ໃນວັນທີ 7 ສິງຫາ 2015 ທີ່ຜ່ານມາ ພະແນກ ອຸດສາຫະກຳ ແລະ ການຄ້າ ນະຄອນຫຼວງວຽງຈັນ ຮ່ວມກັບພະແນກ ຍຸຕິທຳ ນະຄອນຫຼວງວຽງຈັນ ໄດ້ຈັດຊຸດຝຶກອົບຮົມກົດໝາຍ ໄລຍະສັ້ນ 45 ວັນ ໃຫ້ແກ່ພະນັກງານຂອງຂະແໜງອຸດສາຫະກຳ ແລະ ການຄ້າ 9 ຕົວເມືອງ ທົ່ວນະຄອນຫຼວງວຽງຈັນ ຊຶ່ງຜູ້ຕາງໜ້າຈາກພະແນກ ປົກປ້ອງຜູ້ຊົມໃຊ້ ແລະ ສົ່ງເສີມການແຂ່ງຂັນ (ກົມການຄ້າພາຍໃນ, ກະຊວງ ອຸດສາຫະ ກຳ ແລະ ການຄ້າ) ໄດ້ຂື້ນບັນຍາຍເຜີຍແຜ່ຄວາມຮູ້ພື້ນຖານ ກ່ຽວກັບກົດ ໝາຍວ່າດ້ວຍ ການປົກປ້ອງຜູ້ຊົມໃຊ້ ໃຫ້ແກ່ຜູ້ເຂົ້າຮ່ວມກອງປະຊຸມດັ່ງກ່າວນີ້.
ໃນທີ່ປະຊຸມ ຜູ້ບັນຍາຍໄດ້ເນັ້ນໃຫ້ຮູ້ເຖິງຄວາມໝາຍ ຄວາມສຳຄັນ ຂອງການປົກປ້ອງຜູ້ຊົມໃຊ້ ທີ່ໄດ້ຮັບຜົນກະທົບທາງລົບ ຕໍ່ຊີວິດ, ສຸຂະພາບ ແລະ ຊັບສິນ ຈາກການຊົມໃຊ້ສິນຄ້າ ແລະ ການບໍລິການ ນອກຈາກນີ້ ຍັງໄດ້ຍົກໃຫ້ ນັກສຳມະນາກອນເຫັນເຖິງ ຮູບແບບການປົກປ້ອງຜູ້ຊົມໃຊ້ ຊຶ່ງປະກອບມີ: ການປົກປ້ອງຜູ້ຊົມໃຊ້ ດ້ານການໂຄສະນາ, ການປົກປ້ອງຜູ້ຊົມໃຊ້ ດ້ານການຕິດສະຫຼາກ ແລະ ການປົກປ້ອງຜູ້ຊົມໃຊ້ ດ້ານສັນຍາ ພ້ອມນີ້ກໍຍັງໄດ້ເນັ້ນເຖິງຄວາມຮັບຮູ້ ແລະ ຄວາມເຂົ້າໃຈກ່ຽວກັບ ສິດທິຂອງຜູ້ຊົມໃຊ້ ທີ່ຈະໄດ້ຮັບການປົກປ້ອງ, ພັນທະຂອງຜູ້ສະໜອງ ທີ່ຈະຕ້ອງມີຄວາມຮັບຜິດຊອບ ເມື່ອເກີດມີຜົນກະທົບດ້ານລົບ ຈາກການຊົມໃຊ້ສິນຄ້າ ແລະ ການບໍລິການຂອງຕົນ, ກົນໄກການແກ້ໄຂຂໍ້ຂັດແຍ່ງ ແລະ ຂະແໜງການ ການຄຸ້ມຄອງ ແລະ ຈັດຕັ້ງປະຕິບັດ ວຽກງານປົກປ້ອງຜູ້ຊົມໃຊ້.
ຈາກການເຜີຍແຜ່ໃນຄັ້ງນີ້ ເຫັນໄດ້ວ່ານັກສຳມະນາກອນ ໄດ້ໃຫ້ຄວາມສົນໃຈ, ມີຄວາມຮັບຮູ້ ແລະ ເຂົ້າໃຈ ເຖິງຄວາມໝາຍຄວາມສຳຄັນ ກ່ຽວກັບວຽກງານປົກປ້ອງຜູ້ຊົມໃຊ້ ເຊິ່ງເປັນວຽກງານ ໜຶ່ງທີ່ສຳຄັນ ເນື່ອງຈາກວ່າ ເປັນວຽກງານທີ່ສົ່ງຜົນກະທົບຕໍ່ການດຳລົງຊີວິດປະຈຳວັນ ຂອງຜູ້ຊົມໃຊ້ທຸກຄົນໃນສັງຄົມ.
