສັນຍາກູ້ຢືມຕໍ່ຂຶ້ນ ລະຫວ່າງ ກົມສົ່ງເສີມວິສາຫະກິດຂະໜາດນ້ອຍ ແລະ ກາງ (ກສວ) ກັບສອງທະນາຄານທຸລະກິດ ຊຶ່ງໄດ້ແກ່ ທະນາຄານ ລາວຈີນ ຈຳກັດ ແລະ ທະທະນາຄານ ເອັສທີ ຈຳກັດ ຕາມລຳດັບ. ຈຸດປະສົງຂອງການເຊັນສັນຍາຄັ້ງນີ້ ແມ່ນເປັນການສະໜອງແຫຼ່ງທຶນໃຫ້ແກ່ ທະນາຄານທຸລະກິດ ເພື່ອປ່ອຍເງິນ ກູ້ຕໍ່ໃຫ້ແກ່ SME ຢູ່ ສ ປ ປ ລາວ, ໂດຍສະເພາະແມ່ນສະໜອງເງິນທຶນໄລຍະຍາວ (ທຶນຄົງທີ່).
ການສະໜອງທຶນຂອງ ກົມ ກສວ ໃນຄັ້ງນີ້ ເປັນການສ້າງເງຶ່ອນໄຂໃຫ້ແກ່ທະນາຄານ ລາວຈີນ ຈຳກັດ ແລະ ທະນາຄານ ເອັສທີ ຈຳກັດ ເພື່ອສະໜອງສິນເຊື່ອໃຫ້ແກ່ SME ຕາມເງຶ່ອນໄຂ ແລະ ມີອັດຕາດອກເບ້ຍທີ່ສົມເຫດສົມຜົນ. ໂຄງການດັ່ງກ່າວນີ້ ຈະຊ່ວຍເຮັດໃຫ້ SME ສາມາດເຂົ້າເຖິງແຫລ່ງທຶນໄດ້ຫລາຍຂື້ນ ຊຶ່ງຈຳນວນທຶນທີ່ 02 ທະນາຄານ ຈະໄດ້ຮັບມີມູນຄ່າທຽບເທົ່າ 4 ລ້ານໂດລາສະຫະລັດ ຕໍ່ ທະນາຄານ (ລວມເປັນ 8 ລ້ານໂດລາ) ແລະ ມີເງື່ອນໄຂການປ່ອຍກູ້ດັ່ງລຸ່ມນີ້:
ເປົ້າໝາຍການປ່ອຍກູ້: ແມ່ນຫົວໜ່ວຍວິສາຫະກິດທີ່ມີຈຳນວນແຮງງານລະຫວ່າງ01 – 99ຄົນ ລົງມາ ຫລື ເປັນທຸລະກິດ SME ຕາມການນິຍາມຂອງລັດຖະບານ (ດຳລັດ 42/ນຍ, ລົງວັນທີ 20/4/2004);
ວົງເງິນສູງສຸດ: ທີ່ທະນາຄານທຸລະກິດ ປ່ອຍເງິນກູ້ໃຫ້ແກ່ SME ແມ່ນບໍ່ເກີດ 200,000 ໂດລາສະຫະລັດ/ລາຍ ໃນອັດຕາດອກເບ້ຍທີ່ເຫັນວ່າເໝາະສົມ;
ປະເພດທຶນ: ທີ່ທະນາຄານສະໜອງແກ່ SME ປະກອບມີ:
ທຶນໄລຍະສັ້ນ (ທຶນໝູນວຽນ) = 30%
ທຶນໄລຍະຍາວ (ທຶນຄົງທີ) = 70%.
ສໍາລັບຂັ້ນຕອນການພິຈາລະນາ ແລະ ອະນຸມັດສິນເຊື່ອແກ່ SME ນັ້ນ ແມ່ນມອບໃຫ້ເປັນໜ້າທີ່ ແລະ ຄວາມຮັບຜິດຊອບຂອງ ທະນາຄານທຸລະກິດເອງ, ກົມສົ່ງເສີມວິສາຫະກິດຂະໜາດນ້ອຍ ແລະ ກາງ ຈະເຮັດໜ້າທີ່ຕິດຕາມ, ປະເມີນຜົນ ແລະ ແນະນໍາທະນາຄານທຸລະກິດ ເພື່ອຮັບປະກັນວ່າການນໍາໃຊ້ແຫລ່ງທຶນດັ່ງກ່າວສອດຄ່ອງກັບຈຸດປະສົງ ແລະ ເປົ້າໝາຍ ທີ່ທາງກົມສົ່ງເສີມວິສາຫະກິດຂະໜາດນ້ອຍ ແລະ ກາງ ກໍານົດໄວ້. ນອກນັ້ນ ພວກກົມພວກເຮົາ ຍັງຈະເຮັດໜ້າທີ່ສະໜັບສະໜູບທາງດ້ານວິຊາການ ໃຫ້ແກ່ SME ໃນການສ້າງແຜນທຸລະກິດ, ການຄຸ້ມຄອງທາງດ້ານການເງິນ ເພື່ອສ້າງເງື່ອນໄຂອັນສະດວກໃຫ້ SME ໄດ້ຮັບເງິນກູ້ຈາກທະນາຄານດີຂຶ້ນກວ່າເກົ່າ.
