ກົມອຸດສາຫະກຳ ແລະ ຫັດຖະກຳ ກະຊວງອຸດສາຫະກຳ ແລະ ການຄ້າ (ອຄ) ໄດ້ຈັດຊຸດຝຶກອົບຮົມຄວາມເຂັ້ນແຂງດ້ານສະຖິຕິອຸດສາຫະກຳຂຶ້ນ ເພື່ອເປັນການພັດທະນາລະບົບສະຖິຕິອຸດສາຫະກຳປຸງແຕ່ງ ແລະ ຫັດຖະກຳໃຫ້ມີຄວາມພ້ອມ ແລະ ປັນທີ່ເຊື່ອຖືໄດ້ຮັບປະກັນໃຫ້ໄດ້ຂໍ້ມູນທີ່ຖືກຕ້ອງເຂົ້າໃນວຽກງານເກັບກຳສະຖິຕິ.
ທ່ານ ນາງ ວຽງພອນ ວິລະວົງ ຮອງຫົວໜ້າກົມອຸດສາຫະກຳ ແລະ ຫັດຖະກຳ ກະຊວງອຸດສາຫະກຳ ແລະ ການຄ້າ ກ່າວວ່າ: ຊຸດຝຶກອົບຮົມຄັ້ງນີ້ແມ່ນເນັ້ນສ້າງຄວາມເຂັ້ມແຂງດ້ານສະຖິຕິອຸດສາຫະກຳຂອງ ສປປ ລາວ, ສະຖິຕິອຸດສາຫະກຳ ແມ່ນການສັງລວມຂໍ້ມູນຂອງໂຮງງານອຸດສາຫະກຳປຸງແຕ່ງ ແລະ ຫັດຖະກຳໃນຂອບເຂດທົ່ວປະເທດ.
ໃນໄລຍະຜ່ານມາກ່ຽວກັບວຽກງານສະຖິຕິອຸດສາຫະກຳປຸງແຕ່ງ ແລະ ຫັດຖະກຳ ເຈົ້າໜ້າທີ່ກ່ຽວຂ້ອງໄດ້ເອົາໃຈໃສ່ປະຕິບັດວຽກງານດັ່ງກ່າວ ແຕ່ຜົນໄດ້ຮັບຍັງຕໍ່າ. ສາເຫດແມ່ນຍ້ອນຂາດພະນັກງານບຸກຄະລາກອນທີ່ມີຄວາມຊຳນານໃນວຽກງານສະຖິຕິ, ຂາດງົບປະມານ ແລະ ບໍ່ທັນມີລະບົບເກັບກຳຂໍ້ມູນສະຖິຕິທີ່ດີ.
ທ່ານຮອງຫົວໜ້າກົມກ່າວວ່າ: ບັນຫາດັ່ງກ່າວ ກົມອຸດສາຫະກຳ ແລະ ຫັດຖະກຳ ຈຶ່ງໄດ້ຄົ້ນຄວ້າ ແລະ ຊອກຫາວິທີທາງເພື່ອມາປັບປຸງ, ໃນທ້າຍປີ 2013 ກໍ່ໄດ້ຮັບທຶນຈາກໂຄງການ EIF (Enhanced Integrated Framework Tier 02) ເຊິ່ງນອນໃນໂຄງການໜຶ່ງຂອງອົງການຄ້າໂລກ ໂຄງການດັ່ງກ່າວມີອາຍຸຈັດຕັ້ງປະຕິບັດ 3 ປີ ຄື: ເລີ່ມແຕ່ເດືອນທັນວາ 2013 ຫາ ເດືອນທັນວາ 2016 ຈຸດປະສົງໂຄງການເພື່ອການເນັ້ນໜັກໃນເລື່ອງການສ້າງຄວາມເຂັ້ນແຂງທາງດ້ານວິຊາການກ່ຽວກັບວຽກງານສະຖິຕິໃຫ້ກັບພະນັກງານຂະແໜງອຸດສາຫະກຳ ແລະ ຫັດຖະກຳໃນຂອບເຂດທົ່ວປະເທດ, ປັບປຸງລະບົບຖານຂໍ້ມູນສະຖິຕິໂຮງງານ ແລະ ລະບົບຖານຂໍ້ມູນສະຖິຕິໂຮງງານຜະລິດຕະພັນອຸດສາຫະກຳປຸງແຕ່ງ ແລະ ຫັດຖະກຳ.
ໃນຕອນທ້າຍຊຸດຝຶກອົບຮົມຍັງໄດ້ມີພິທີມອບອຸປະກອນໄອທີສຳລັບໃຊ້ໃຫ້ວຽກງານເກັບກຳສະຖິຕິຕື່ມອີກ ປະກອບມີ: ຄອມພິວເຕີຕັ້ງໂຕະຍີ່ຫໍ້ HP 1 ຊຸດ, ໝໍ້ເກັບໄຟຟ້າ UPS 1 ໜ່ວຍ ແລະ ເຄື່ອງພິມເອກະສານຍີ່ຫໍ້ HP 1 ໜ່ວຍ ມອບໃຫ້ພະແນກອຸດສາຫະກຳ ແລະ ການຄ້າ ບັນດາແຂວງ ແລະ ນະຄອນຫຼວງ ຢ່າງລະຊຸດ ລວມມູນຄ່າທັງໝົດ 39.270 ໂດລາສະຫະລັດ.
ຊຸດຝຶກອົບຮົມດັ່ງກ່າວໄດ້ຈັດຂຶ້ນໃນວັນທີ 16 – 18 ມີຖຸນາຜ່ານມາ ທີ່ໂຮງແຮມນະຄອນສັກ ໂດຍການເຂົ້າຮ່ວມເປັນປະທານຂອງ ທ່ານ ນາງ ວຽງພອນ ວິລະວົງ ຮອງຫົວໜ້າກົມອຸດສາຫະກຳ ແລະ ຫັດຖະກຳ ກະຊວງອຄ ມີພະນັກງານທີມາຈາກກົມແຜນການ ແລະ ການຮ່ວມມື, ສູນສະຖິຕິແຫ່ງຊາດ, ພະແນກອຸດສາຫະກຳ ແລະ ການຄ້າແຂວງ, ນະຄອນຫຼວງ ພ້ອມດ້ວຍຊ່ຽວຊານຈາກຕ່າງປະເທດຈຳນວນໜຶ່ງ.
[ບົດຂ່າວ: ໜັງສືພິມເສດຖະກິດ-ການຄ້າ]
