ໂດຍປະຕິບັດຕາມແຜນການສ້າງ ແລະ ປັບປຸງ ກົດໝາຍ 5 ປີ ຂອງສະພາແຫ່ງຊາດຊຸດທີ VII (2011-2015) ສະບັບເລກທີ 05/ສພຊ , ລົງວັນທີ 24 ມີຖຸນາ 2011 ແລະ ອີງຕາມແຜນແມ່ບົດການສ້າງປະຊາຄົມເສດຖະກິດອາຊຽນ ທີ່ໄດ້ກຳນົດໃຫ້ບັນດາປະເທດສະມາຊິກອາຊຽນ ຕ້ອງໄດ້ນຳສະເໜີນະໂຍບາຍ ແລະ ກົດໝາຍວ່າດ້ວຍການແຂ່ງຂັນການຄ້າຂອງຕົນ ໃຫ້ສໍາເລັດໃນປີ 2015 . ກະຊວງອຸດສາຫະກຳ ແລະ ການຄ້າ(ກົມການຄ້າພາຍໃນ) ຖານະຮັບຜິດຊອບໂດຍກົງກ່ຽວກັບວຽກງານດັ່ງກ່າວ ທັງເປັນຄະນະຮັບຜິດຊອບການສ້າງຮ່າງກົດໝາຍວ່າດ້ວຍການແຂ່ງຂັນການຄ້າ ໄດ້ສົມທົບກັບພະແນກອຸດສາຫະກໍາ ແລະ ການຄ້າ ແຂວງອຸດົມໄຊ ຈັດກອງປະຊຸມສໍາມະນາດັ່ງກ່າວຂຶ້ນໃນລະຫວ່າງວັນທີ 23-24 ຕຸລາ 2014 ທີ່ແຂວງອຸດົມໄຊ ພາຍໃຕ້ການເປັນປະທານຂອງທ່ານ ຄໍາພຽງ ຢາຈົງວາ ຮອງເລຂາພັກແຂວງ,ປະທານກວດກາພັກ-ລັດ ແຂວງອຸດົມໄຊ ແລະ ທ່ານ ບຸນມີ ມະນີວົງ ຄະນະພັກກະຊວງ,ລັດຖະມົນຕີຊ່ວຍວ່າການ ກະຊວງອຸດສາຫະກຳ ແລະ ການຄ້າ, ໃນກອງປະຊຸມມີບັນດາທ່ານຜູ້ຕາງໜ້າຈາກພະແນກອຸດສາຫະກໍາ ແລະ ການຄ້າ 08 ແຂວງພາກເໜືອ,ຜູ້ຕາງໜ້າຈາກຂະແໜງການຕ່າງໆອ້ອມຂ້າງແຂວງອຸດົມໄຊ ພ້ອມດ້ວຍຜູ້ຕາງໜ້າຈາກພາກທຸລະກິດ ເຂົ້າຮ່ວມທັງໝົດຈໍານວນ 90 ກວ່າ ທ່ານ. ກອງປະຊຸມໃນຄັ້ງນີ້ແມ່ນຈັດຂຶ້ນໂດຍການສະໜັບສະໜູນຊ່ວຍເຫຼືອດ້ານງົບປະມານຈາກລັດຖະບານເຢຍລະມັນ ພາຍໃຕ້ໂຄງການຮ່ວມມືອາຊຽນ-ເຢຍລະມັນ(CPL)ແລະ ແມ່ນອົງການ GIZ ເປັນຜູ້ຈັດຕັ້ງປະຕິບັດໂຄງການດັ່ງກ່າວ.
