ກະຊວງອຸດສາຫະກຳ ແລະ ການຄ້າ (ອຄ) ແລະ ກົມຄຸ້ມຄອງສະຖາບັນການເງິນ ທະນາຄານແຫ່ງ ສປປ ລາວ ຮ່ວມກັນຈັດກອງປະຊຸມເຜີຍແຜ່ດຳລັດວ່າດ້ວຍສະຖາບັນການເງິນຈຸລະພາກ, ຂໍ້ກຳນົດວ່າດ້ວຍການຄຸ້ມຄອງສະຫະກອນສິນເຊື່ອ ແລະ ເງິນຝາກປະຢັດເພື່ອສ້າງຄວາມເຂົ້າໃຈຕືມກ່ຽວກັບລະບຽບການຕ່າງໆໃຫ້ກັບພະນັກງານ-ລັດຖະກອນພາຍໃນກະຊວງ ໃນການສ້າງເງື່ອນໄຂໃຫ້ປະຊາຊົນເຂົ້າເຖິງແຫຼ່ງທືນໄດ້ຫຼາຍຂຶ້ນ.
ສຳລັບເອກະສານທີ່ນຳມາເຜີຍແຜ່ໃນຄັ້ງນີ້ ປະກອບມີ 2 ເອກະສານສຳຄັນຄື: ດຳລັດວ່າດ້ວຍສະຖາບັນການເງິນຈຸລະພາກ; ຂໍ້ກຳນົດວ່າດ້ວຍການຄຸ້ມຄອງສະຫະກອນສິນເຊື່ອ ແລະ ເງິນຝາກປະຢັດ ທີ່ນຳສະເໜີໂດຍ ທ່ານ ວິສອນ ໄຊສົງຄາມ ຮອງຫົວໜ້າກົມຄຸ້ມຄອງສະຖາບັນການເງິນ, ທະນາຄານແຫ່ງ ສປປ ລາວ.
ໃນພິທີ ທ່ານ ສົມຈິດ ອິນທະມິດ ລັດຖະມົນຕີຊ່ວຍວ່າການກະຊວງ ອຸດະຫະກຳ ແລະ ການຄ້າ ກໍ່ໄດ້ອະທິບາຍໃຫ້ຜູ້ເຂົ້າຮ່ວມກອງປະຊູມໄດ້ຮູ້ກ່ຽວກັບຂໍ້ກຳນົດ ແລະ ລະບຽບຫຼັກການຂອງສະຖາບັນການເງິນຈຸລະພາກ ເພື່ອເຮັດແນວໃດນຳໃຊ້ແຫຼ່ງທືນທີ່ມີຢູ່ໃຫ້ເກິດຜົນປະໂຫຍດສູງສຸດ, ສ້າງເງືອນໄຂໃຫ້ປະຊາຊົນໄດ້ເຂົ້າເຖິງແຫຼ່ງທຶນຢ່າງແທ້ຈິງ ໂດຍສະເພາະພາກທຸລະກິດທີ່ໜ້ອຍກວ່າກຸ່ມທຸລະກິດ SME. ຄຽງຄູ່ກັນນັ້ນກໍ່ເຮັດໃຫ້ບັນດາສະຖາບັນການເງິນ ແລະສະຫະກອນສິນເຊື່ອໃຫ້ເຂົາເຈົ້າປະຕິບັດຕາມລະບຽບຫຼັກການ ແລະ ສະດວກໃນການຄຸ້ມຄອງ.
ໂອກາດນີ້ ທ່ານ ວິສອນ ໄຊສົງຄາມ ກໍ່ໄດ້ອະທິບາຍລະອຽດເປັນແຕ່ລະຫົວຂໍ້ ເຊິງຜູ້ເຂົ້າຮ່ວມກໍ່ໄດ້ຊັກຖາມເຈາະຈີ້ມເພື່ອສ້າງຄວາມເຂົ້າໃຈຕື່ມເປັນແຕ່ລະບັນຫາດ້ວຍບັນຍາກາດຟົດຟື້ນມ່ວນຊື່ນ.
ພິທີດັ່ງກ່າວ ຈັດຂຶ້ນໃນຕອນເຊົ້າວານນີ້ ທີ່ກະຊວງອຸດສະຫະກຳ ແລະ ການຄ້າ ພາຍໃຕ້ການເປັນປະທານຂອງ ທ່ານ ສົມຈິດ ອິນທະມິດ ລັດຖະມົນຕິຊ່ວຍວ່າການກະຊວງອຸດສາຫະກຳ ແລະການຄ້າ, ມີບັນດາພະນັກງານວິຊາການຈາກກົມທີ່ກ່ຽວຂ້ອງອ້ອມຂ້າງກະຊວງເຂົ້າຮ່ວມຮັບຟັງ.
[ພາບ ແລະ ຂ່າວຈາກ ໜັງສືພິມເສດຖະກິດ-ການຄ້າ]
