ໃນຕອນເຊົ້າວັນທີ 29 ກັນຍາ 2015, ທ່ານ ນາງ ເຂັມມະນີ ພົນເສນາ ລັດຖະມົນຕີວ່າການ ກະຊວງອຸດສາຫະກຳ ແລະ ການຄ້າ ໄດ້ເຂົ້າພົບ ທ່ານ ໂຣແບັກໂຕ ອາເຊເວີໂດ, ຜູ້ອຳນວຍການໃຫຍ່ຂອງອົງການການຄ້າ ເພື່ອຍື່ນສານການໃຫ້ສັດຕະຍາບັນຮັບຮອງເອົາສັນຍາວ່າດ້ວຍ ການອຳນວຍຄວາມສະດວກທາງການຄ້າຂອງ ສປປ ລາວ ຊຶ່ງເປັນສະມາຊິກອົງການການຄ້າໂລກປະເທດທີ 18 ທີ່ຮັບຮອງເອົາສັນຍາດັ່ງກ່າວ.
ສັນຍາວ່າດ້ວຍ ການອຳນວຍຄວາມສະດວກທາງການຄ້າ ແມ່ນໝາກຜົນຂອງກອງປະຊຸມລັດຖະ ມົນຕີ ທີ່ ບາຫຼີ ໃນປີ 2013 ຊຶ່ງປະກອບດ້ວຍຂໍ້ກໍານົດດ້ານຄວາມໂປ່ງໃສ, ການເຄື່ອນຍ້າຍສິນຄ້າລະຫວ່າງປະເທດ, ການກວດກາ, ການແຈ້ງພາສີ, ລວມທັງການຂົນສົ່ງສິນຄ້າຜ່ານແດນ.
ສັນຍາດັ່ງກ່າວ ກຳນົດມາດຕະການກ່ຽວກັບຂະແໜງການຄ້າ, ພາສີ, ແລະ ຂະແໜງການທີ່ກ່ຽວຂ້ອງອື່ນໆ ໃຫ້ສາມາດປະຕິບັດວຽກງານດ້ານການອຳນວຍຄວາມສະດວກທາງການຄ້າໃຫ້ມີປະສິດທິຜົນ ເພື່ອຫຼຸດຜ່ອນຕົ້ນທຶນ ຫຼື ຄ່າໃຊ້ຈ່າຍຂອງພາກທຸລະກິດທີ່ຕິດພັນກັບທຸລະກໍາການນໍາເຂົ້າ-ສົ່ງອອກສິນຄ້າ ຊຶ່ງມີຄວາມສຳຄັນຢ່າງຍິ່ງຕໍ່ປະເທດດ້ອຍພັດທະນາທີ່ບໍ່ມີຊາຍແດນຕິດກັບທະເລ ຄື ສປປ ລາວ ເພື່ອຈັດຕັ້ງປະຕິບັດ ເພື່ອຫຼຸດຜ່ອນຂັ້ນຕອນ ແລະ ຄ່າໃຊ້ຈ່າຍດ້ານການຄ້າ.
ສັນຍາວ່າດ້ວຍການອຳນວຍຄວາມສະດວກທາງການຄ້າ ຈະມີຜົນບັງຄັບໃຊ້ເມື່ອສອງສ່ວນສາມຂອງສະມາຊິກອົງການການຄ້າໂລກຮັບຮອງ ແລະ ປະຈຸບັນມີ 19 ປະເທດສະມາຊິກຮັບຮອງເອົາສັນຍາດັ່ງກ່າວ ຄື: ສປປ ລາວ, ຈີນຮົງກົງ, ສິງກະໂປ, ສະຫະລັດອາເມລິກາ, ເມົາຣີຊີອຸສ, ມາເລເຊຍ, ຍີ່ປຸ່ນ, ອົດສະຕຣາລີ, ບອດສວານາ, ທຣີນີດາດ ແລະ ໂທບາໂກ, ສ.ເກົາຫຼີ, ນິກາຣາກົວ, ນີເຈີ, ເບີລິສ, ສະວິດເຊີແລນ, ຈີນໄຕ້ຫວັນ, ສປ ຈີນ, ລິຈເກັນສະໄຕ ແລະ ນິວຊີແລນ.
ບົດຂ່າວ: ກະຊວງອຸດສາຫະກຳ ແລະ ກາຄ້າ
