ວານນີ້ ວັນທີ 25 ກຸມພາ 2015 , ຢູ່ກະຊວງອຸດສາຫະກຳ ແລະ ການຄ້າ (ອຄ) ໄດ້ຈັດພິທີມອບ-ຮັບ ໜ້າທີ່ ຫົວໜ້າກົມນະໂຍບາຍການຄ້າຕ່າງປະເທດ ລະຫວ່າງ ທ່ານ ບຸນສົມ ພົມມະວິຫານ ຫົວໜ້າກົມ (ຜູ້ເກົ່າ ອອກພັກຜ່ອນບຳນານ) ກັບ ທ່ານ ດຣ. ລາວຮົວ ເຈີຈິງ ຮັກສາການຫົວໜ້າກົມ (ຜູ້ໃໝ່) ໂດຍການເຂົ້າຮ່ວມຂອງ ທ່ານ ນາງ ເຂັມມະນີ ພົນເສນາ ລັດຖະມົນຕີວ່າການກະຊວງ ອຸດສາຫະກຳ ແລະ ການຄ້າ; ມີບັນດາຫົວໜ້າກົມ, ຫົວໜ້າພະແນກ ແລະ ພະນັກງານພາຍໃນກົມເຂົ້າຮ່ວມເປັນສັກຂີພິຍານ.
ໃນພິທີ ທ່ານ ບຸນສົມ ພົມມະວິຫານ ຫົວໜ້າກົມນະໂຍບາຍການຄ້າຕ່າງປະເທດ (ຜູ້ເກົ່າ) ໄດ້ກ່າວອຳລາໜ້າທີ່ວ່າ: ຕະຫຼອດໄລຍະການປະຕິບັດໜ້າທີ່ຂອງຕົນເຫັນວ່າເອື້ອຍ, ອ້າຍນ້ອງພະນັກງານໃນກົມນະໂຍບາຍການຄ້າຕ່າງປະເທດ ໄດ້ຕັ້ງໜ້າປະຕິບັດໜ້າທີ່ຂອງຕົນຕາມທີ່ໄດ້ຮັບມອບໝາຍຢ່າງຫ້າວຫັນ ອັນປະກອບສ່ວນເຂົ້າໃນການປະຕິບັດພາລະບົດບາດຂອງກະຊວງ ອຄ ໄດ້ເປັນຢ່າງດີ. ນອກນັ້ນ, ພະນັກງານກໍ່ໄດ້ຮັບການປັບປຸງ ແລະ ພັດທະນາສູ່ສະພາບໃໝ່ໄດ້ດີ.
ທ່ານຍັງໄດ້ກ່າວຝາກເຖິງຜູ້ຮັກສາການຫົວໜ້າກົມຜູ້ໃໝ່ ແລະ ພະນັກງານວິຊາການຫຼັກແຫຼ່ງຂອງກົມນະໂຍບາຍການຄ້າຕ່າງປະເທດ ຈົ່ງສືບຕໍ່ປະຕິບັດພາລະໜ້າທີ່ຂອງຕົນ, ຄົ້ນຄວ້າວຽກງານນະໂຍບາຍການຄ້າຕ່າງປະເທດ, ເຈລະຈາການຄ້າ, ການເຊື່ອມໂຍງເສດຖະກິດກັບສາກົນ ແລະ ອື່ນໆ ພ້ອມທັງປະສານສົມທົບກັບຂະແໜງການທີ່ກ່ຽວຂ້ອງປະຕິບັດໜ້າທີ່ໃຫ້ເຂັ້ມແຂງຂຶ້ນເລື້ອຍໆ. ການທີ່ຂ້າພະເຈົ້າອອກໄປກໍ່ບໍ່ໄດ້ໝາຍຄວາມວ່າຈະຕັດຂາດຄວາມສາມັກຄີກັນ, ຍັງມີຄວາມຮັກແພງ ແລະ ພ້ອມທີ່ຈະໃຫ້ຄຳປຶກສາຊ່ວຍເຫຼືອກົມກໍ່ຄືກະຊວງອຸດສາຫະກຳ ແລະ ການຄ້າອີກຕໍ່ໄປ.
ໂອກາດດຽວກັນ ທ່ານ ດຣ. ລາວຮົວ ເຈີຈິງ ຮັກສາການຫົວໜ້າກົມນະໂຍບາຍການຄ້າຕ່າງປະເທດ (ຜູ້ໃໝ່) ກໍ່ໄດ້ກ່າວຮັບເອົາໜ້າທີ່ວ່າ: ຂ້າພະເຈົ້າຈະສຸມສະຕິປັນຍາ ແລະ ທຸ່ມເທເຫື່ອແຮງທຸກຄວາມສາມາດທີ່ມີ ພ້ອມທັງເສີມຂະຫຍາຍມູນເຊື້ອຂອງຫົວໜ້າກົມຜູ້ເກົ່າທີ່ໄດ້ຊີ້ນຳໆພາວຽກງານຕະຫຼອດໃນໄລຍະຜ່ານມາ, ພ້ອມນັ້ນກໍ່ຈະປັບປຸງໜ້າທີ່ວຽກງານໃຫ້ດີຂຶ້ນເລື້ອຍໆ ປະກອບສ່ວນໃນການເຊື່ອມໂຍງເສດຖະກິດ ກັບພາກພື້ນ ແລະ ສາກົນ.
ຕອນທ້າຍພິທີ ທ່ານລັດຖະມົນຕີວ່າການກະຊວງອຸດສາຫະກຳ ແລະ ການຄ້າ ກໍ່ໄດ້ກ່າວສະແດງຄວາມຍ້ອງຍໍຊົມເຊີຍຜົນງານການປະກອບສ່ວນຂອງທ່ານຫົວໜ້າກົມຜູ້ເກົ່າ ພ້ອມດຽວກັນກໍ່ໄດ້ໃຫ້ທິດຊີ້ນຳແກ່ທ່ານຮັກສາການຫົວໜ້າກົມຜູ້ໃໝ່ ໃນການປະກອບສ່ວນເຮັດວຽກງານນະໂຍບານການຄ້າຕ່າງປະເທດໃຫ້ດຳເນີນໄປດ້ວຍຄວາມສະດວກ ເພື່ອປະກອບສ່ວນເຂົ້າໃນວຽກງານເສດຖະກິດຂອງຊາດ. ນອກນີ້, ຍັງເນັ້ນໃຫ້ວິຊາການຂອງກົມນະໂຍບາຍການຄ້າຕ່າງປະເທດ ຈົ່ງພ້ອມກັນສືບຕໍ່ວຽກງານວິຊາສະເພາະຂອງຕົນໃຫ້ມີຄວາມຮັບຜິດຊອບສູງ, ວຽກງານການສ້າງພະນັກງານສືບທອດ ການສ້າງບຸກຄະລາກອນທີ່ມີຄວາມຮູ້ ຄວາມສາມາດໃຫ້ທ່ວງທັນກັບສະພາບປ່ຽນແປງທາງດ້ານເສດຖະກິດ ແລະ ການເຊື່ອມໂຍງກັບສາກົນ.
[ຂ່າວ: ໜັງສືພິມເສດຖະກິດ-ການຄ້າ]
