ທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ, ຜູ້ຊີ້ນໍາວຽກງານເສດຖະກິດ ການຜະລິດ ແລະ ຈໍລະຈອນ ໃຫ້ກຽດລັ່ນຄ້ອງໄຊ 9 ບາດ ເປີດງານວາງສະແດງຜະລິດຕະພັນເຟີນີເຈີລາວ ຄັ້ງທໍາອິດຢ່າງເປັນທາງການ ໃນຕອນບ່າຍວັນທີ 5 ມັງກອນ ທີ່ສູນການຄ້າລາວ-ໄອເຕັກ. ສະມາຄົມເຟີນີເຈີລາວຫວັງງານຄັ້ງນີ້ຈະຊ່ວຍເສີມສ້າງການແລກປ່ຽນບົດຮຽນການນໍາໃຊ້ເຄື່ອງມືທີ່ທັນສະໃໝ ຂະຫຍາຍຕະຫຼາດໃຫ້ກ້ວາງອອກຮອງຮັບ ເອອີຊີ ທ້າຍປີນີ້.
ງານວາງສະແດງຜະລິດຕະພັນເຟີນີເຈີລາວ ຄັ້ງທີ 1 ມີຫົວໜ່ວຍເຟີນີເຈີທີ່ຜະລິດຈາກໄມ້, ຫວາຍ, ໄມ້ປ່ອງ ແລະ ເຄື່ອງແກະສະຫຼັກໄມ້ ລວມທັງໝົດ 249 ຫ້ອງວາງສະແດງ. ໃນນັ້ນ, ຈາກຕ່າງແຂວງຈໍານວນ 24 ຫ້ອງ ແລະ ພາຍໃນນະຄອນຫຼວງວຽງຈັນ 225 ຫ້ອງ ມີມູນຄ່າຜະລິດຕະພັນເຂົ້າວາງສະແດງທັງໝົດ 25 ຕື້ກີບ.
ທ່ານ ຄໍາໄພ ສົມຊະນະ ປະທານສະມາຄົມເຟີນີເຈີລາວ ກ່າວວ່າ: ການຈັດງານຄັ້ງນີ້ເປັນການເຕົ້າໂຮມບັນດາຜະລິດຕະພັນເຟີນີເຈີ ທີ່ເປັນຫົວຄິດປະດິດສ້າງຂອງຄົນລາວເຮົາ ເພື່ອໂຄສະນາຈໍາໜາຍຕໍ່ຊາວລາວ ແລະ ຊາວຕ່າງປະເທດ ໃຫ້ຮັບຮູ້ເຖິງຄວາມພ້ອມຂອງຜະລິດຕະພັນເຟີນີເຈີລາວ ໃນການແຂງຂັນກັບພາກພື້ນ ແລະ ສາກົນ ພ້ອມທັງດຶງດູດການລົງທຶນ ສົ່ງເສີມໃຫ້ຜູ້ປະກອບການໄດ້ມີໂອກາດແລກປ່ຽນບົດຮຽນເຊິ່ງກັນ ແລະ ກັນ ແນະນໍາບົດຮຽນດັ່ງກ່າວໄປປັບໃຊ້ເຂົ້າໃນການຜະລິດ ການບໍລິການ ຂອງເຂົາເຈົ້າໃຫ້ເກີດດອກອອກຜົນທັງປະລິມານ ແລະ ຄຸນນະພາບ.
ທ່ານ ກອງມາລາ ພົມມາໄລ ຮອງປະທານສະມາຄົມເຟີນີເຈີລາວ ກ່າວວ່າ: ການຈັດງານ ເພື່ອເປັນການຈັດຕັ້ງປະຕິບັດ ຜັນຂະຫຍາຍເນື້ອໃນຈິດໃຈຂອງແຜນນະໂຍບາຍທາງດ້ານເສດຖະກິດ, ການອະນຸລັກຮັກສາປ່າໄມ້ ນຳໃຊ້ເຕັກໂນໂລຊີທີ່ທັນສະໄໝສ້າງມູນຄ່າເພີ່ມໃຫ້ຜະລິດຕະພັນໄມ້ລາວໃຫ້ກາຍເປັນສິນຄ້າທີ່ມີຄຸນນະພາບ ຫັນມາໃຊ້ໄມ້ປູກທົດແທນໄມ້ທຳມະຊາດ, ເພື່ອສ້າງຄວາມເຂັ້ມແຂງໃຫ້ກັບສະມາຄົມເຟີນີເຈີລາວ ແລະ ກວ້າງໄປເລື້ອຍໆ.
ທ່ານກ່າວຕື່ມອີກວ່າ: ສະມາຄົມເຟີນີເຈີລາວ (ສຟລ) ສ້າງຕັ້ງຂຶ້ນນັບແຕ່ປີ 2003 ຜ່ານການເຄື່ອນໄຫວວຽກງານໃນໄລຍະຜ່ານມາເຫັນວ່າມີຜົນສຳເລັດຫຼາຍສົມຄວນ ໄດ້ສ້າງຊື່ສຽງທັງພາຍໃນ ແລະ ພາກພື້ນ ແລະ ສາກົນ. ງານວາງສະແດງຜະລິດຕະພັນເຟີນີເຈີລາວຄັ້ງທີ 1 ປະຈຳປີ 2015 ຈະໄດ້ຈັດຂຶ້ນນັບແຕ່ວັນທີ 5-11 ມັງກອນ 2015 ເຊິ່ງ ສຟລ ມີແຜນຈັດງານວາງສະແດງເຟີນີເຈີລາວຂຶ້ນ 1 ຄັ້ງໃນທຸກໆປີ ແລະ ປີນີ້ເປັນປີທຳອິດ. ພາຍໃນງານຍັງມີການສະແດງກິດຈະກຳການແກະສະຫຼັກໄມ້ເສດເຫຼືອ, ກິດຈະກຳການປະກອບເຄື່ອງເຟີນີເຈີ, ກິດຈະກຳການຈົກສະຫຼາກແຈກໂຊກ ແລະ ຫຼິ້ນເກມຊີງລາງວັນອື່ນໆ.
ງານດັ່ງກ່າວຈັດຂຶ້ນໃນຕອນບ່າຍ ວັນທີ 05 ມັງກອນຜ່ານມາ ທີ່ສູນການຄ້າ ລາວ-ໄອເຕັກ ໂດຍການເຂົ້າຮ່ວມເປີດງານຂອງ ທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ ຜູ້ຊີ້ນຳວຽກງານເສດຖະກິດ ການຜະລິດ ແລະ ຈໍລະຈອນ, ທ່ານ ດຣ. ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ, ທ່ານ ນາງ ເຂັມມະນີ ພົນເສນາ ລັດຖະມົນຕີວ່າການກະຊວງ ອຸດສາຫະກຳ ແລະ ການຄ້າ. ນອກນັ້ນ, ກໍ່ມີປະທານສະພາການຄ້າ ແລະ ອຸດສາຫະກຳແຫ່ງຊາດລາວ, ປະທານສະມາຄົມເຟີນີເຈີລາວ, ຫົວໜ່ວຍທຸລະກິດແຂກທັງພາກລັດ ແລະ ເອກະຊົນເຂົ້າຮ່ວມຢ່າງຟົດຟື້ນ.
[ພາບ ແລະ ຂ່າວ ຈາກໜັງສືພິມເສດຖະກິດ-ການຄ້າ]
