ກອງປະຊຸມປັບປຸງກົດໝາຍວ່າດ້ວຍການແຂ່ງຂັນທາງທຸລະກິດ ສະບັບ ພາສາອັງກິດ
ວັນທີ 15 ທັນວາ 2015 ທີ່ໂຮງແຮມ ເສດຖາ ປາລາສ ນະຄອນຫລວງວຽງຈັນ
ກົມການຄ້າພາຍໃນ ກະຊວງອຸດສາຫະກຳ ແລະ ການຄ້າ ໃນຖານະທີ່ຮັບຜິດຊອບໂດຍກົງວຽກງານປົກປ້ອງຜູ່ຊົມໃຊ້ແລະ ວຽກງານແຂ່ງຂັນທາງທຸລະກິດໄດ້ຈັດກອງປະຊຸມປັບປຸງກົດໝາຍວ່າດ້ວຍການແຂ່ງຂັນທາງທຸລະກິດ ສະບັບ ພາສາອັງກິດວັນທີ 15 ທັນວາ 2015 ທີ່ໂຮງແຮມ ເສດຖາ ປາລາສ ນະຄອນຫລວງວຽງຈັນ ຊຶ່ງກອງປະຊຸມດັ່ງກ່າວນີ້ແມ່ນໄດ້ຮັບການສະໜັບສະໜູນທຶນ ຈາກອົງການGIZ-CPL2 ລັດຖະບານເຢຍລະມັນໂດຍການເປັນປະທານຂອງທ່ານ ສຸລະຍົນ ພິລາວົງຮອງຫົວໜ້າກົມການຄ້າພາຍໃນ ກະຊວງອຸດສາຫະກຳແລະ ການຄ້າເຂົ້າຮ່ວມໃນກອງປະຊຸມມີຜູ້ຕາງໜ້າຈາກພາຍໃນກະຊວງ, ຂະແໜງການ ແລະ ອົງການທີ່ກ່ຽວຂ້ອງເຊັ່ນ: ສຳນັກງານປະທານປະເທດ, ຫ້ອງການລັດຖະບານ, ກະຊວງການຕ່າງປະເທດ, ມະຫາວິທະຍາໄລແຫ່ງຊາດ ພາກວິຊາເສດຖະສາດ, ພາກວິຊາສັກສອນສາດ, ຜູ້ຊ່ຽວຊານຈາກ ໂຄງການ LUNA2ແລະ ຜູ້ປະສານງານໂຄງການ GIZ ລວມທັງໝົດ 25 ທ່ານ.
ຈຸດປະສົງຂອງການຈັດກອງປະຊຸມໃນຄັ້ງນີ້ແມ່ນເພື່ອເປັນການຮຽບຮຽງກົດໝາຍວ່າດ້ວຍການແຂ່ງຂັນທາງທຸລະກິດ ສະບັບພາສາ ອັງກິດ ເພື່ອໃຫ້ທັນກັບການຈັດພີມປື້ມກົດໝາຍດັ່ງກ່າວເປັນສອງພາສາໃນຫົວດຽວ ແລະ ແຈກຢາຍໃນງານພິທິເປີດໂຕປື້ມກົດໝາຍດັ່ງກ່າວໃນຕົ້ນປີ 2016 ທີ່ຈະມາເຖີງນີ້. ໃນກອງປະຊຸມ ບັນດາຜູ້ເຂົ້າຮ່ວມໄດ້ມີການປະກອບຄຳເຫັນ, ສົນທະນາແລກປ່ຽນຄຳເຫັນ ໃສ່ກົດໝາຍວ່າດ້ວຍການແຂ່ງຂັນທາງທຸລະກິດ ສະບັບພາສາອັງກິດ ແມ່ນເຕັມໄປດ້ວຍບັນຍາກາດທີ່ຟົດຟື້ນດີ ໂດຍສະເພາະແມ່ນ ຜູ້ຊ່ຽວຊານຈາກສາກົນ ແລະ ອາຈານຈາກມະຫາວິທະຍາໄລແຫ່ງຊາດ.
