ໃນຕອນເຊົ້າ ຂອງວັນທີ 10 ທັນວາ 2014, ກົມສົ່ງເສີມ ແລະ ພັດທະນາສິນຄ້າ, ກະຊວງອຸດສາຫະກຳ ແລະ ການຄ້າ ໄດ້ຈັດ “ກອງປະຊຸມ ຄະນະຊີ້ນຳໂຄງການສົ່ງເສີມ ການທ່ອງທ່ຽວແບບຍືນຍົງ, ການຜະລິດສະອາດ ແລະ ຄວາມສາມາດໃນການສົ່ງອອກຂອງ ສປປ ລາວ ໄລຍະທີ 2” ຂຶ້ນທີ່ພະແນກອຸດສາຫະກຳ ແລະ ການຄ້າ ແຂວງຫຼວງພະບາງ ໂດຍການເປັນປະທານຮ່ວມລະຫວ່າງ ທ່ານ ພັນ ວິໄລສົມ ຫົວໜ້າກົມ ສົ່ງເສີມ ແລະ ພັດທະນາສິນຄ້າ ກະຊວງອຸດສາຫະກຳ ແລະ ການຄ້າ (ອຄ) ແລະ ທ່ານ ສົມພົງ ປຣະດິຈິດ ຫົວໜ້າພະແນກ ອຸດສາຫະກຳ ແລະ ການຄ້າ ແຂວງຫຼວງພະບາງ, ທັງເປັນຮອງຫົວໜ້າຄະນະຊີ້ນຳໂຄງການຮ່ວມມືລະຫວ່າງ ກະຊວງອຸດສາຫະກຳ ແລະ ການຄ້າ ກັບ ກຸ່ມອົງການສະຫະປະຊາຊາດ, ພ້ອມດ້ວຍພະນັກງານວິຊາການ ຈາກສູນກາງ ແລະ ທ້ອງຖິ່ນ ແລະ ຊ່ຽວຊານຕ່າງປະເທດ ເຂົ້າຮ່ວມກອງປະຊຸມໃນຄັ້ງນີ້.
ໃນທີ່ປະຊຸມ ທ່ານ ສົມພົງ ປຣະດີຈິດ ໄດ້ກ່າວລາຍງານໂດຍຫຍໍ້ກ່ຽວກັບຜົນສຳເລັດ, ບົດຮຽນທີ່ຖອດຖອນໄດ້, ສິ່ງທ້າທາຍຕ່າງໆກ່ຽວກັບການປະຕິບັດໂຄງການໃນໄລຍະທີ 1 ແລະ ແຜນການເຄື່ອນໄຫວໃນໄລຍະຕໍ່ໄປ ເພື່ອແກ້ໄຂບາງຂໍ້ຫຍຸ້ງຍາກ ຫຼັງຈາກນັ້ນ ກໍ່ໄດ້ແລກປ່ຽນຄຳຄິດເຫັນ ຄຳສະເໜີແນະຕ່າງໆ ກ່ຽວກັບໂຄງການໃນໄລຍະທີ 2 ເພື່ອໃຫ້ບັນລຸຕາມຈຸດປະສົງ ແລະ ເປົ້າໝາຍທີ່ໄດ້ກຳນົດເອົາໃວ້.