ກອງປະຊຸມໃນຄັ້ງນີ້ແມ່ນໄດ້ດຳເນີນໄປເປັນເວລາ 02 ວັນເຕັມ, ຈຸດປະສົງໃນການຈັດກອງປະຊຸມສໍາມະນາດັ່ງກ່າວແມ່ນເພື່ອເປັນການທາບທາມ ແລະ ລະດົມຄວາມຄິດເຫັນຕໍ່ຮ່າງກົດໝາຍວ່າດ້ວຍການແຂ່ງຂັນການຄ້າ ຈາກບັນດາທ່ານຜູ້ຕາງໜ້າພາກສ່ວນຕ່າງໆທີ່ເຂົ້າຮ່ວມກອງປະຊຸມ. ໃນກອງປະຊຸມທ່ານລັດຖະມົນຕີຊ່ວຍວ່າການກະຊວງອຸດສາຫະກໍາ ແລະ ການຄ້າ ໄດ້ມີຄໍາເຫັນໂອ້ລົມ ແລະ ຊີ້ໃຫ້ເຫັນເຖີງຄວາມໝາຍຄວາມສໍາຄັນຂອງວຽກງານດັ່ງກ່າວ,ເຊິ່ງທ່ານໄດ້ຍົກໃຫ້ເຫັນເຖິງຈຸດປະສົງຫຼັກຂອງການແຂ່ງຂັນ ແມ່ນ: ເພື່ອສົ່ງເສີມ ແລະປົກປ້ອງຂະບວນການແຂ່ງຂັນການຄ້າທີ່ເປັນທໍາ. ສະນັ້ນ, ຕະຫຼາດທີ່ມີການແຂ່ງຂັນທີ່ເປັນທຳແລະມີປະສິດທິຜົນເທົ່ານັ້ນທີ່ຈະສາມາດປະກອບສ່ວນເຂົ້າໃນການພັດທະນາ ແລະ ການເຕີບໂຕ ທາງເສດຖະກິດຂອງຊາດ ທັງເປັນການປົກປ້ອງຄຸ້ມຄອງ ແລະ ຍົກລະດັບສະຫວັດດີການຂອງຜູ້ຊົມໃຊ້.ນອກຈາກນັ້ນ,ເພື່ອເຮັດໃຫ້ຜູ້ເຂົ້າຮ່ວມກອງປະຊຸມໄດ້ຮັບຮູ້ ແລະ ເຂົ້າໃຈເລິກເຊິ່ງເພີ້ມຂຶ້ນ ຄະນະຮັບຜິດຊອບສ້າງຮ່າງກົດໝາຍໄດ້ນໍາສະເໜີກ່ຽວກັບ: ຄວາມຮຽກຮ້ອງຕ້ອງການຂອງສາກົນ ແລະ ພາກພື້ນ ກ່ຽວກັບນະໂຍບາຍ ແລະ ກົດໝາຍວ່າດ້ວຍການແຂ່ງຂັນການຄ້າ Competition Policy and Law (CPL), “ ຮ່າງ “ ນະໂຍບາຍການແຂ່ງຂັນ ແລະ ລົງເລິກແຕ່ລະມາດຕາຂອງ “ ຮ່າງ “ ກົດໝາຍວ່າດ້ວຍການແຂ່ງຂັນການຄ້າເພື່ອໃຫ້ບັນດາຜູ້ເຂົ້າຮ່ວມກໍາໄດ້ບັນດາເນື້ອໃນສໍາຄັນຂອງຮ່າງກົດໝາຍດັ່ງກ່າວ ໃນການນໍາໄປຄົ້ນຄວ້າປະກອບຄໍາຄິດຄໍາເຫັນ.
ພາຍຫຼັງທີ່ສໍາເລັດກອງປະຊຸມລະດົມຄວາມຄິດເຫັນດັ່ງກ່າວຢູ່ພາກເໜືອແລ້ວ ຄະນະຮັບຜິດຊອບສ້າງຮ່າງກົດໝາຍ ວ່າດ້ວຍການແຂ່ງຂັນການຄ້າ ຍັງຈະໄດ້ສືບຕໍ່ລົງໄປທາບທາມລະດົມຄວາມຄິດເຫັນຕໍ່ຮ່າງກົດໝາຍດັ່ງກ່າວຢູ່ບັນດາແຂວງພາກໃຕ້ຕື່ມອີກ.
