ກອງປະຊຸມໃຫຍ່ ຄັ້ງທີ III ຂອງໜ່ວຍພັກກົມການນຳເຂົ້າ ແລະ ສົ່ງອອກ ໄດ້ມີຂຶ້ນໃນວັນທີ 9 ມັງກອນ 2015 ໂດຍການເປັນປະທານຂອງທ່ານ ນາງ ເຂັມມະນີ ພົນເສນາ ເລຂາຄະນະພັກ, ລັດຖະມົນຕີວ່າການກະຊວງອຸດສາຫະກຳ ແລະ ການຄ້າ, ທ່ານ ນາງ ບານສະຕິ ເທບພະວົງ ຄະນະພັກກະຊວງ, ເລຂາໜ່ວຍພັກກົມການນຳເຂົ້າ ແລະ ສົ່ງອອກ, ທ່ານ ເຂັມເດັດ ສີຫາວົງ ຮອງເລຂາໜ່ວຍພັກກົມການນຳເຂົ້າ ແລະ ສົ່ງອອກ, ພ້ອມດ້ວຍສະມາຊິກພັກ ແລະ ພາກສ່ວນກ່ຽວຂ້ອງອ້ອມຂ້າງກະຊວງເຂົ້າຮ່ວມ.
ທ່ານ ນາງ ບານສະຕິ ເທບພະວົງ ກ່າວວ່າ: ກອງປະຊຸມຄັ້ງນີ້ຈະໄດ້ຜ່ານຮ່າງລາຍງານການເມືອງ ເພື່ອຕີລາຄາຜົນການຊີ້ນຳໆພາຂອງໜ່ວຍພັກໃນເກືອບ 3 ປີຜ່ານມາ ນັບແຕ່ການສ້າງຕັ້ງໜ່ວຍພັກ ກໍ່ຄືກົມການນຳເຂົ້າ ແລະ ສົ່ງອອກ ເປັນຕົ້ນມາ ແລະ ຈະໄດ້ວາງທິດທາງໜ້າທີ່ ແລະ ຄາດໝາຍສູ້ຊົນແຫ່ງການນຳພາຂອງໜ່ວຍພັກໃນອີກ 3 ປີຕໍ່ໜ້າ ພ້ອມນັ້ນກໍ່ຈະໄດ້ມີການດຳເນີນການປ່ອນບັດເລືອກຕັ້ງເອົາຄະນະໜ່ວຍພັກຊຸດໃໝ່ ແລະ ເລືອກເອົາຜູ້ແທນໄປຮ່ວມກອງປະຊຸມໃຫຍ່ຂອງອົງຄະນະພັກກະຊວງອຸດສາຫະກຳ ແລະ ການຄ້າ ຄັ້ງທີ IV.
ທ່ານ ນາງ ເຂັມມະນີ ພົນເສນາ ໄດ້ໂອ້ລົມຕໍ່ກອງປະຊຸມຄັ້ງນີ້ວ່າ: ການຈັດກອງປະຊຸມຄັ້ງນີ້ເປັນເຫດການສຳຄັນທາງການເມືອງຂອງໜ່ວຍພັກກົມການນຳເຂົ້າ ແລະ ສົ່ງອອກ ແນໃສ່ປັບປຸງພັກ ແລະ ສ້າງຮາກຖານຂອງພັກໃຫ້ໜັກແໜ້ນ, ເຂັ້ມແຂງ, ປອດໃສ ແລະ ມີຄວາມສາມາດນຳພາວຽກງານໃນໄລຍະໃໝ່. ໃນໄລຍະເກືອບ 3 ປີຜ່ານມາ ຄະນະໜ່ວຍພັກກົມການນຳເຂົ້າ ແລະ ສົ່ງອອກແມ່ນໜ່ວຍພັກໜຶ່ງທີ່ເປັນແບບຢ່າງໃນການນຳພາປະຕິບັດໜ້າທີ່ວຽກງານຕາມທີ່ຄະນະພັກກະຊວງມອບໝາຍໃຫ້ ໂດຍການເປັນເສນາທິການໃຫ້ຄະນະພັກ ແລະ ຄະນະນຳກະຊວງໃນການຜັນຂະຫຍາຍນະໂຍບາຍ, ມະຕິ, ຄຳສັ່ງ ຂອງພັກ ແລະ ລັດຖະບານ ເປັນນິຕິກຳ ເຊັ່ນຂໍ້ກຳນົດກົດລະບຽບ ແລະ ຄຳແນະນຳ ເພື່ອປະກອບສ່ວນເຂົ້າໃນການສ້າງສິ່ງອຳນວຍຄວາມສະດວກທາງດ້ານການຄ້າໃຫ້ທັງພາກທຸລະກິດໄດ້ເປັນຢ່າງດີ, ເຮັດໃຫ້ຂັ້ນຕອນການນຳເຂົ້າ ແລະ ສົ່ງອອກມີຄວາມສະດວກວ່ອງໄວ ແລະ ໂປ່ງໃສ ສົ່ງຜົນໃຫ້ ກະຊວງອຸດສາຫະກຳ ແລະ ການຄ້າ ໄດ້ຮັບການຍ້ອງຍໍຊົມເຊີຍ ຈາກພາກລັດ ແລະ ທຸລະກິດ ລວງທັງສາກົນ. ອັນທີ່ພົ້ນເດັ່ນກວ່າໝູ່ໝົດ ກໍ່ແມ່ນການສ້າງສູນຂໍ້ມູນຂ່າວສານທາງດ້ານການຄ້າຂອງ ສປປ ລາວ ຈົນບາງປະເທດໄດ້ນຳໄປເປັນຕົວຢ່າງ ແລະ ມາຖອດຖອນບົດຮຽນນຳ ສປປ ລາວ, ນອກນີ້ການຜັນຂະຫຍາຍທິດ 3 ສ້າງຂອງຂັ້ນເທິງ ກໍເຫັນວ່າໜ່ວຍພັກຂອງກົມການນຳເຂົ້າ ແລະ ສົ່ງອອກ ກໍ່ສາມາດປະຕິບັດໄດ້ດີ ໂດຍໄດ້ມີການແບ່ງຂັ້ນຄຸ້ມຄອງໜ້າວຽກຢ່າງຊັດເຈນ ລະຫວ່າງສູນກາງ ແລະ ທ້ອງຖິ່ນ.
ທ່ານ ນາງ ເຂັມມະນີ ຍັງເນັ້ນຕື່ມບາງຈຸດໃຫ້ໜ່ວຍພັກການນຳເຂົ້າ ແລະ ສົ່ງອອກ ກໍ່ຄື ເສີມຂະຫຍາຍປະຊາທິປະໄຕພາຍໃນໜ່ວຍໃຫ້ເປັນຈິງເທື່ອລະກ້າວ, ເອົາໃຈໃສ່ ກໍ່ສ້າງສະມາຊິກພັກ ແລະ ພະນັກງານ ຢ່າງມີແບບແຜນວິທະຍາສາດ ແລະ ເປັນລະບົບ, ແລະ ໃຫ້ຄວາມສຳຄັນກັບວຽກຜັນຂະຫຍາຍແນວທາງນະໂຍບາຍ ມາເປັນ ນິຕິກຳ ໂຄງການ ແລະ ແຜນງານ ເຊິ່ງສິ່ງນີ້ແມ່ນຫຼັກການສຳຄັນ ທີ່ຈະຮັບປະກັນການປະຕິບັດໄດ້ ໜ້າທີ່ການເມືອງ ແລະ ເສດຖະກິດກໍຄື ວິຊາສະເພາະ ທີ່ເປັນບົດບາດຂອງໜ່ວຍພັກ ກໍຄື ກົມການນຳເຂົ້າ ແລະ ສົ່ງອອກ.
[ສູນສະຖິຕິ ແລະ ຂ່າວສານ]