ທ່ານ ພັນ ວິໄລສົມ ຫົວໜ້າກົມ ສົ່ງເສີມ ແລະ ພັດທະນາສິນຄ້າ, ກະຊວງ ອຄ ຍັງໄດ້ສືບຕໍ່ ຊີ້ນຳນຳພາ ຮ່ວມກັບແຂວງ ເພື່ອຈັດຕັ້ງປະຕິບັດໂຄງການຮ່ວມມືລະຫວ່າງ ກະຊວງອຸດສາຫະກຳ ແລະ ການຄ້າ ແລະ ກຸ່ມສະຫະປະຊາຊາດ ເພື່ອການພັດທະນາດ້ານການຄ້າ (MOIC-UN Trade Cluster Projects) ເພື່ອສົ່ງເສີມການທ່ອງທ່ຽວແບບຢືນຍົງ, ການຜະລິດສະອາດ ແລະ ການສ້າງຄວາມເຂັ້ມແຂງເພື່ອສົ່ງອອກຂອງ ສປປ ລາວ ອັນໄດ້ເປີດການທົດລອງ ແລະ ສຳເລັດການຈັດຕັ້ງປະຕິບັດໂຄງການ ໃນໄລຍະທີ 1 ນັບຕັ້ງແຕ່ປີ 2011 ຈົນເຖິງ ເດືອນຕຸລາ 2014 ທີ່ຜ່ານມານີ້ ແລະ ໄລຍະທີ 2 ກໍ່ຈະໄດ້ເລີ່ມໃໝ່ໃນ ເດືອນພະຈິກ 2014, ເຊິ່ງໃນໂອກາດນີ້ເອງ ທ່ານ ກໍ່ໄດ້ໃຫ້ຂໍ້ມູນແກ່ບັນດາແຂກທີ່ເຂົ້າຮ່ວມ ຮູ້ກ່ຽວກັບຂໍ້ກຳນົດ ແລະ ຄາດໝາຍ ຂອງໂຄງການໃນໄລະຍະທີ 2 ຢ່າງລະອຽດ.
ນອກຈາກນີ້ ທ່ານ ພັນ ວິໄລສົມ ກໍ່ຍັງໄດ້ສະແດງຄວາມຂອບໃຈມາຍັງທຸກພາກສ່ວນທີ່ໄດ້ຮ່ວມກັນຈັດຕັ້ງປະຕິບັດໂຄງການຕະຫຼອດໄລຍະ 4 ປີທີ່ຜ່ານມາວ່າ: ໂຄງການໄດ້ປະສົບຜົນສຳເລັດ ຫຼາຍຢ່າງ ເປັນຕົ້ນ ການປະກາດເຄື່ອງໝາຍທ່ອງທ່ຽວຫຼວງພະບາງ ປອດໄພ ແລະ ສີຂຽວ, ການນຳໃຊ້ເຄື່ອງໝາຍ Handmade in Luangprabang, ການສ້າງກຸ່ມການຜະລິດ ກະສິກຳອິນຊີ, ການສ້າງ ແລະ ນຳຫຼັກສູດການບໍລິການການທ່ອງທ່ຽວ ເຂົ້າສູ່ໂຮງຮຽນຂັ້ນມັດທະຍົມ, ການຕິດຕັ້ງຫ້ອງທົດລອງ ເພື່ອກວດສອບຈຸນລະອິນຊີ, ສ້າງຕັ້ງບໍລິສັດ ທັນຍາຫານ ຊຶ່ງມີການປະກອບສາງເຢັນ ແລະ ອຸປະກອບທີ່ຈຳເປັນຕ່າງໆ, ການບູລະນະສູນຫັດຖະກຳຜານົມ, ການສ້າງຄວາມເຂັ້ມແຂງໃຫ້ແກ່ຜູ້ປະກອບການ ແລະ ບຸກຄະລາກອນຈຳນວນຫຼວງຫຼາຍ. ຈາກນັ້ນທ່ານກໍ່ຍັງໄດ້ກ່າວຄຳຊົມເຊີຍຕໍ່ກັບຜົນສຳເລັດດັ່ງກ່າວ ພ້ອມທັງຂອບໃຈມາຍັງອຳນາດການປົກຄອງຂອງແຂວງ ແລະ ບັນດາຂະແໜງການທີ່ກ່ຽວຂ້ອງ ທີ່ໄດ້ສຸມທຸກກຳລັງສະຕິປັນຍາ ແລະ ເຫື່ອແຮງ ໃນການຈັດຕັ້ງປະຕິບັດໂຄງການນີ້ຈົນເຫັນໄດ້ໝາກຜົນທີ່ຈັບຕ້ອງໄດ້.
[ພາບ ແລະ ຂ່າວຈາກ ສູນສະຖິຕິ ແລະ ຂ່າວສານ, ກົມ ຜຮ]
