ກອງປະຊຸມໃຫຍ່ ຄັ້ງທີ I ຂອງໜ່ວຍພັກກົມແຜນການ ແລະ ການຮ່ວມມື ໄດ້ມີຂຶ້ນໃນວັນທີ 24 ທັນວາ 2014 ໂດຍການເປັນປະທານຂອງ ທ່ານ ນາງ ເຂັມມະນີ ພົນເສນາ ເລຂາຄະນະພັກ, ລັດຖະມົນຕີວ່າການກະຊວງອຸດສາຫະກຳ ແລະ ການຄ້າ, ທ່ານ ສີລິສຳພັນ ວໍຣະຈິດ ຄະນະພັກກະຊວງ, ເລຂາໜ່ວຍພັກກົມແຜນການ ແລະ ການຮ່ວມມື, ທ່ານ ບົວຈັນ ບຸນວົງໄຊ ຮອງເລຂາໜ່ວຍພັກກົມແຜນການ ແລະ ການຮ່ວມມື, ພ້ອມດ້ວຍສະມາຊິກພັກ ແລະ ພາກສ່ວນກ່ຽວຂ້ອງອ້ອມຂ້າງກະຊວງເຂົ້າຮ່ວມ.
ທ່ານ ສີລິສຳພັນ ວໍຣະຈິດ ກ່າວວ່າ: ກອງປະຊຸມຄັ້ງນີ້ຈະໄດ້ຜ່ານຮ່າງລາຍງານການເມືອງ ເພື່ອຕີລາຄາຜົນການຊີ້ນຳໆພາຂອງໜ່ວຍພັກໃນເກືອບ 3 ປີຜ່ານມາ ນັບແຕ່ການສ້າງຕັ້ງໜ່ວຍພັກ ກໍ່ຄືກົມແຜນການ ແລະ ການຮ່ວມມື ເປັນຕົ້ນມາ ແລະ ຈະໄດ້ວາງທິດທາງໜ້າທີ່ ແລະ ຄາດໝາຍສູ້ຊົນແຫ່ງການນຳພາຂອງໜ່ວຍພັກໃນອີກ 3 ປີຕໍ່ໜ້າ ພ້ອມນັ້ນກໍ່ຈະໄດ້ມີການດຳເນີນການປ່ອນບັດເລືອກຕັ້ງເອົາຄະນະໜ່ວຍພັກຊຸດໃໝ່ ແລະ ເລືອກເອົາຜູ້ແທນໄປຮ່ວມກອງປະຊຸມໃຫຍ່ຂອງອົງຄະນະພັກກະຊວງອຸດສາຫະກຳ ແລະ ການຄ້າ ຄັ້ງທີ IV.
ທ່ານ ນາງ ເຂັມມະນີ ພົນເສນາ ໄດ້ໂອ້ລົມຕໍ່ກອງປະຊຸມຄັ້ງນີ້ວ່າ: ການຈັດກອງປະຊຸມຄັ້ງນີ້ເປັນເຫດການສຳຄັນທາງການເມືອງຂອງໜ່ວຍພັກກົມແຜນການ ແລະ ການຮ່ວມມື ແນໃສ່ປັບປຸງພັກ ແລະ ສ້າງຮາກຖານຂອງພັກໃຫ້ໜັກແໜ້ນ, ເຂັ້ມແຂງ, ປອດໃສ ແລະ ມີຄວາມສາມາດນຳພາວຽກງານໃນໄລຍະໃໝ່. ໃນໄລຍະເກືອບ 3 ປີຜ່ານມາ ຄະນະໜ່ວຍພັກກົມແຜນການ ແລະ ການຮ່ວມມືໄດ້ມີຄວາມບຸກບືນສູງ ແລະ ຕັ້ງໜ້າສ້າງໜ່ວຍພັກ ແລະ ກົມກອງຂອງຕົນໃຫ້ມີຄວາມສາມາດເຮັດຫຼ້ອນໜ້າທີ່ການເມືອງ ແລະ ພາລະບົດບາດຂອງຕົນ, ເຮັດໃຫ້ສາມາດປະຕິບັດພາລະບົດບາດຄຸ້ມຄອງມະຫາພາກ ຕາມທິດນຳການສ້າງບາດກ້າວບຸກທະລຸໃນ 4 ດ້ານ ໂດຍຕິດພັນກັບຂະບວນການວຽກງານ 3 ສ້າງ.
ທ່ານ ນາງ ເຂັມມະນີ ຍັງເນັ້ນຕື່ມບາງຈຸດໃຫ້ໜ່ວຍພັກກົມແຜນການ ແລະ ການຮ່ວມມື ເພີ່ມທະວີການເອົາໃຈໃສ່ຮັກສາມູນເຊື້ອຂອງຕົນ ແລະ ສ້າງໃຫ້ໜ່ວຍພັກຕົນກາຍເປັນໜ່ວຍພັກເຂັ້ມແຂງ ແລະ ຮູ້ນຳພາຮອບດ້ານໃນແຕ່ລະປີຕິດຕໍ່ກັນ ຕາມທີ່ໄດ້ລະບຸໃນມະຕິກອງປະຊຸມໃຫຍ່ຄັ້ງນີ້ ພ້ອມນີ້ໃຫ້ເອົາໃຈໃສ່ 5 ຫຼັກການ ແລະ 3 ທິດນຳ ໃນການກໍ່ສ້າງພັກ. ໃນນັ້ນ, ໃຫ້ເອົາໃຈໃສ່ເປັນພິເສດຫຼັກການລວມສູນປະຊາທິປະໄຕ ແລະ ຫຼັກການຕຳນິຕົນເອງ ແລະ ຕຳນິເຊິ່ງກັນ ແລະ ກັນເພື່ອພ້ອມກັນກ່າວໜ້າ.
[ບົດຂ່າວ: ໜັງສືພິມເສດຖະກິດ-ການຄ້າ]
[ພາບ: ສູນສະຖິຕິ ແລະ ຂ່າວສານ]
