ໃນວັນທີ 7 ມິຖຸນາ 2015, ຄະນະຜູ້ແທນຂອງຄະນະກຳມາທິການກົດໝາຍ, ຄະນະກຳມາທິການເສດຖະກິດ (ສະພາແຫ່ງຊາດ) ແລະ ຄະນະສ້າງຮ່າງກົດໝາຍວ່າດ້ວຍການແຂ່ງຂັນທາງທຸລະກິດ ສປປ ລາວ ລວມທັງໝົດ 17 ທ່ານ ຊຶ່ງນຳໂດຍ ທ່ານ ດຣ.ນ. ສຸວັນເພັງ ບຸບຜານຸວົງ ຫົວໜ້າຄະນະກຳມາທິການເສດຖະກິດ ສະພາແຫ່ງຊາດ, ທ່ານ ບຸນມີ ມະນີວົງ ລັດຖະມົນຕີຊ່ວຍວ່າການ ກະຊວງອຸດສາຫະກຳ ແລະ ການຄ້າ ທັງເປັນຫົວໜ້າຄະນະຮັບຜິດຊອບສ້າງຮ່າງກົດໝາຍວ່າດ້ວຍການແຂ່ງຂັນທາງທຸລະກິດ ແລະ ທ່ານ ບຸນທຽນ ແກ້ວສີພາ ຮັກສາການຫົວໜ້າກົມການຄ້າພາຍໃນ, ກະຊວງ ອຸດສາຫະກຳ ແລະ ການຄ້າ, ທັງເປັນຮອງຫົວໜ້າຄະນະຮັບຜິດຊອບສ້າງຮ່າງກົດໝາຍວ່າດ້ວຍການແຂ່ງຂັນການຄ້າ ໄດ້ເດີນທາງໄປຖອດຖອນບົດຮຽນກ່ຽວກັບວຽກງານແຂ່ງຂັນການຄ້າ ກັບຄະນະກໍາມະການແຂ່ງຂັນການຄ້າ ອິນໂດເນເຊຍ (KPPU) ໂດຍສະເພາະແມ່ນບົດຮຽນໃນການສ້າງຮ່າງກົດໝາຍ ແລະ ການຈັດຕັ້ງປະຕິບັດກົດໝາຍສະບັບເລກທີ 5/1999 ຂອງອິນໂດເນເຊຍ ວ່າດ້ວຍການຫ້າມການກະທຳຜູກຂາດຕະຫຼາດ ແລະ ການແຂ່ງຂັນທີ່ບໍ່ເປັນທຳ. ພ້ອມນັ້ນທາງອົງການຍັງໄດ້ເຊີນຜູ້ຊ່ຽວຊານຈາກມາເລເຊຍ ແລະ ເອີຣົບ ມາໃຫ້ຄວາມຮູ້ແກ່ຄະນະດັ່ງກ່າວ ໃນການເດີນທາງໄປໃນຄັ້ງນີ້ ແມ່ນໄດ້ຮັບການຕ້ອນຮັບຈາກ ທ່ານ M. Nawir Messi ປະທານອົງການແຂ່ງຂັນການຄ້າ ອິນໂດເນເຊຍ (KPPU) ແລະ ພະນັກງານ.
ຄຽງຄູ່ກັບການຖອດຖອນບົດຮຽນ ແລະ ແລກປ່ຽນປະສົບການຈາກ KPPU ເປົ້າໝາຍຂອງການຢ້ຽມຢາມໃນຄັ້ງນີ້ ແມ່ນເພື່ອເສີມສ້າງສາຍພົວພັນ ແລະ ການຮ່ວມມືລະຫວ່າງສອງຝ່າຍ ເພື່ອພ້ອມກັນສົ່ງເສີມວຽກງານການແຂ່ງຂັນການຄ້າທີ່ເປັນທຳໃຫ້ມີຄວາມເຂັ້ມແຂງຫລາຍຂຶ້ນ ແລະ ທັງເປັນການກະກຽມສະເໜີຮ່າງກົດໝາຍຂອງ ສປປ ລາວ ເຂົ້າຜ່ານກອງປະຊຸມສະໃໝສາມັນ ເທືອທີ 9 ຊຸດທີ VII ສະພາແຫ່ງຊາດ ແລະ ຍັງປະກອບສ່ວນເຂົ້າໃນການກຽມພ້ອມເຂົ້າສູ່ການເປັນປະຊາຄົມເສດຖະກິດອາຊຽນ ຫຼື AEC ໃນປີ 2015.
ທ່ານ M. Nawir Messi ປະທານອົງການ KPPU ໄດ້ຕີລາຄາສູງຕໍ່ການຢ້ຽມຢາມໃນຄັ້ງນີ້ ຊຶ່ງເປັນການມາຢ້ຽມຢາມຄັ້ງທີສອງ ເພື່ອສ້າງຄວາມເຂັ້ມແຂງ, ການຮ່ວມມື ໃນອະນາຄົດ ແລະ ຍັງຍິນດີຈະໃຫ້ການຊ່ວຍເຫຼືອແກ່ອົງການການແຂ່ງຂັນທາງທຸລະກິດຂອງລາວ ໂດຍຈະສົ່ງຜູ້ຊ່ຽວຊານດ້ານວຽກງານແຂ່ງຂັນການຄ້າ ຂອງອິນໂດເນເຊຍມາຊ່ວຍຖ້າຝ່າຍລາວຕ້ອງການ. ໃນຕອນທ້າຍ ຫົວໜ້າຄະນະຜູ້ແທນຝ່າຍລາວ ໄດ້ສະແດງຄວາມຂອບໃຈມາຍັງ ອົງການແຂ່ງຂັນການຄ້າ ອິນໂດເນເຊຍທີ່ໄດ້ໃຫ້ການຮ່ວມື ແລະ ການຕ້ອນຮັບໃນຄັ້ງນີ້ເປັນຢ່າງດີ.
ກົມການຄ້າພາຍໃນ
