ກົມສົ່ງເສີມພັດທະນາວິສາຫະກິດຂະໜາດນ້ອຍ ແລະ ກາງ (SME) ກະຊວງອຸດສາຫະກຳ ແລະ ການຄ້າ ໄດ້ຈັດກອງປະຊຸມ ການສົ່ງເສີມຜູ້ປະກອບກິດຈະການ ແລະ ຜູ້ຮ່ວມງານຂຶ້ນ ໂດຍການເປັນປະທານຂອງ ທ່ານ ສົມດີ ອິນມີໄຊ ຫົາໜ້າກົມສົ່ງເສີມວິສາຫະກິດຂະໜາດນ້ອຍ ແລະ ກາງ ທັງເປັນຫົວໜ້າ (LNPO) ປະຈຳລາວ, ທ່ານ Naoki OGIWARA ຫົວໜ້າກົມແຜນການ, ອົງການຜະລິດຕະພາບແຫ່ງອາຊີ (Asian Productivity Organization – APO) ແລະ ບັນດານັກທຸລະກິດສະມາຊິກອົງການ APO ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ສົມດີ ອິນມີໄຊ ກ່າວວ່າ: ອົງການຜະລິດຕະພາບແຫ່ງອາຊີ ເປັນອົງການຈັດຕັ້ງນາໆຊາດ ລະຫ່ວາງລັດຖະບານໃນພາກພື້ນອາຊີ-ປາຊີຟິກ ມີສຳນັກງານຕັ້ງຢູ່ນະຄອນຫຼວງໂຕກຽວ ປະເທດຍີ່ປຸ່ນ, ມີ 19 ປະເທດ ແລະສປປ ລາວ ໄດ້ເຂົ້າເປັນສະມາຊິກອົງການດັ່ງກ່າວໃນປີ 2002. ພາຍຫຼັງເຂົ້າເປັນສະມາຊິກແລ້ວ ກົມສົ່ງເສີມວິສາຫະກິດຂະໜາດນ້ອຍ ແລະ ກາງ, ກະຊວງ ອຸດສາຫະກຳ ແລະ ການຄ້າ ໄດ້ຮັບມອບໝາຍໃຫ້ເຄື່ອນໄຫວວຽກງານ ໃນຖານະເປັນອົງການຜະລິດຕະພາບ ແຫ່ງ ສປປ ລາວ (Lao Productivity Organization ຫຼື LNPO) ມີບົດບາດ ແລະ ໜ້າທີ່ໃນການປະສານງານກັບອົງການຜະລິດຕະພາບ ແຫ່ງ ອາຊີ ແລະ ບັນດາຂະແໜງການຕ່າງໆພາຍໃນປະເທດ ເພື່ອດຳເນີນການສົ່ງເສີມວຽກງານການເພີ່ມຜະລິດຕະພາບໃນທຸກຂົງເຂດວຽກງານຕ່າງໆ.
ທ່ານຍັງກ່າວຕື່ມວ່າ: ກອງປະຊຸມສົ່ງເສີມຜູ້ປະກອບກິດຈະການ ແລະ ຜູ້ຮ່ວມງານດ້ານວິຊາການໃນຄັ້ງນີ້ແມ່ນເພື່ອແລກປ່ຽນບົດຮຽນ ແລະ ປະສົບການຂອງແຕ່ລະປະເທດໃນການສົ່ງເສີມ ແລະ ພັດທະນາພາກທຸລະກິດ, ພ້ອມທັງການສ້າງຄູ່ຮ່ວມງານທີີ່ດີໃນການດຳເນີນທຸລະກິດ. ເນື່ອງຈາກວ່າການດໍາເນີນທຸລະກິດຍັງຈະຕ້ອງໄດ້ມີການຊ່ວຍເຫຼືອແລກປ່ຽນປະສົບປະການ ແລະ ດ້ານຂໍ້ມູນ-ຂ່າວສານເຊິ່ງກັນ ແລະ ກັນ.
ທ່ານ ນາງ ອາລຸນນີ ສີສະຫວັດ ຮອງຫົວໜ້າພະແນກຜະລິດຕະພາບ, ກົມສົ່ງສີມວິສາຫະກິດຂະໜາດນ້ອຍ ແລະ ກາງ (SME), ກະຊວງອຸດສາຫະກຳ ແລະ ການຄ້າ ກ່າວວ່າ: ກອງປະຊຸມຄັ້ງນີ້ນອກຈາກບັນດານັກທຸລະກິດ ແລະ ຜູ້ປະກອບກິດຈະການຈະໄດ້ແລກປ່ຽນ ແລະ ຖອດຖອນບົດຮຽນເຊິ່ງກັນ ແລະ ກັນແລ້ວຍັງເປັນການເສີມສ້າງສາຍພົວພັນ, ສ້າງເຄືອຂ່າຍທຸລະກິດອີກດ້ວຍ, ອັນຈະເຮັດໃຫ້ຜູ້ປະກອບກິດຈະການລາວໄດ້ຮູ້ຈັກຂໍ້ດີ ແລະ ຂໍ້ດ້ອຍໃນການດຳເນີນທຸລະກິດຢູ່ໃນແຕ່ລະປະເທດ ເພື່ອຈະນຳເອົາໂອກາດດັ່ງກ່າວມາໝູນໃຊ້ໃນທຸລະກິດ ແລະ ກິດຈະການຂອງຕົນໃຫ້ມີທ່າແຮ່ງດີຂື້ນ.
[ພາບ ແລະ ຂ່າວຈາກ ໜັງສືພິມເສດຖະກິດ-ການຄ້າ]
